មន្រ្តីពន្ធដារ បង្ហាញពីការគណនាពន្ធប្រថាប់ត្រា លើការផ្ទេរអចលនទ្រព្យ និងចលនទ្រព្យ

ពន្ធប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ គឺជាពន្ធដែលត្រូវបង់នៅពេលមានការទិញ លក់ ដោះដូរ ធ្វើអំណោយ អចលនទ្រព្យ ឬការដាក់ភាគហ៊ុនជាអចលនទ្រព្យក្នុងក្រុមហ៊ុន ជាដើម។

យោងតាមអគ្គនាយកដ្ឋានដារ បានឱ្យដឹងអំពីអត្រាពន្ធមូលដ្ឋានគិតពន្ធ និងការគណនាការប្រាក់ពន្ធ ត្រូវបានកំណត់ តាមអត្រា ៤% នៃមូលដ្ឋានគិតពន្ធ។ មូលដ្ឋានគិតពន្ធ គឺជាតម្លៃអចលនទ្រព្យសរុប (ដី ឬ/និងសំណង់) ដែលត្រូវបាន កំណត់តាមលំដាប់អាទិភាពដូចជា៖ តម្លៃអចលនទ្រព្យដែលត្រូវបានកំណត់ក្នុងឧបសម្ព័ន្ធរបស់ក្រសួងសេដ្ឋកិច្ច និង ហិរញ្ញវត្ថុ និងតម្លៃអចលនទ្រព្យ ដែលត្រូវបានកំណត់ក្នុងកិច្ចសន្យាផ្ទេរកម្មសិទ្ធិ សិទ្ធិកាន់កាប់ ឬលិខិតគតិយុត្តផ្សេង ទៀត។

សម្រាប់រូបមន្តនៃការគណនាក្នុងករណីមានការអនុគ្រោះពន្ធ៖ មូលដ្ឋានគិតពន្ធ = តម្លៃអចលនទ្រព្យសរុប – ការអនុគ្រោះពន្ធ។

ការគណនាប្រាក់ពន្ធត្រូវបង់៖ ប្រាក់ពន្ធត្រូវបង់ = មូលដ្ឋានគិតពន្ធ x ៤%

ថ្លែងនៅក្នុងកម្មវិធី «ពន្ធដារកម្ពុជា» ស្តីពីពន្ធប្រថាប់ត្រាលើការផ្ទេរអចលនទ្រព្យ និងចលនទ្រព្យ  លោក ង៉ែត លាភ អនុប្រធាននាយកដ្ឋានចលនទ្រព្យ និងអចលនទ្រព្យនៃអគ្គនាយកដ្ឋានពន្ធដារ បានលើកជាឧទាហរណ៍ ដើម្បីមកបញ្ជាក់ បន្ថែមថា ករណីផ្ទេរកម្មសិទ្ធិផ្ទះល្វែងដែលមានដីទំហំ ១០០ ម^២ និងមានសំណង់ឥដ្ឋបេតុងជាន់ផ្ទាល់ដី និងជាន់ទី ១ ស្មើនឹង៦៤ ម^២ (E%=E₁=64 ម²) ដែលមានអាយុកាលសំណង់ក្រោម ១០ ឆ្នាំ ស្ថិតនៅលើកំណាត់ផ្លូវវត្តអង្គតាម៉ិញ ចាប់ពីផ្លូវសហព័ន្ធរុស្ស៊ី (១១០) ដល់ផ្លូវលេខ ២០០៤ និងមានតម្លៃសម្រាប់មូលដ្ឋានគិតពន្ធប្រថាប់ត្រា តាមឧបសម្ព័ន្ធ របស់ក្រសួងសេដ្ឋកិច្ចនិងហិរញ្ញវត្ថុ រួមមាន៖ តម្លៃដី = ៣០០ ដុល្លារ/ម^២, តម្លៃផ្ទះជាន់ផ្ទាល់ដី (E₀ ) = ២៥០ ដុល្លារ/ម^២, តម្លៃផ្ទះជាន់ទី១ (E₁) = ២០០ ដុល្លារ/ម^២។

សម្រាប់លទ្ធិផលទទួលបានពីការគណនាប្រាក់ពន្ធត្រូវបង់មានដូចខាងក្រោម៖

តម្លៃដី៖ ១០០ម^២ x ៣០០$ = ៣០ ០០០$

តម្លៃផ្ទះជាន់ផ្ទាល់ដី (E_០)៖ ៦៤^២ x ២៥០$ = ១៦ ០០០$

តម្លៃផ្ទះជាន់ទី១ (E₁)៖ ៦៤ម^២ x ២០០$ = ១២ ៨០០$

មូលដ្ឋានគិតពន្ធ (តម្លៃអចលនទ្រព្យសរុប) = ៥៨ ៨០០$

មូលដ្ឋានគិតពន្ធ (គិតជារៀល)៖ ៥៨ ៨០០$ x ៤ ០០០៛ = ២៣៥ ២០០ ០០០៛

ប្រាក់ពន្ធត្រូវបង់៖ ២៣៥ ២០០ ០០០៛ x ៤% = ៩ ៤០៨ ០០០៛

សូមបញ្ជាក់ថា​ ការលើកលែងពន្ធ និងអនុគ្រោះពន្ធ សំដៅទៅដល់ការទទួលកម្មសិទ្ធិ ឬសិទ្ធិកាន់កាប់ដីក្នុងលក្ខណៈ សម្បទានពីរាជរដ្ឋាភិបាលសម្រាប់ជាប្រយោជន៍ សេដ្ឋកិច្ច ឬសង្គមកិច្ច។ ម្យ៉ាងទៀត ការទទួលកម្មសិទ្ធិ ឬសិទ្ធិកាន់កាប់ អចលនទ្រព្យ ដែលចុះបញ្ជីសារពើភណ្ឌរបស់ស្ថាប័នរដ្ឋ, ការទទួលកម្មសិទ្ធិ ឬសិទ្ធិកាន់កាប់អចលនទ្រព្យ របស់បេសក កម្មការទូត ឬកុងស៊ុលបរទេស ឬអង្គការ អន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រាជរដ្ឋភិបាលនានា និងការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យក្នុងរង្វង់ញាតិ៕

អត្ថបទ៖ ផល ធារិត