បាតុភូតភ្លៀង ផ្គរ រន្ទះ ខ្យល់កន្ត្រាក់ផ្ដើមមានឥទ្ធិពលនារដូវប្រាំងឆ្នាំនេះ ដែលធ្វើឱ្យប៉ះពាល់ដល់ផ្ទះសម្បែង និងអាយុជីវិតរបស់ប្រជាពលរដ្ឋមួយចំនួន។

លោក ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយមនៅថ្ងៃទី ៣០ ខែមីនា ឆ្នាំ ២០២៣ បានថ្លែងឱ្យដឹងថា អ្វីដែលប្រជាពលរដ្ឋគួរប្រុងប្រយ័ត្ន នៅពេលនេះគឺទាក់ទងនឹងបាតុភូត ផ្គរ រន្ទះ ខ្យល់កន្ត្រាក់ ដែលវាអាចកើតមានឡើងព្រមគ្នានៅពេលដែលមេឃរកកលភ្លៀង។

លោកថាបញ្ហានេះ យើងអាចការពារបានមួយចំនួនតែនៅទីប្រជុំជន និងទីក្រុងប៉ុណ្ណោះ ដោយមានបំពាក់អង់តែនការពារ ប៉ុន្តែមិនបានគ្របដណ្ដប់ទូរទៅនោះទេ។

​សញ្ញាណមួយចំនួន ​ដែលគេអាចសម្គាល់បានថា ​តើនៅថ្ងៃនេះ តំបន់ដែលយើងកំពុងរស់នៅអាចកើត មានបាតុភូត ផ្គរ រន្ទះ ខ្យល់កន្ត្រាក់ឬទេ?

លក្ខណៈខាងក្រោម៖

ចំណុចទី១ មុននឹងកើតបាតុភូត ផ្គរ រន្ទះ ខ្យល់កន្ត្រាក់ ពីម៉ោង ៩ ទៅម៉ោង ១០ ព្រឹក តំបន់របស់យើង គឺក្ដៅហប់ស្អុះស្អាប់ខុសពីធម្មតា ដែលនេះជាសញ្ញាណ នៃការកើតមានបាតុភូតភ្លៀង ផ្គរ រន្ទះ នាពេលរសៀល។

ទី២ បងប្អូនអាច​សង្កេតមើលផ្ទៃមេឃ ចាប់ពីម៉ោង ៩ ម៉ោង ១០ ទៅជាបណ្ដើរៗគឺក៏កើតនៅលើផ្ទៃមេឃ ដែលយើងកំពុង​រស់នៅ​យើងមើលទៅលើឃើញមានកកើតពពកម្យ៉ាងដែលមានរាងដូចផ្សិត ក្បាលរីកធំដូចផ្សិត ជើងរបស់វាតូច។

បើតាមការឱ្យដឹងពីមន្ត្រីជាន់ខ្ពស់ក្រសួងធនធានទឹក ពីដំបូងពពកនោះ គឺតូចធម្មតា ពណ៌ស ប៉ុន្តែបន្ទាប់មកនៅពេលដែលថ្ងៃកាន់តែខ្ពស់ទៅ ចូលម៉ោង ១២ ក្រោយថ្ងៃត្រង់ទៅ ផ្ទៃពពកកាន់តែរីកធំទៅៗ ហើយប្រែពណ៌ទៅជាខ្មៅបន្តិចម្ដងៗ។

នៅពេលមេឃរកកលភ្លៀង គឺពពកហ្នឹងទាប បានន័យថា វាឆ្អែតដោយទឹក។ នោះហើយជាពពកដែលគ្រោះថ្នាក់ បង្ករឱ្យមានបាតុភូត ផ្គរ រន្ទះ និងខ្យលកន្ត្រាក់ ដែលទាមទារឱ្យយើងម្នាក់ៗរកកន្លែងសុវត្ថិភាពកុំនៅកណ្ដាលវាលជាដើម៕

អត្ថបទ៖ ឡេង ដេត