​ពលរដ្ឋហួសចិត្ត​មន្ទីរពេទ្យឯកជនមួយក្នុងក្រុងដូនកែវ​យកតម្លៃតាមមាត់

ជាករណីថ្មីមួយទៀតហើយនៅក្រុងដូនដែវ ដែលគ្លីនិកឯកជនមួយទៀតត្រូវបានប្រជាពលរដ្ឋរិះគន់ទៅលើភាពមិនច្បាស់លាស់នៃតម្លៃសេវាកម្មរបស់ខ្លួន ស្រេចតែការនឹកឃើញ។

យោងតាមការសរសេរបង្ហោះរៀបរាប់ពីម្ចាស់គណនីហ្វេសប៊ុក Tum Samnang ថា «ហួសចិត្តជួយស៊ែផងបងប្អូន ថ្ងៃទី ២៨ ខែមេសា ឆ្នាំ២០២៣ នាងខ្ញុំបានមកពិនិត្យអេកូផ្ទៃពោះ ដោយសារកូនខូច ខ្ញុំក៏សម្អាតនៅពេទ្យខាងក្រោម​(មន្ទីរសំរាកព្យាបាល និងសម្ភព សោ សុខុម) អស់១០០$ លុះដល់ថ្ងៃទី ០២ ខែឧសាភា ខ្ញុំក៏មានអាការៈចុកខ្លាំងក៏មកពេទ្យវិញ ផ្សំថ្នាំយកទៅលេបបានម្តងមិនបាត់ក៏មកទៀត ពេទ្យទារយកថ្នាំវិញ សម្រាកបានមួយយប់ គិតលុយវិក័យប័ត្រចាស់សរសេរថា សំអាតស្បូន 50$ ទាំងដែលខ្ញុំមិនបានធ្វើ ពេលខ្ញុំតវាថា មិនបានធ្វើ ក៏សរសេរវិក័យប័ត្រថ្មីដោយតំឡើងថ្លៃសេរ៉ូម (ពីមុន20$) មក30$ សេរ៉ូមទទេ២កំប្លោក 60$ រីឯថ្លៃបន្ទប់១ថ្ងៃកែមក២ថ្ងៃ 40$ សំខាន់ថ្នាំខ្ញុំអាចាស់ដដែលសរសេរក្នុងបុងគិតលុយម្តងទៀត សូមលោកប្រធានមន្ទីរពេទ្យជួយមើលបុគ្គលិកផងធ្វើត្រូវ រឺខុស? ខ្ញុំទាររកថ្នាំចាស់ខ្ញុំវិញក៏មិនអោយ»។

លោក នុត ស៊ីណាត ប្រធានមន្ទីរសុខាភិបាលខេត្តតាកែវ មិនទាន់ឆ្លើយតបជុំវិញករណីខាងលើនេះនៅឡើយទេ។

ទោះយ៉ាងណា ក្រោយការបង្ហោះបែបនេះ ម្ចាស់គណនីបានបញ្ជាក់ចុងក្រោយថា មន្ទីរពេទ្យបានសុំទោសនាង និងសម្របសម្រួលនាងសម្រេចបញ្ចប់រឿង។

នាងបានសរសេរថា «រឿងដែលពាក់ពន្ធ័ចំពោះខ្ញុំ និងមន្ទីរពេទ្យ ដោយមានការសុំទោស និងដោះស្រាយសម្របសម្រួល​ជូនខ្ញុំឡើងវិញ កំហុសខុសឆ្គងគឺមកពីបុគ្គលិកម្នាក់ ដោយម្ចាស់គ្លីនិចគាត់មិនបានដឹងទេ ដូច្នេះខ្ញុំសូមបញ្ចប់រឿងនេះត្រឹមប៉ុណ្ណឹងចុះ»៕

អត្ថបទ៖ វីរៈ