ក្រុមហ៊ុន Smart Axiata និងក្រុមហ៊ុននាំមុខចំនួន ៣ រួមគ្នាសម្ពោធសេវាកម្មទិញមុន​ទូទាត់ក្រោយ BNPL ជំរុញហិរញ្ញវត្ថុឌីជីថលនាយុគសម័យថ្មី

ទិដ្ឋភាព​ហិរញ្ញវត្ថុ​នៅ​កម្ពុជា​កាន់តែ​មានការ​ផ្លាស់​ប្តូរ​តាមរយៈ​កិច្ច​សហ​ប្រតិបត្តិការ​ដែល​មិន​ធ្លាប់មាន​ពីមុន​មកពី​សំណាក់ ក្រុមហ៊ុន Smart Axiata ដែលជា​ក្រុមហ៊ុន​ទូរគមនាគមន៍​ឈានមុខ​គេ​ក្នុង​ប្រទេស​កម្ពុជា គ្រឹះស្ថាន​មីក្រូហិរញ្ញវត្ថុ អេ អឹម ខេ ដែលជា​គ្រឹះស្ថាន​ហិរញ្ញវត្ថុ​ជាទី​ទុកចិត្ត Boost ដែលជា​ក្រុមហ៊ុន​បច្ចេកវិទ្យា​ហិរញ្ញវត្ថុ​ពេញលេញ​ក្នុង​តំបន់​របស់​ក្រុមហ៊ុន Axiata មាន​ទីស្នាក់ការ​នៅ​ប្រទេស​ម៉ាឡេស៊ី និង​ក្រុមហ៊ុន Mora ដែលជា​វេទិកា​ឌីជីថល​ឈានមុខ​គេ​។ ភាពជា​ដៃគូ​នេះ នាំមក​ជូន​នូវ​សេវាកម្ម ទិញ​មុន​ទូទាត់​ក្រោយ “Buy Now, Pay Later” (BNPL) ដោយ​ផ្តល់ជូន​អតិថិជន​នូវ​បទពិសោធន៍​ឌីជីថល​ពេញលេញ ដែល​គ្មាន​ភាពរអាក់រអួល និង​មិនអាច​ប្រៀបផ្ទឹម​បាន​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណុច​ពិសេស​នៃ​កិច្ចសហការ​មួយ​នេះ​គឺ ការបូកបញ្ចូល​នូវ​ចំណុចខ្លាំង​នៃ​ទូរគមនាគមន៍ បច្ចេកវិទ្យា​ហិរញ្ញវត្ថុ ធនាគារ និង​បច្ចេកវិទ្យា​ឌីជីថល ក្នុងការ​សម្រួល​ឲ្យ​អតិថិជន​ទទួលបាន និង​អាច​ប្រើប្រាស់​ឥណទាន​។ សេវាកម្ម BNPL បានបង្ហាញ​នូវ​ភាព​ដ៏​អស្ចារ្យ​ក្នុងការ​បង្កើន​សេរីភាព​ហិរញ្ញវត្ថុ និង​បទពិសោធន៍​ទិញ​ទំនិញ​របស់​អតិថិជន​។

