ព័ត៌មានជាតិ
លោក ញឿក ភារម្យ ៖ ចិញ្ចឹមចង្រិតអាចរកចំណូលបន្ថែមខ្ទង់ ៥០០ដុល្លារ ក្នុង១ខែ ក្រៅពីការងារផ្សេង
រយៈពេល ១២ ឆ្នាំ ប្រកបរបរចិញ្ចឹមចង្រិត នាំឲ្យលោក ញឿក ភារម្យ ទទួលបានបទពិសោធន៍ពីអាជីពនេះ យ៉ាងក្រាស់ក្រែល និងបានចែករំលែកបច្ចេកទេសទៅដល់កសិករ ជាច្រើននាក់ផងដែរ។
លោក ញឿក ភារម្យ ម្ចាស់កសិដ្ឋានចិញ្ចឹមចង្រិតភារម្យតាកែវ បានលើកឡើងថា អាជីពចិញ្ចឹមចង្រិតនេះ លោកចាប់ផ្តើមតាំងពីឆ្នាំ ២០១១មក រហូតមកដល់ពេលនេះ មានរយៈពេលជិត ១២ឆ្នាំហើយ។
បច្ចុប្បន្នលោក ភារម្យ បានបង្កើតជាសមាគមដែលមានសមាជិកប្រមាណជិត ១០០គ្រួសារ។គោលបំណងនៃការចងក្រងជាបណ្តុំសមាគមនេះ លោក ភារម្យ បញ្ជាក់ថា ដើម្បីចែករំលែកបច្ចេកទេស នៃការចិញ្ចឹម និងងាយស្រួលក្នុងការគ្រប់គ្រងទីផ្សារ នៅពេលកសិករប្រមូលផលចង្រិត។
ការចិញ្ចឹមចង្រិត គឺមិនលំបាកនោះទេ។ ក្នុងមួយថ្ងៃចំណាយពេលត្រឹមតែ ១ម៉ោងកន្លះ ទៅ ២ម៉ោង ដាក់ចំណី ដាក់ទឹកឲ្យចង្រិត គឺជាការស្រេច។ យើងអាចមានពេលច្រើន ក្នុងការធ្វើកិច្ចការងារផ្សេងៗទៀតបាន។ នេះគឺជាការលើកឡើងរបស់លោក ញឿក ភារម្យ។
ចំពោះការចិញ្ចឹម ម្ចាស់កសិកដ្ឋានចិញ្ចឹមចង្រិតភារម្យតាកែវ បានឲ្យដឹងថា ចង្រិតងាយស្រួលចិញ្ចឹម និងប្រើរយៈពេលខ្លីត្រឹម ៣៥ថ្ងៃប៉ុណ្ណោះ អាចចាប់លក់បាន។ ក្នុង១ថ្ងៃ លោកបញ្ជាក់ថា អាចប្រមូលផលបានជិត ១តោន តាមតម្រូវការទីផ្សារ។ ទោះយ៉ាងណា ថ្ងៃធម្មតាជាមធ្យមលោកថា យ៉ាងហោចណាស់ ក៏ប្រមូលបាន ៣០០ទៅ ៤០០គីឡូក្រាមផងដែរ។
ចំណែកចំណូលដែលអ្នកចិញ្ចឹមអាចទទួលបានជាមធ្យមខ្ទង់ ៥០០ដុល្លារក្នុង១ខែ សម្រាប់អ្នកចិញ្ចឹមធម្មតា។ រីឯអ្នកចិញ្ចឹមបែបកសិដ្ឋានធំៗ អាចទទួលបានចន្លោះពី ៣ម៉ឺន ទៅ៤ម៉ឺនដុល្លារ ក្នុង១ឆ្នាំ។
លោក ញឿក ភារម្យ បានប្រាប់ឲ្យដឹងថា ចង្រិតលក់បានក្នុង ១គីឡូ តម្លៃចាប់ពី ១ម៉ឺន ទៅ១ម៉ឺន៥ពាន់រៀល សម្រាប់តម្លៃដុំ និងតម្លៃ ២ម៉ឺនរៀលឡើងទៅ សម្រាប់តម្លៃលក់រាយ។
បើតាមលោក ភារម្យ អ្នកចិញ្ចឹមដែលស្ថិតនៅក្នុងសមាគម មិនពិបាករកទីផ្សារលក់ចេញនោះទេ ពោលគឺសមាគមជួយរកទីផ្សារ ក្នុងតម្លៃសមរម្យជូនដល់កសិករ។ បច្ចុប្បន្ន ចង្រិតរបស់លោក ញឿក ភារម្យ ត្រូវបានចេកចាយទៅគ្រប់ខេត្តក្រុង នៃព្រះរាជាណាចក្រកម្ពុជា។
ម្ចាស់កសិដ្ឋានរូបនេះ បានណែនាំដល់កសិករដែលចង់ចាប់អាជីពចិញ្ចឹមចង្រិតចំនួនពីរចំណុច៖ ទី១ ត្រូវមានបច្ចេកច្បាស់លាស់ «បើមានបច្ចេកទេសច្បាស់ យើងចិញ្ចឹមចំណាយដើមទុនតិច ទទួលបានចំណូលខ្ពស់»។ ទី២ ត្រូវធ្វើទីផ្សារជាមុន « កុំចិញ្ចឹមតាមគ្នា ការចិញ្ចឹមតាមគ្នា ដោយមិនសិក្សាពីទីផ្សារ ក្រោយពេលប្រមូលផល នឹងពិបាកក្នុងការលក់ចេញ នាំឲ្យអ្នកចិញ្ចឹមបាក់ទឹកចិត្ត»។ លោក ភារម្យ រង់ចាំស្វាគមន៍ចំពោះបងប្អូន ដែលចង់ចេះចិញ្ចឹមចង្រិតតាមបច្ចេកទេសត្រឹមត្រូវ និងមិនខ្វះទីផ្សារអាចទាក់ទងលោកបាន។
សូមបញ្ជាក់ថា កសិដ្ឋានចិញ្ចឹមចង្រិត របស់លោក ញឿក ភារម្យ មានទីតាំងនៅភូមិ ត្រពាំងឬស្សី ឃុំបារាយ ស្រុកដូនកែវ ខេត្តតាកែវ៕
អត្ថបទ៖ ទួន សុផល
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