ពលរដ្ឋសាទរក្រោយអាជ្ញាធរជួសជុលស្ថាបនាផ្លូវ៣០ម៉ែត្រជាផ្លូវបេតុងសរសៃដែក

ប្រជាពលរដ្ឋអ្នកធ្វើដំណើរឆ្លងកាត់ផ្លូវ៣០ម៉ែត្រ ពីវត្តចាក់អង្រែក្រោម ទៅផ្លូវ៦០ម៉ែត្រ ក្នុងមូលដ្ឋានសង្កាត់ចាក់អង្រែក្រោម ខណ្ឌមានជ័យ បានបញ្ចេញមតិសាទរក្រោយអាជ្ញាធរជួសជុលស្ថាបនាជាផ្លូវបេតុងសរសៃដែកសម្រួលដល់ការធ្វើដំណើរ ខណៈកន្លងមកខូចខាតពិបាកធ្វើដំណើរខ្លាំង។

លោក រចនា ជាអ្នកដំណើរឆ្លងកាត់ផ្លូវ៣០ម៉ែត្រ បានបង្ហាញអារម្មណ៍រីករាយក្រោយអាជ្ញាធរពាក់ព័ន្ធប្រែក្លាយកំណាត់ផ្លូវនេះ អោយកាន់តែធំទូលាយងាយស្រួលដល់អ្នកធ្វើដំណើរ ព្រោះកន្លងមកមានជង្ហុកសំបុកមាន់ជាច្រើនថែមទាំងដក់ទឹកធ្វើឲ្យលំបាកក្នុងការធ្វើដំណើរ។

លោក ជា សុខៃ ចៅសង្កាត់ចាក់អង្រែក្រោម បានឲ្យដឹងថា កំណាត់ផ្លូវ៣០ម៉ែត្រនេះ ត្រូវបានមន្ទីរសាធារណៈការនិងដឹកជញ្ជូនរាជធានីភ្នំពេញ ស្ថាបនាជាប្រភេទផ្លូវបេតុងមានសរសៃដែក មានប្រវែងជាង៣៥០ម៉ែត្រ ទទឹង៣០ម៉ែត្រ កម្រាស់​២តឹក ចាប់ពីកែងផ្លូវជាតិលេខ២ រហូតដល់ផ្លូវបត់ចូលផ្សារចាក់អង្រែ ដើម្បីសម្រួលការលំបាកធ្វើដំណើរជូនដល់ពលរដ្ឋ។

អ្នកធ្វើដំណើរឆ្លងតាមកំណាត់ផ្លូវនេះ មានក្ដីសប្បាយរីករាយ និងថ្លែងអំណរអរគុណដល់អាជ្ញាធរមូលដ្ឋាន ក៏ដូចជាអាជ្ញាធរជំនាញ ដោះស្រាយការលំបាករបស់ប្រជាពលរដ្ឋ ប្រែក្លាយកំណាត់ផ្លូវ៣០ម៉ែត្រនេះជាផ្លូវបេតុង ជូនដល់ប្រជាពលរដ្ឋ និងអ្នកធ្វើដំណើរងាយស្រួលក្នុងការធ្វើដំណើរ៕

អត្ថបទ៖ រដ្ឋា