ព័ត៌មានជាតិ

លោក នេត្រ ភក្ត្រា៖ ឆ្នាំ២០២០បទល្មើសធនធានធម្មជាតិកើនឡើងប្រមាណ៣០ភាគរយ

បានផុស

៥ years មុន

នៅ

ថ្ងៃអង្គារ ១២ មករា ២០២១

ដោយ

លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថានបានថ្លែងឲ្យដឹងនៅរសៀលថ្ងៃទី១២ ខែមករា ឆ្នាំ២០២១នេះថា ការគ្រប់គ្រង និងអភិរក្សតំបន់ការពារធម្មជាតិនៅក្នុងឆ្នាំ២០២០កន្លងមក ជាពិសេសការអនុវត្តច្បាប់ទប់ស្កាត់ និងបង្ក្រាបបទល្មើសធនធានធម្មជាតិ មានកំណើនចំនួន៣៤៤២ករណី ឬកើនឡើងប្រមាណ៣០ភាគរយ តែលោកបានបង្ហាញនូវមោទកភាពចំពោះមន្ត្រីឧទ្យានុរក្ស សមាជិក នៃសហគមន៍តំបន់ការពារធម្មជាតិ និងអង្គការដៃគូទាំងអស់ ដែលបានចូលរួមអនុវត្តច្បាប់ ប្រឆាំងនឹងបទល្មើសក្នុងតំបន់ការពារធម្មជាតិ និងរបៀងអភិរក្សជីវៈចម្រុះទាំង៦៨កន្លែង ដែលស្ថិតនៅក្រោមការការពារ និងអភិរក្សរបស់ក្រសួងបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នេត្រ ភក្ត្រា បានឱ្យដឹងថា ពេញមួយឆ្នាំ២០២០ មន្ត្រីឧទ្យានុរក្សទាំង១២០០នាក់ នៃក្រសួងបរិស្ថានបានចុះល្បាតសរុបចំនួន២៧.៥៨៨ លើក ខណៈនៅការចុះល្បាតនៅឆ្នាំ២០១៩ មានចំនួន២៤.០៤៨ លើក ពោលគឺមានការចុះល្បាតមានការកើនឡើងចំនួន៣.៥៤០ លើក។ ក្នុងការចុះល្បាតនេះ មន្ត្រីឧទ្យានុរក្សដែលជាមន្ត្រីនគរបាលយុត្តិធម៌បានបង្ក្រាបបទល្មើសបានចំនួន៨.៩១៧ ករណី ខណៈឆ្នាំ២០១៩ បង្ក្រាបបានបទល្មើសធនធានធម្មជាតិចំនួន៥.៤៧៥ ករណី គឺមានការកើនឡើងចំនួន៣.៤៤២ ករណី។ លោកបន្តថា បទល្មើសដែលបង្ក្រាបបានភាគច្រើនជាបទល្មើសលួចកាប់ឈើ ការរុករានទន្ទ្រានកាន់កាប់ដីព្រៃខុសច្បាប់ ការបរបាញ់សត្វ និងការដាក់អន្ទាក់ចាប់សត្វ។

លោក នេត្រ ភក្ត្រា បានបញ្ជាក់ថា “ការបង្ក្រាប និងទប់ស្កាត់បទល្មើសមានការកើនឡើង ដែលនេះបង្ហាញពីការអនុវត្តច្បាប់កាន់តែមានប្រសិទ្ធភាព និងបង្ហាញពីការខិតខំរបស់មន្ត្រីឧទ្យានុរក្ស សហគមន៍តំបន់ការពារធម្មជាតិ និងអ្នកពាក់ព័ន្ធដោយមិនខ្លាចនឿយហត់ក្នុងការចុះល្បាតការពារព្រៃឈើនិងជីវៈចម្រុះ”។

លោកបន្តថា នៅឆ្នាំ២០២០ កន្លងទៅ សំណុំរឿងបទល្មើសធនធានធម្មជាតិ ដែលត្រូវបានបញ្ជូនទៅកាន់តុលាការមានចំនួន៦០៥ ករណី ហើយនៅឆ្នាំ២០២០ មានការផាកពិន័យអន្តរការណ៍លើជនប្រព្រឹត្តល្មើសចំនួន៨៥៧ ករណី និងបទល្មើសដែលត្រូវធ្វើការអប់រំនិងធ្វើកិច្ចសន្យាមានចំនួន២៩៤៦ ករណី។ លោកបន្ថែមថា ក្នុងប្រតិបត្តិការចុះល្បាត និងបង្ក្រាបបទល្មើស នៅឆ្នាំ២០២០ មន្ត្រីឧទ្យានុរក្សនៃក្រសួងបរិស្ថានបានរឹបអូសរណាយន្តបានចំនួន៤.០០៤ គ្រឿង គឺមានការកើនឡើងប្រមាណ៥០០ គ្រឿង ខណៈនៅឆ្នាំ២០១៩ រណាយន្តដែលត្រូវបានរឹបអូសមានចំនួន៣.៤៩៤ គ្រឿង។

ចំណែកអន្ទាក់ដែលត្រូវបានដោះបានចេញពីតំបន់ការពារធម្មជាតិឆ្នាំ២០២០ មានចំនួន ៤៣.២៧០អន្ទាក់ គឺមានការកើនឡើងជិត៤០០០អន្ទាក់ ខណៈនៅឆ្នាំ២០១៩ កន្លងទៅ មន្ត្រីឧទ្យានុរក្ស និងសហគមន៍ដោះបានចំនួន៣៩.៣៨២ អន្ទាក់។ នៅឆ្នាំ២០២០កន្លងទៅ រថយន្តចំនួន២១៥ គ្រឿង ដែលប្រព្រឹត្តបទល្មើសត្រូវបានរឹបអូស និងគោយន្តចំនួន៦១១ គ្រឿង ព្រមទាំងម៉ូតូចំនួន៥៩០ គ្រឿងត្រូវបានដកហូតផងដែរ ។ មន្ត្រីឧទ្យានុរក្សក៏បានដកហូតកាំភ្លើងកែច្នៃ ដែលប្រើសម្រាប់បរបាញ់សត្វបានចំនួន៧៣៧ ដើម និងដកហូតឈើបានចំនួន២៧១៨ម៉ែត្រគូប។

លោករដ្ឋលេខាធិការអះអាងថា ជាមួយប្រសិទ្ធភាព នៃការអនុវត្តច្បាប់នេះ បទល្មើសព្រៃឈើខ្នាតធំលែងមានទៀតហើយ គឺនៅមានបទល្មើលព្រៃឈើខ្នាតតូច ដែលមន្ត្រីឧទ្យានុរក្ស នៃក្រសួងបរិស្ថាន និងបន្តសហការជាមួយសហគមន៍តំបន់ការពារធម្មជាតិ និងអង្គការដៃគូបន្តអប់រំផ្សព្វផ្សាយច្បាប់ និងអនុវត្តច្បាប់ដើម្បីទប់ស្កាត់ និងបង្ក្រាបបទល្មើសបន្តទៀត ដើម្បីថែរក្សា និងការពារធនធានធម្មជាតិ ដែលកម្ពុជានៅមាននេះ ឱ្យបានគង់វង្សសម្រាប់មនុស្សរាប់ជំនាន់ទៅមុខទៀត៕

ដោយ ៖ កោះកែវ

Related Topics:

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា