អ្នកនាំពាក្យ៖ ​រដូវរងាធ្លាក់ខ្យល់​ហៀបនឹងផុតចូលរដូវប្រាំងហើយ

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម ​បានឱ្យដឹងថា បច្ចុប្បន្ននេះ ក្រសួងធនធានទឹក ​កំពុងតែតាមដានអំពីការផ្លាស់ប្ដូរអាកាសធាតុ​ពីរដូវធ្លាក់ខ្យល់​រងា​ទៅរដូវប្រាំង ខណៈដែលរដូវធ្លាក់ខ្យល់ត្រជាក់ជិតផុតហើយ។

លោក ចាន់ យុត្ថាថ្លែងថា៖ «យើងកំពុងតែតាមដានបន្តប៉ុន្តែ មើលទៅដូចជាផុតហើយ ចាំមើលមួយថ្ងៃពីរទៀត។ ឥឡូវនេះ កំពុងតែស្ថិតនៅក្នុងដំណាក់ការអន្តរកាលបានន័យថា ស្ទើរតែឆ្លងពីរដូវរំហើយទៅប្រាំងពេញលេញ​ តែយើងមើលទៅ​វានៅរាងប្រទាញប្រទង់គ្នាបន្តិច​។ ពីរបីថ្ងៃទៀត​យើងនឹងតាមដានបន្ថែមទៀត»។

​យោងតាមការព្យាករណ៍អាកាសធាតុលើកទី១ របស់ក្រសួងធនធានទឹក និងឧតុនិយមបានឱ្យដឹងថា ​នៅខែកុម្ភៈ ដល់ខែមីនា ឆ្នាំ ២០២៣ សីតុណ្ហភាពអប្បរមាមធ្យម ២០ អង្សា និងអតិបរមា ៣៣ អង្សា។

ក្រសួងធនធានទឹក ប្រកាសថា ចាប់ពីថ្ងៃទី ៨ ដល់ថ្ងៃទី ១៤ ខែកុម្ភៈ ឆ្នាំ ២០២៣នេះ កម្ពុជាទទួលរងឥទ្ធិពលពីកម្រិតសម្ពាធទាបខ្សោយ ខណៈសីតុណ្ហភាពស្ថិតនៅក្នុងរង្វង់ ២២ ទៅ ៣៣ អង្សា តាមតំបន់មួយចំនួន៕

អត្ថបទ៖ ឡេង ដេត