មេធាវី​ស្ម័គ្រចិត្ត​សម្តេច​តេ​ជោ​សែន នឹង​សហការ​ជាមួយ​ព្រឹទ្ធសភា ដើម្បី​ជួយ​ប្រជាពលរដ្ឋ​ទន់ខ្សោយ
Connect with us
Helistar Cambodia - Helicopter Charter Services

ព័ត៌មានជាតិ

មេធាវី​ស្ម័គ្រចិត្ត​សម្តេច​តេ​ជោ​សែន នឹង​សហការ​ជាមួយ​ព្រឹទ្ធសភា ដើម្បី​ជួយ​ប្រជាពលរដ្ឋ​ទន់ខ្សោយ

Published

on

ភ្នំពេញ ៖ មេធាវី​ស្ម័គ្រចិត្ត​សម្តេច​តេ​ជោ​សែន នឹង​សហការ​ជាមួយ​គណៈកម្មការ​សិទ្ធិមនុស្ស ទទួល​ពាក្យ​បណ្តឹង និង​អង្កេត​នៃ​ព្រឹទ្ធសភា ដើម្បី​ជួយ​ប្រជាពលរដ្ឋ​ទន់ខ្សោយ​ដែល​ត្រូវ​អ្នក​មាន​អំណាច មាន​លុយ​រំលោភបំពាន​សិទ្ធិ ដោយ​មិន​គិត​កំរៃ​។

នេះ​បើ​តាម​ប្រសាសន៍​បញ្ជាក់​របស់​ឯក​ឧ​ត្ត​ម គី តិច ប្រធាន​ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន នៅក្នុង​ពិធី​ចុះ​អនុស្សរណៈ​យោគយល់​គ្នា រវាង​គណៈកម្មការ​ទី​១ នៃ​ព្រឹទ្ធសភា គឺ​គណៈកម្មការ​សិទ្ធិមនុស្ស ទទួល​ពាក្យ​បណ្តឹង និង​អង្កេត​នៃ​ព្រឹទ្ធសភា ព្រឹក​ថ្ងៃទី​១៥ ខែកុម្ភៈ​នេះ នៅ​វិមាន​ព្រឹទ្ធសភា ដែល​ពិធី​ចុះ​អនុស្សរណៈ​នេះ បាន​ប្រព្រឹត្តទៅ​ក្រោម​អធិបតីភាព​ដ៏​ខ្ពង់ខ្ពស់​ឯកឧត្តម​កិត្តិ​សង្គហ​បណ្ឌិត ទេព ង​ន អនុប្រធាន​ទី​២​ព្រឹទ្ធសភា និង​ដោយមាន​ការអញ្ជើញ​ចូលរួម​ពី​សមាជិក សមាជិកា​ក្រុម​មេធាវី​ស្ម័គ្រចិត្ត​សម្តេច​តេ​ជោ​សែន សមាជិក សមាជិកា​ព្រឹទ្ធសភា និង​មន្ត្រីរាជការ​នៃ​អគ្គលេខាធិការដ្ឋាន​ព្រឹទ្ធសភា​ជាច្រើន​ទៀត​។

ឯកឧត្តម គី តិច ប្រធាន​ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន​បាន​លើក​ឡើង​ថា ជា​រួម​ក្រោយពី​បាន​ស្វែងយល់ និង​ជួប​ពិភាក្សា​គ្នា​ជា​បន្តបន្ទាប់ ជាមួយ​ឯកឧត្តម​ប្រធាន​គណៈកម្មការ​ទី​១ នៃ​ព្រឹទ្ធសភា គឺ​ឯកឧត្តម យ៉ង់ ស៊ែម យើង​បាន​មើលឃើញ​តួនាទី​រវាង​អង្គភាព​យើង​ទាំងពីរ មាន​គោលដៅ​រួម ដើម្បី​ជួយ​ដោះស្រាយ​ជួយ​ជូន​ប្រជាពលរដ្ឋ​។ ឯកឧត្តម គី តិច បន្តថា គណៈកម្មការ​ទី​១ ព្រឹទ្ធសភា តែងតែ​ទទួល​នូវ​សំណូមពរ ក៏ដូចជា​ពាក្យបណ្តឹង​របស់​ប្រជាពលរដ្ឋ​បី​មូលដ្ឋាន​។ ជាពិសេស គឺ​ក្រុម​ស្ត្រី​ដែលមាន​ភាពទន់ខ្សោយ​ងាយ​រងគ្រោះ ដែល​ខ្វះ​លទ្ធភាព​មិនអាច​ទៅរក​មេធាវី​ការពារ​ក្តី ការពារ​សិទ្ធិ​។ ថ្ងៃនេះ​យើង​បាន​ឈានដល់​ការចុះហត្ថលេខា​លើ​អនុស្សរណៈ​យោគយល់​គ្នា ជាមួយ​គណៈកម្មការ​ទី​១ នៃ​ព្រឹទ្ធសភា ដើម្បី​សហការ​ជួយ​កិច្ចការ​បម្រើ​ប្រជាពលរដ្ឋ ដើម្បី​ស្វែងរក​យុត្តិធម៌​ជូន​ប្រជាពលរដ្ឋនៅក្នុង​ប្រទេស​កម្ពុជា​។

