នាយកប្រចាំតំបន់អង្គការស្បៀងអាហារពិភព លោក ប្តេជ្ញាពង្រឹងកិច្ចសហការជាមួយកម្ពុជា ដើម្បីធានាប្រព័ន្ធស្បៀង

ក្នុងជំនួបជាមួយមន្ត្រីជាន់ខ្ពស់រាជរដ្ឋាភិបាលកម្ពុជា, នាយកប្រចាំតំបន់អង្គការកម្មវិធីស្បៀងអាហារពិភពលោក បាន ប្តេជ្ញាបន្តពង្រឹងកិច្ចសហប្រតិបត្តិការរវាងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទរបស់កម្ពុជា និងអង្គការកម្មវិធីស្បៀងអាហារពិភពលោកឱ្យកាន់តែស៊ីជម្រៅថែមទៀត សំដៅធានាប្រព័ន្ធស្បៀងប្រកបដោយចីរភាព។

ជំនួបពិភាក្សាការងារជាមួយលោក អ៊ុក រ៉ាប៊ុន ទេសរដ្ឋមន្ត្រី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នាថ្ងៃទី៣១ ខែមករា ឆ្នាំ២០២៤ នៅទីស្ដីការគណៈរដ្ឋមន្ត្រី លោក John Aylieff នាយកប្រចាំតំបន់អាស៊ី និងប៉ាស៊ីហ្វិក នៃអង្គការកម្មវិធីស្បៀងអាហារពិភពលោក វាយតម្លៃខ្ពស់ចំពោះការដឹកនាំ និងការសម្របសម្រួលកិច្ចការក្នុងវិស័យសន្តិសុខស្បៀង និងអាហារូបត្ថម្ភ របស់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ។

លោកនាយកប្រចាំតំបន់ បានលើកឡើងថា ការងារសន្តិសុខស្បៀង និងអាហារូបត្ថម្ភនេះ ជាការងារអន្តរវិស័យមានភាពស្មុគស្មាញដែលទាមទារការដឹកនាំដ៏ប៉ិនប្រសប់ដូចដែលក្រុមប្រឹក្សា បានធ្វើកន្លងមក ក្នុងការប្រមូលនូវគ្រប់តួអង្គពាក់ព័ន្ធទាំងអស់ ដើម្បីសម្រេចឱ្យបាននូវគោលដៅរួមមួយ ស្របតាមយុទ្ធសាស្រ្តជាតិ និងគោលដៅអភិវឌ្ឍន៍ប្រកបដោយចីរភាព។  

លោកទេសរដ្ឋមន្ត្រី អ៊ុក រ៉ាប៊ុន បានគូសបញ្ជាក់ពីកិច្ចសហប្រតិបត្តិការដ៏យូរលង់រវាងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទរបស់កម្ពុជា និងអង្គការកម្មវិធីស្បៀងអាហារពិភពលោក ដែលបានផ្តល់នូវអត្ថប្រយោជន៍យ៉ាងច្រើនដល់ប្រជាជនកម្ពុជា។ លោកទេសរដ្ឋមន្ត្រី បានលើកឡើងនូវតួនាទីដ៏មានសារសំខាន់របស់អង្គការកម្មវិធីស្បៀងអាហារពិភពលោក ក្នុងចលនាបង្កើនអាហារូបត្ថម្ភ និងការបង្កើតឱ្យមានបណ្តាញធុរកិច្ចសម្រាប់ចលនាបង្កើនអាហារូបត្ថម្ភនេះ។

លោក បានវាយតម្លៃខ្ពស់ចំពោះការចូលរួមចំណែករបស់អង្គការស្បៀងអាហារពិភពលោក ក្នុងការងារស្រាវជ្រាវ និងវិភាគ ដែលនេះពិតជាមានសារៈសំខាន់ណាស់សម្រាប់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្នុងការធ្វើ សេចក្តីសម្រេចចិត្តផ្សេងៗ ការចូលរួមកិច្ចសន្ទនាសកលស្តីពីប្រព័ន្ធស្បៀង និងអាហារូបត្ថម្ភ ក្នុងបរិបទការប្រែប្រួលអាកាសធាតុ និងការតាក់តែងនូវផែនទីបង្ហាញផ្លូវសម្រាប់ប្រព័ន្ធស្បៀងប្រកបដោយចីរភាព។

ស្ថិតក្នុងឱកាសនោះ លោកទេសរដ្ឋមន្ត្រី អ៊ុក រ៉ាប៊ុន ក៏បានស្នើសុំឱ្យអង្គការស្បៀងអាហារពិភពលោក បន្តគាំទ្រដំណើរការតាក់តែងយុទ្ធសាស្រ្តជាតិលើកទី៣ ស្តីពីសន្តិសុខស្បៀង និងអាហារូបត្ថម្ភ ព្រមទាំងការធ្វើនូវគ្រោងចំណាយសម្រាប់អនុវត្តយុទ្ធសាស្រ្តជាតិនេះ។ ជាកិច្ចឆ្លើយតប លោក John Aylieff បានឯកភាពចំពោះសំណើនេះ ហើយប្តេជ្ញានឹងពង្រឹងនូវកិច្ចសហប្រតិបត្តិការរវាងស្ថាប័នទាំងពីរឱ្យកាន់តែស៊ីជម្រៅបន្ថែមទៀត៕