​អ្វីដែល​សេវាកម្ម​នេះ​ខុសប្លែក​ពី​សេវាកម្ម BNPL ដទៃ​នោះ​គឺ​វត្តមាន​របស់ Mora ដែលជា​វេទិកា​ឌីជីថល​។ វេទិកា​ប្រកបដោយ​ភាព​ច្នៃប្រឌិត​មួយ​នេះ អាច​ឲ្យ​អតិថិជន​ធ្វើការ​ស្នើសុំ​ឥណទាន​តាមបែប​ឌីជីថល​ពេញលេញ តាំងពី​ពេល​ចាប់ផ្តើម ការអនុម័ត​ឥណទាន ការទិញ​ទំនិញ រហូតដល់​ការទូទាត់​ចេញ​។ ជាមួយនឹង​បទពិសោធន៍​ដែល​ងាយស្រួល និង​គ្មាន​ភាព​រអាក់រអួល អតិថិជន​អាច​ទទួលបាន​នូវ​ឥណទាន និង​អាច​ទិញ​ផលិតផល​យ៉ាង​ងាយស្រួល​ពី​ជម្រើស​ពាណិជ្ជករ​ជាច្រើន ដែល​ក្នុងនោះ​រួមមាន Smart ផងដែរ​។ អតិថិជន​ដែលមាន​ចំណាប់អារម្មណ៍​ក្នុងការ​ប្រើប្រាស់​សេវាកម្ម​នេះ​អាច​ទាញយក​កម្មវិធី Mora BNPL ដោយ​គ្រាន់តែ​ផ្តល់ព័ត៌មាន​ចាំបាច់​ដើម្បី​ស្នើសុំ​ឥណទាន​។ បន្ទាប់ពី​បំពេញ​នូវ​ព័ត៌មាន​ដែល​ចាំបាច់ អតិថិជន​អាច​បញ្ជាក់​ពី​ការយល់ព្រម​ឲ្យ​ក្រុមហ៊ុន​ប្រើប្រាស់​ព័ត៌មាន​របស់​ពួកគេ និង​រង់ចាំ រយៈពេល​ត្រឹមតែ ៣ ថ្ងៃ (​ថ្ងៃ​ធ្វើការ​) សម្រាប់​ការ​អនុម័ត​ឥណទាន​របស់​ពួកគេ​ជាការ​ស្រេច​។ នៅពេល​ទទួល​បានការ​បញ្ជាក់​ពី​ការអនុម័ត​ឥណទាន អតិថិជន​អាច​ប្រើប្រាស់​ឥណទាន​នោះ​ដោយ​សេរី ដើម្បី​ធ្វើ​ការទិញ​ពី​ពាណិជ្ជករ​ដៃគូ​ជាច្រើន​របស់ Mora តាម​ចំណង់​ចំណូលចិត្ត​របស់​ពួកគេ​។

ក្រុមហ៊ុន Smart ក្នុងនាម​ជា​ពាណិជ្ជករ​មួយ​នៅលើ​កម្មវិធី Mora ផ្តល់ជូន​នូវ​ផលិតផល​ជាច្រើន​ប្រភេទ ដើម្បី​បំពេញតម្រូវការ​ចម្រុះ​របស់​អតិថិជន​។ ជាមួយនឹង​ឥណទាន​ដែល​បានអនុម័ត​របស់​ពួកគេ អតិថិជន​អាច​ចូល​ទិញ​ទំនិញ​ជាច្រើន​ពី Smart រួមមាន ឧបករណ៍​ថ្មីៗ​ដែល​ភ្ជាប់​ឬ​មិន​ភ្ជាប់​ជាមួយ​គម្រោង​កញ្ចប់​ប្រចាំឆ្នាំ គ្រឿងបន្លាស់ ឧបករណ៍ IoT និង​ជម្រើស​ក្នុងការ​ជាវ​គម្រោង Fiber+ រយៈពេល​វែង​។ សេវាកម្ម​នេះ​ផ្តល់ឱ្យ​អតិថិជន Smart នូវ​ភាពបត់បែន និង​ងាយស្រួល​ជាងគេ ក្នុងការ​គ្រប់គ្រង​ហិរញ្ញវត្ថុ​របស់​ពួកគេ​ខណៈពេលដែល​អាច​ទទួល​បាន​អត្ថប្រយោជន៍ និង​ការ​សន្សំសំចៃ​ដែល​ទាក់ទង​នឹង​ការទិញ​របស់​ពួកគេ​ពី​ហាង Smart ។ ហើយ​នេះ​គ្រាន់តែ​ជាការ​ចាប់ផ្តើម​ប៉ុណ្ណោះ ដោយសារ​គំរូ​នៃ​កិច្ចសហការ​នេះ​ត្រូវបាន​រចនា​ឡើង​ដើម្បី​អនុញ្ញាតឱ្យ​ដៃគូ​កាន់តែច្រើន​ពី​ប្រព័ន្ធ​អេកូ​ហិរញ្ញវត្ថុ​ចូលរួម ដើម្បី​បម្រើ​អតិថិជន​បាន​កាន់តែ​ប្រសើរ​។

