ព័ត៌មានជាតិ

អភិបាលខណ្ឌបឹងកេងកង ដឹកនាំមន្ត្រីជិះកង់ផ្សព្វផ្សាយឲ្យពលរដ្ឋនាំកូនអាយុពី៣ដល់ក្រោម៥ឆ្នាំទៅចាក់វ៉ាក់សាំងកូវីដ-១៩

បានផុស

៣ years មុន

នៅ

ថ្ងៃពុធ ២៣ កុម្ភៈ ២០២២

ដោយ

លោក ធឹម សំអាន អភិបាល នៃគណៈអភិបាលខណ្ឌបឹងកេងកង នៅព្រឹកថ្ងៃទី២៣ ខែកុម្ភៈនេះ បានដឹកនាំមន្ត្រីសាលាខណ្ឌ ជិះកង់ចុះផ្សព្វផ្សាយវិធានការសុខាភិបាល និងណែនាំដល់ឪពុកម្ដាយដែលមានកូនចាប់ពីអាយុ៣ឆ្នាំ ដល់ក្រោម៥ឆ្នាំ ឲ្យទៅចាក់វ៉ាក់សាំងការពារជំងឺកូវីដ-១៩ឲ្យបានគ្រប់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ធឹម សំអាន បានលើកឡើងថា ដើម្បីថែរក្សាសុខសុវត្ថិភាព សុខភាពបងប្អូន ពលរដ្ឋនិងមន្ត្រីរាជការទាំងអស់ សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូដល់បងប្អូនប្រជាពលរដ្ឋជានិច្ច ពីការវាយលុកពីជំងឺកូវីដ-១៩ ជាពិសេសមេរោគបំប្លែងថ្មីអូមីក្រុង ដែលកំពុងរីករាលដាលក្នុងសហគមន៍។

បន្ថែមពីលើការចាក់វ៉ាក់សាំងការពារ លោកអភិបាលខណ្ឌបឹងកេងកង ក៏បានអំពាវនាវ ដល់បងប្អូនទាំងអស់ ត្រូវគោរពរវិធានការ ៣កុំ ៣ការពារ អនុវត្តទាំងអស់គ្នាដើម្បីសុវត្ថិភាពគ្រួសារ។

ជាមួយគ្នានេះ លោកអភិបាលក៏បានបញ្ជាក់ពីទីតាំងចាក់វ៉ាក់សាំងសម្រាប់ក្នុងមូលដ្ឋានខណ្ឌបឹងកេងកេង គឺនៅមណ្ឌលសុខភាពទួលស្វាយព្រៃ ស្ថិតក្នុងសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ។

គួរបញ្ជាក់ថា យុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី១ ជូនកុមារអាយុពី៣ឆ្នាំ ដល់ក្រោម៥ឆ្នាំ ចាប់ផ្តើមអនុវត្តពីថ្ងៃទី២៣ ខែកុម្ភៈនេះតទៅ ហើយអាណាព្យាបាលដែលនាំកុមារទៅចាក់វ៉ាក់សាំងបង្ការជំងឺកូវីដ-១៩ នៅទីតាំងសុខាភិបាល សាធារណៈ ដែលរៀបចំដោយអាជ្ញាធរមូលដ្ឋាន ត្រូវភ្ជាប់ទៅជាមួយនូវឯកសារដូចជា សំបុត្រកំណើត ឬសំបុត្របញ្ជាក់កំណើត សៀវភៅគ្រួសារ សៀវភៅស្នាក់នៅ ឬលិខិតឆ្លងដែន និងចំពោះកូនចៅមន្ត្រីរាជការថ្នាក់ជាតិ ត្រូវភ្ជាប់ឯកសារទៅជាមួយដូចជាប័ណ្ណសំគាល់ខ្លួន មន្ត្រីរាជការ ឬប័ណ្ណសម្គាល់មន្ត្រីជាប់កិច្ចសន្យា៕