ព័ត៌មានជាតិ

ភូមិកីឡាចាប់ផ្ដើមលក់ចេញក្រោយចប់ស៊ីហ្គេមក្នុងតម្លៃចាប់ពី ៦ ម៉ឺនដុល្លារ

បានផុស

៣ ខែ មុន

នៅ

ថ្ងៃសុក្រ ៩ មិថុនា ២០២៣

ដោយ

ក្រោយចប់ព្រឹត្តិការណ៍ប្រកួតកីឡាស៊ីហ្គេម និងប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ ភូមិបុរីកីឡា ស្ថិតនៅពហុកីឡដ្ឋានមរតកតេជោចាប់ផ្ដើមលក់ចេញបណ្ដើៗហើយ ក្នុងតម្លៃចាប់ពី ៦ ម៉ឺនដុល្លារឡើងទៅក្នុងមួយយូនីត។

គម្រោងភូមិកីឡដ្ឋានវើលដ៍ប៊្រីដ ដែលមានទីតាំងនៅជាប់នឹងពហុកីឡដ្ឋានជាតិមរតកតេជោ ត្រូវបានអភិវឌ្ឍឡើងដោយក្រុមហ៊ុនវើលដ៍ប៊្រីដ ដើម្បីរួមចំណែកជាមួយរាជរដ្ឋាភិបាលក្នុងការកសាងប្រវត្តិសាស្ត្រក្នុងព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុនវើលដ៍ប៊្រីដគ្រុប បានឱ្យដឹងនៅថ្ងៃទី ០៩ ខែមិថុនា ឆ្នាំ ២០២៣នេះថា អគារខុនដូ និងបុរីភូមិកីឡា បានប្រកាសលក់រួចហើយ ក្នុងនោះមានខុនដូ ៦ អាគារ និងបុរីជិត ៣០០ ផ្ទះ បុរីលក់បានប្រមាណ ៤០ ភាគរយ ខណៈខុនដូលក់ចេញជាង ២០ ភាគរយហើយ។ សម្រាប់លក្ខណ្ឌទិញ-លក់ គឺអាចបង់រំលោះតាមរយៈក្រុមហ៊ុន និងធនាគារ។

គម្រោងបុរី និងខុនដូភូមិកីឡាចំណាយថវិកាប្រមាណជាង ២០០ លានដុល្លារក្នុងនោះ ខុនដូមាន ១២ អគារស្មើងជាង ១៣០០ បន្ទប់មានខុនដូរ ប្រភេទស្ទូឌីយ៉ូ ១អគារ ស្មើនឹង ១៦៣បន្ទប់ ដែលមានកម្ពស់ ១៣ជាន់។

ក្រៅពីនេះ ក៏មានជាប្រភេទផ្ទះល្វែង ផ្ទះអាជីវកម្ម ផ្ទះវីឡា ផ្សារទំនើប សារមន្ទីរ និងកន្លែងហាត់កីឡា ជាដើម។

ភូមិកីឡា ត្រូវបានសម្ពោធ និងដាក់ឱ្យប្រើប្រាស់ជាផ្លូវការកាលពីថ្ងៃទី២០ ខែមេសា ឆ្នាំ២០២៣ ដើម្បីទទួលប្រតិភូកីឡាស៊ីហ្គេម-អាស៊ានប៉ារ៉ាហ្គេម ចាប់ពីដើមខែឧសភា រហូតដល់ថ្ងៃទី៩ ខែមិថុនា ឆ្នាំ ២០២៣៕