​សម្រាប់​ក្រុមហ៊ុន Boost ដែលជា​អ្នកដឹកនាំ​ផ្នែក​ឧបករណ៍​បច្ចេកវិទ្យា​ហិរញ្ញវត្ថុ​ប្រចាំ​តំបន់ មាន​មោទនភាព​យ៉ាងខ្លាំង​ក្នុងការ​ជំរុញ​ការដាក់បញ្ចូល​ហិរញ្ញវត្ថុ​តាមរយៈ​ប្រព័ន្ធ​បច្ចេកវិទ្យា​អេកូឡូស៊ី​ហិរញ្ញវត្ថុ​ដែល​មិន​ធ្លាប់មាន​។ តាមរយៈ​ភាពជា​ដៃគូ​នេះ ក្រុមហ៊ុន​បច្ចេកវិទ្យា​ហិរញ្ញវត្ថុ​នឹង​អាច​ផ្តល់នូវ​ពិន្ទុ​ឥណទាន​ដែល​អាច​ទុកចិត្តបាន ដំណើរការ​ដោយ​អាល់​ហ្គោ​រី​ឌិ​ម ជា​រូ​ម​មន្ត​សម្រួល​ដល់​ការផ្តល់​ហិរញ្ញប្បទាន​ប្រកបដោយ​ការទទួលខុសត្រូវ ជូន​ដល់​អតិថិជន​របស់​ក្រុមហ៊ុន Smart​។ តាមរយៈ​ការគាំទ្រ​ផ្នែក​ហិរញ្ញវត្ថុ​ដ៏​រឹងមាំ​របស់​គ្រឹះស្ថាន​មីក្រូហិរញ្ញវត្ថុ អេ អឹម ខេ អតិថិជន​អាច​ស្វែងរក​ប្រភព​ឥណទាន​ដែលមាន​សុវត្ថិភាព និង​អាច​ទុកចិត្តបាន​សម្រាប់​តម្រូវ​ការទិញ​ទំនិញ​របស់​ពួកគេ​។

Mila KUSHEVA, CMO នៅ​ក្រុមហ៊ុន Smart បាន​មានប្រសាសន៍ថា “​យើង​មាន​សេចក្តីរំភើប​រីករាយ​ណាស់​ក្នុង​ការប្រកាស​ពី​ការចាប់ផ្តើម​សម្ពោធ​នូវ​សេវាកម្ម BNPL ដែល​ប្រកបដោយ​ភាព​ច្នៃប្រឌិត និង​តំណាងឱ្យ​អនាគត​នៃ​ហិរញ្ញវត្ថុ​ឌីជីថល​” ។ “​តាមរយៈ​កិច្ចសហការ​របស់​យើង​ជាមួយ​គ្រឹះស្ថាន​មីក្រូហិរញ្ញវត្ថុ អេ អឹម ខេ ក្រុមហ៊ុន Boost និង​ក្រុមហ៊ុន Mora យើង​បាន​បង្កើត​ដោយ​ជោគជ័យ​នូវ​ដំណោះស្រាយ BNPL ដែល​គ្មាន​ភាពរអាក់រអួល ចាប់ពី​ពេល​ចាប់ផ្តើម​ដល់​ចុងបញ្ចប់ ដែល​បង្កើន​ភាពងាយស្រួល និង​ផ្តល់​លទ្ធភាព​កាន់តែ​ប្រសើរឡើង និង​ទូលំទូលាយ​ជាង​មុន​ដល់​អតិថិជន ក្នុង​ង​ការទទួលបាន​ហិរញ្ញវត្ថុ​សម្រាប់​ការប្រើប្រាស់ និង​គាំទ្រ​ដល់​កំណើនសេដ្ឋកិច្ច​”​។​

​ចាប់ពី​ថ្ងៃទី ០៦ ខែវិច្ឆិកា​ឆ្នាំ ២០២៣​នេះ តទៅ អតិថិជន​នឹង​អាច​ចូល​ប្រើ BNPL តាមរយៈ​វេទិកា Mora BNPL​។ កិច្ចខិតខំ​ប្រឹងប្រែង​រួមគ្នា​រវាង​ក្រុមហ៊ុន​ដែល​នាំមុខគេ​ទាំង​៤​នេះ បង្ហាញ​ពី​សក្តានុពល​ដ៏​ធំធេង​នៃ​ការបង្កើត​ថ្មី និង​ភាពជា​ដៃគូ​យុទ្ធសាស្ត្រ​ក្នុងការ​រៀបចំ​អនាគត​នៃ​សេវាកម្ម​ហិរញ្ញវត្ថុ​នៅ​កម្ពុជា​៕