ក្រសួងអប់រំ បើកឱ្យសិស្សទូទាំងប្រទេសរៀនពេញលេញឡើងវិញ

ក្រសួងអប់រំ យុវជន និងកីឡា បានបើកឱ្យមានការរៀន និងបង្រៀនពេញលេញឡើងវិញ ក្រោយពីស្ថានភាពជំងឺកូវីដ-១៩ មានភាពធូស្រាល។ ប៉ុន្តែគ្រឹះស្ថានសិក្សានានាត្រូវបន្តអនុវត្តវិធានការ ៣កុំនិង៣ការពារ ដើម្បីធានាសុវត្ថិភាពសុខភាពសិក្សា។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី០៨ ខែឧសភានេះថា យោងតាមស្មារតីសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២០-២០២១ និងលើកទិសដៅការងារឆ្នាំសិក្សា ២០២១-២០២២ កាលពីថ្ងៃ ២៥-២៧ មេសា ២០២១ ស្របតាមប្រសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ក្រសួងអប់រំ យុវជន និងកីឡា បាន និងបន្តអនុវត្តការរៀន និងបង្រៀនពេញលេញនៅទូទាំងប្រទេស ដោយបន្តអនុវត្តន៍គោលការណ៍ប្រតិបត្តិស្តង់ដារបស់ក្រសួងអប់រំ យុវជន និងកីឡា ដើម្បីធានាសុវត្ថិភាពសុខភាពសិក្សានៃដំណើការគ្រឹះស្ថានសិក្សាតាមគន្លងប្រក្រតីភាពថ្មី នៃវិស័យអប់រំ ជាពិសេសបន្តអនុវត្តន៍វិធានការ ៣ការពារ ៣កុំ របស់សម្តេចតេជោ។

កន្លងមកក្រសួងអប់រំ យុវជន និងកីឡា បានតម្រូវឱ្យគ្រឹះស្ថានសិក្សានីមួយៗដាក់សិស្សក្នុង១ថ្នាក់ពី ៣០ ទៅ៤០នាក់ប៉ុណ្ណោះ និងសិក្សាដោយឆ្លាស់គ្នា គឺរៀននៅក្នុងថ្នាក់ផង និងនៅតាមអនឡាញផងដើម្បីរក្សាគម្លាតសុវត្តិភាព សំដៅទប់ស្កាត់ការឆ្លងរាលដាលជំងឺកូវីដ-១៩ នៅក្នុងសាលារៀន។

អ្នកស្រី ស៊ាន សុភា រស់នៅរាជធានីភ្នំពេញបានសម្តែងនូវការត្រេកអរយ៉ាងខ្លាំង ដែលរាជរដ្ឋាភិបាល ក៏ដូចជាក្រសួងអប់រំ យុវជន និងកីឡា បានបើកឱ្យបង្រៀន និងរៀននៅក្នុងថ្នាក់បានពេញលេញដូចមុនជំងឺកូវីដ-១៩ រាតត្បាត។

អ្នកស្រីបានបន្តថា ការបើកឱ្យរៀនបានពេញលេញនេះ មានសារសំខាន់ណាស់សម្រាប់កូនអ្នកស្រី បានជួបជុំមិត្តភក្ដិ ជួបមុខគ្រូដោយផ្ទាល់ និងបានរៀនសូត្រពេញម៉ោង ព្រោះថា ពេលដែលរៀនតាមអនឡាញមានការលំបាកដោយសារអ្នកស្រីមិនមានពេលវេលាគ្រប់គ្រាន់នៅជាមួយកូន ព្រោះជាប់រវល់ធ្វើការ។

យ៉ាងណាក៏ដោយ អ្នកស្រីប្តេជ្ញាថា នឹងចូលរួមសហការ និងអនុវត្តតាមការណែនាំរបស់ក្រសួងអប់រំ យុវជន និងកីឡា ក៏ដូចជាការអនុវត្តវិធានការ ៣កុំនិង៣ការពារ របស់ប្រមុខរដ្ឋាភិបាលផង ដើម្បីការពារជំងឺកូវីដ-១៩ កុំឱ្យឆ្លងរាលដាលនៅក្នុងសហគមន៍ និងក្នុងសាលារៀន៕

អត្ថបទ៖ សំអឿន