ឯកឧត្តម យ៉ង់ សែម ប្រធាន​គណៈកម្មការ​ទី​១ ព្រឹទ្ធសភា បាន​មានប្រសាសន៍​បញ្ជាក់​ដែរ​ថា ព្រឹទ្ធសភា​បានធ្វើ​ការងារ​របស់​ខ្លួន​នៅ​តាម​ភូមិភាគ​ទាំង ៨ ក្នុង​ទូទាំង​ប្រទេស តាមរយៈ​ការជួបពិភាក្សា​ការងារ​ជាមួយ​សមាជិក​ក្រុម​ប្រឹក្សាឃុំ​-​សង្កាត់​។ គណៈកម្មការ​សិទ្ធិមនុស្ស ទទួល​ពាក្យបណ្តឹង និង​អង្កេត​នៃ​ព្រឹទ្ធសភា​តែងតែ​ទទួលបាន​នូវ​សំណូមពរ​ពី​ប្រជាពលរដ្ឋ​អំពី​ករណី​រំលោភសិទ្ធិ​ពី​អ្នក​មាន​អំណាច មាន​លុយ​ជា​បន្តបន្ទាប់ ដើម្បី​ពាំនាំ​ជូន​ថ្នាក់លើ​ជួយ​ដោះស្រាយ​។ ឯកឧត្តម​ប្រធាន​គណៈកម្មការ​ទី​១ ព្រឹទ្ធសភា បន្តទៀតថា ថ្ងៃនេះ​លោក​មានការ​រីករាយ​ណាស់ ដោយ​យើង​បាន​ចុះហត្ថលេខា​លើ​អនុស្សរណៈ​យោគយល់​គ្នា ជាមួយ​ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន ក្នុង​គោលបំណង និង​ទិសដៅ​រួម​តែមួយ គឺ​ដើម្បី​អនុវត្ត​ច្បាប់ ការពារ​សិទ្ធិ និង​ផលប្រយោជន៍​ជូន​ពលរដ្ឋ​កម្ពុជា​។ ដូច្នេះ​ការងារ​នេះ​យើង​នឹង​នាំយក​ព័ត៌មាន​ដែល​យើង​ទទួល​បាន​នៅថ្ងៃនេះ ដើម្បី​ទៅ​ផ្សព្វផ្សាយ​ជូន​ប្រជាពលរដ្ឋ ជាពិសេស​ជូន​ក្រុម​ប្រឹក្សាឃុំ​-​សង្កាត់ និង​មេភូមិ ដែល​ធ្វើការ​ជាមួយ​ប្រជាពលរដ្ឋ​ផ្ទាល់​ជួយ​ផ្សព្វផ្សាយ​ដល់​ប្រជាពលរដ្ឋ​បាន​យល់ ហើយ​នៅពេលណា​ដែល​មាន​បញ្ហា​កើតឡើង​ត្រូវ​បាន​គេ​រំលោភ ខ្វះខាត​លទ្ធភាព​នឹង​តស៊ូ​តាមផ្លូវ​ច្បាប់ យើង​នឹង​នាំយក​ព័ត៌មាន​ទាំង​នោះមក​ទាក់ទង​ក្រុម​មេធាវី​ស្ម័គ្រចិត្ត​សម្តេច​តេ​ជោ​សែន​ដើម្បី​ជួយ ដូចដែល​ប្រសា​ស​ន៍​របស់​ឯកឧត្តម គី តិច បានលើកឡើង​មុននេះ​ថា ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន​របស់លោក​នឹង​សហការ​ជួយ​កិច្ចការ​បម្រើ​ប្រជាពលរដ្ឋ ដើម្បី​ស្វែងរក​យុត្តិធម៌​ជូន​ប្រជាពលរដ្ឋនៅក្នុង​ប្រទេស​កម្ពុជា ដែល​មាន​ជីវភាព​ទន់ខ្សោយ​ងាយ​រងគ្រោះ ជា​ស្ត្រី​ដោយ​មិនមាន​យកលុយ​យក​កាក់​។

បើ​តាម​ការ​បញ្ជាក់​ពី​ឯកឧត្តម គី តិច ប្រធាន​ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន​បាន​ឲ្យ​ដឹង​ថា កន្លងមក​ក្រុម​មេធាវី​ស្ម័គ្រចិត្ត​សម្ត​ច​តេ​ជោ​សែន​របស់​លោក បាន​ជួយ​ដោះស្រាយ​បណ្តឹង​ជូន​ប្រជាពលរដ្ឋ​ទន់ខ្សោយ​បានជា​ច្រើន​ករណី​មក​ហើយ ដោយ​មិន​យក​លុយ​យក​កាក់​អី​ទេ ក្នុង​នោះ​ភាគច្រើន​ក្នុង​ជម្លោះ​ដី​ធី​ដែល​ត្រូវ​អ្នក​មាន​អំណាច អ្នកមាន​លុយ​រំលោភបំពាន​ប្រជាពលរដ្ឋ​ទន់ខ្សោយ​៕

ដោយ ៖ ប៉ាល់​សុង

India in Cambodia (Embassy of India, Phnom Penh)
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services