ក្រោយកម្លាំងស្នងការនគរបាល​ហៅឲ្យចូលបំភ្លឺ លោកវន់ ពៅ សម្រេចលុប​វីដេអូ​ចម្រៀង ឈាមបាតុករ

ភ្នំពេញ ៖ បន្ទាប់​ពី​លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានស្នើនាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការទប់ស្កាត់ការផ្សព្វផ្សាយ បទចម្រៀង ដែលមានចំណងជើងថា «ឈាមបាតុករ» រួចមក ស្នងការដ្ឋាននគរបាលរាជធានីភ្នំពេញ បានកោះហៅ តំណាងសង្គមស៊ីវិល៤រូប​ឲ្យ​ចូលបំភ្លឺ។

ស្នងការដ្ឋាននគរបាលរាជធានីភ្នំពេញ បានកោះអញ្ជើញ តំណាងសង្គមស៊ីវិលចំនួន ៤រូប រួមមាន លោក មឿន តុលា ប្រធានអង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស, លោក អំ សំអាត នាយកប្រតិបត្តិអង្គការលីកាដូ, លោក ថេង សាវឿន ប្រធានអង្គការសម្ព័ន្ធសហគមន៍កសិករកម្ពុជា, លោក វន់ ពៅ ប្រធានសហភាពផ្ទះសាមគ្គីជាដើម ដើម្បីសួរនាំអំពីការបង្ហោះបទចម្រៀង «ឈាមបាតុករ»នេះ។

ក្រោយពីបានចូលបំភ្លឺ និងសួរនាំរួច តំណាងសង្គមស៊ីវិលទាំង៤ បានយល់ព្រមលុបវីដេអូចម្រៀងនេះ ចេញពីបណ្តាញសង្គមហ្វេសប៊ុកអស់ហើយ។

បើតាមលោកស្រី ភឿង សកុណា បទចម្រៀង «ឈាមបាតុករ» និពន្ធទំនុកច្រៀង និងច្រៀងដោយឈ្មោះ គា សុគន្ធ។ បទចម្រៀងនេះ ត្រូវបានក្រសួងមហាផ្ទៃ ចាត់វិធានការបិទ និងផ្តន្ទាទោសអ្នកនិពន្ធ និងអ្នកច្រៀងម្តងរួចហើយមកហើយ។ លោកស្រី ភឿង សកុណា បានគូសបញ្ជាក់ថា បទចម្រៀង «ឈាមបាតុករ» មានខ្លឹមសារអុជអាល ញុះញង់ អាចនឹងបង្កអសន្តិសុខ សណ្តាប់ធ្នាប់ដល់សង្គម៕

កែសម្រួលដោយ ៖ នាគព័ន្ធ