សេដ្ឋកិច្ច

ក្រុមហ៊ុន Santana Agro ចុះកិច្ចសន្យាទិញគ្រាប់ស្វាយចន្ទីសើម ៣០០ តោន ពីសហគមន៍កសិកម្មទំនើបខេត្តកំពង់ធំ

បានផុស

៨ ខែ មុន

នៅ

ថ្ងៃចន្ទ ៣១ មីនា ២០២៥

ដោយ

ក្រុមហ៊ុន Santana Agro Proudcts នៅថ្ងៃទី៣០ ខែមីនា ឆ្នាំ២០២៥ នេះ បានចុះកិច្ចសន្យាទិញគ្រាប់ស្វាយចន្ទីសើមចំនួន ៣០០ តោន ពីសហគមន៍កសិកម្មទំនើបស្វាយចន្ទីទាំង ៣ នៅខេត្តកំពង់ធំ ក្នុងទំហំទឹកប្រាក់ប្រមាណ ៤០ ម៉ឺនដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ចំពោះកិច្ចសន្យានេះ ធ្វើឡើងក្នុងលក្ខខណ្ឌតម្លៃប្រែប្រួលតាមជាក់ស្តែង ដោយក្រុមហ៊ុននឹងផ្តល់ជូន ១០០៛/គីឡូក្រាម បន្ថែមពីតម្លៃទីផ្សារនៅតាមតំបន់នីមួយៗ ហើយការចំណាយដឹកជញ្ជូនពីសហគមន៍គឺជាបន្ទុករបស់ក្រុមហ៊ុន។ ជាឧទាហរណ៍ជាក់ស្តែង ក្រុមហ៊ុនអាចផ្តល់ដល់សហគមន៍ក្នុងថ្ងៃទី៣០ ខែមីនានេះ ក្នុងតម្លៃ ៥៩០០៛/គីឡូក្រាម សម្រាប់គ្រាប់ស្វាយចន្ទីសើម ដែលមានកម្រិតភាគរយសាច់២៨%។

បូករួមនឹងកិច្ចសន្យាកាលពីដើមសប្ដាហ៍ សហគមន៍កសិកម្មទំនើប បានលក់គ្រាប់ស្វាយចន្ទីបានសរុបជាង ១ លានដុល្លារ រួចជាស្រេចរហូតមកដល់ពេលនេះ ដែលធ្វើឱ្យសហគមន៍លែងព្រួយបារម្ភអំពីបញ្ហាទីផ្សារសម្រាប់រដូវកាលប្រមូលផលឆ្នាំនេះទៀតហើយ។ ក្នុងនោះ គ្រាប់ស្វាយចន្ទីដែលនៅសេសសល់នឹងត្រូវបានប្រមូលសម្ងួតទុក ដើម្បីទុកលក់ស្ងួតនៅពេលក្រោយ។ លោក ឃឹម ហ្វីណង់ បន្ថែមបែបនេះ។

កាលពីថ្ងៃទី២៥ កន្លងទៅនេះ ក្រុមហ៊ុន MIRARTH បានចុះកិច្ចសន្យាទិញគ្រាប់ស្វាយចន្ទីស្រស់ពីសហគមន៍កសិកម្មទំនើបដំណាំស្វាយចន្ទីទាំង ៣ នៅខេត្តកំពង់ធំចំនួន ៤០០ តោន ក្នុងទំហំទឹកប្រាក់ជិត ៦៥ ម៉ឺនដុល្លារ។

បច្ចុប្បន្នតម្លៃគ្រាប់ស្វាយចន្ទីស្រស់លក់បាន ៥៦០០ រៀល ក្នុងមួយគីឡូក្រាម ខណៈកសិករអះអាងថា ជាតម្លៃល្អដែលអាចផ្ដល់ផលចំណេញ។

បើយោងតាមសមាគមស្វាយចន្ទីកម្ពុជានៅឆ្នាំ ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុងនោះនាំចេញគ្រាប់ឆៅបានចំនួន ៨១ ម៉ឺន ៥ ពាន់តោន កើនឡើង ២១% គិតជាទឹកប្រាក់ ១,១៥០ ពាន់លានដុល្លារ កើន ២៦,១៥%។ ក្នុងនោះនាំចេញទៅវៀតណាមចំនួន ៧៩ ម៉ឺន ៥ ពាន់តោន៕