លោក ហេង សួរ៖ រដ្ឋាភិបាលដាក់តួលេខប្រាក់ឈ្នួលសម្រាប់ឆ្នាំ២០២៣ចំនួន១៩៧,៨៦ដុល្លារ

លោក ហេង សួរ ប្រធានលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមាបានមានប្រសាសន៍ថា តាមលក្ខណបច្ចេកទេស និងបម្រែបម្រួលទិន្នន័យនៃលក្ខណៈវិនិច្ឆ័យទាំង៧ ដែលជាមូលដ្ឋានកំណត់ប្រាក់ឈ្នួលអប្បបរនោះ
រាជរដ្ឋាភិបាលបានគណនាឃើញថា តួលេខប្រាក់ឈ្នួលអប្បបរមាសម្រាប់ឆ្នាំ២០២៣គឺ ១៩៧,៨៦ដុល្លារអាមេរិក​ ខណៈបច្ចុប្បន្នមាន១៩៤ដុល្លារក្នុង១ខែ។

ថ្លែងក្រោយកិច្ចប្រជុំក្រុមប្រឹក្សារជាតិប្រាក់ឈ្នួលអប្បបរមាកាលពីយប់ថ្ងៃទី៣១ ខែសីហា លោក ហេង សួរ បានបន្តថា​កិច្ចប្រជុំលើកទី៣នេះភាគីនិយោជក និងភាគីតំណាងកម្មករនិយោជិតមានតស៊ូមតិ និងការពារជំហររបស់ខ្លួនរៀងៗខ្លួនយ៉ាងស្វិតស្វាញ និងភាពចាស់ទុំតែឃើញមានហេតុផល និងមានវឌ្ឍភាពដែរ។

លោកបានបន្តថា ក្នុងនោះភាគីនិយោជកបានដំឡើងតួលេខពី១៩៤ដល់១៩៦ដុល្លារ។ ចំណែកឯភាគីកម្មករនិយោជិតបានបន្ថយតួលេខពី២១៥ មកនៅត្រឹមតែ២១៣ដុល្លារ។

លោក អាត់ ធន់ តំណាងភាគីតំណាងកម្មករនិយោជិតបានលើកឡើងថា ការបន្ថយតួលេខពី២១៥ មកនៅត្រឹម២១៣​ដុល្លារ​នេះ គឺយើងចង់ឱ្យដំណើរការការចរចារប្រាក់ឈ្មួលប្រព្រឹត្តិទៅដោយមានភាពរលូន។ លោកបានពន្យល់ថា ការដែលខាងភាគីតំណាងកម្មករនិយោជិតទាមទារប្រាក់ឈ្នួលខ្ពស់នេះដោយសារតែឆ្នាំនេះមានអតិផរណាខ្ពស់ ដែលធ្វើឱ្យកម្មករចំណាយច្រើន និងថ្ងៃបុណ្យចំថ្ងៃអាទិត្យច្រើនធ្វើឱ្យកម្មករបាត់បង់ប្រាក់ចំណូលដែរ។

លោក ហេង សួរ បានបន្តទៀតថា ភាគីនីមួយៗបានឯកភាពគ្នា និងបន្តកិច្ចប្រជុំនៅថ្ងៃទី១៣ ខែកញ្ញា និងថ្ងៃទី២១ ខែ​កញ្ញា ដែលជាកិច្ចប្រជុំចុងក្រោយ។ លោកបានបន្តថា ប្រជុំថ្ងៃទី១៣ ខែកញ្ញា ខាងមុខនេះ ភាគីនឹងមានការសំណូមពរផ្សេងៗពីភាគីនិយោជក និងភាគីតំណាងកម្មករនិយោជិតហើយបើក្នុងករណីភាគីទាំង៣មានការឯកភាពគ្នានូវតួលេខរួមគ្នាមួយនោះ នឹងបញ្ចប់តែម្តង។ ប៉ុន្តែបើមិនព្រមព្រៀងគ្នាទេនឹងត្រូវបន្តទៅថ្ងៃទី២១ ខែកញ្ញា ដែលមានការចូលរួមពីលោកបណ្ឌិត អ៊ិត សំហេង ប្រធានក្រុមប្រឹក្សារជាតិប្រាក់ឈ្នួលអប្បបរមាហើយនឹងសួរភាគីទាំង៣សម្រេចយកតួលេខរួមគ្នាបើមិនមានការឯកភាពទេ ត្រូវធ្វើការបោះឆ្នោតដើម្បីជ្រើសរើសយកតួលេខមួយដាក់ជូនប្រមុខរដ្ឋាភិបាលជាអ្នកសម្រេច។

លោក អាត់ ធន់ បានបន្ថែមថា ការចរចារប្រាក់ឈ្នួលឆ្នាំនេះពិបាកនឹងរកការឯកភាពគ្នាណាស់ ដោយសារតួលេខរបស់ភាគីនីមួយៗមានគម្លាតពីគ្នាឆ្ងាយរវាងភាគីនិយោជកដែលមាន១៩៦ដុល្លារ និងភាគីតំណាងកម្មករនិយោជិត​២១៣ដុល្លារ។​​​ ប៉ុន្តែមានភាពប្រហាក់ប្រហែលគ្នារវាងភាគីនិយោជក និងភាគីរាជរដ្ឋភិបាលដែលមានប្រមាណជិត១៩៨ដុល្លារ។

លោកបានបញ្ជាក់ថា «ហេតុដូច្នេះខ្ញុំមិនរំពឹងថា នឹងទម្លាក់មកតួលេខណាមួយដែលអាចត្រូវគ្នាទេ​ តែឧទាហរណ៍ថានិយោជក និងរដ្ឋាភិបាលអាចឡើងដល់ជាង២១០ សហជីពអាចចុះវិញ ឬខាងសហជីពចុះត្រឹម២០៤ឬ២០៥ គាត់តម្លើងវិញអាចនឹងត្រូវ តែខ្ញុំមើលទៅវាពិបាកបន្តិច ព្រោះម្នាក់ៗសុទ្ធតែមានទឡ្ហីករណ៍ និងភស្តុតាងបញ្ជាក់រៀងៗខ្លួន»។

គួរបញ្ចាក់ថា សម្រាប់ប្រាក់ឈ្នួលអប្បបរមាកម្មករនិយោជិតក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់ឆ្នាំ២០២២ ទទួលបាន១៩៤ដុល្លារក្នុង១ខែ ដោយមិនគិតពីប្រាក់អត្ថប្រយោជ
ន៍ផ្សេងៗទៀតទេ៕

អត្ថបទ ៖ សំអឿន