ព័ត៌មានជាតិ

អ្នកជំនាញអះអាងថា តម្លៃដំឡូងមីនៅឆ្នាំនេះខ្ពស់ជាងឆ្នាំមុន

បានផុស

៤ years មុន

នៅ

ថ្ងៃសៅរ៍ ៦ មីនា ២០២១

ដោយ

ប្រធានសម្ព័ន្ធសមាគមដំឡូងមីខេត្តបាត់ដំបង លោក នី កាន បានឲ្យដឹងថា តម្លៃដំឡូងមីនៅឆ្នាំនេះមានទីផ្សារល្អ និងមានតម្លៃខ្ពស់ជាងឆ្នាំមុន។

លោកបានបន្តថា ជាក់ស្តែងការនាំចេញដំឡូងមីក្រៀមក្នុងខេត្តបាត់ដំបង មានប្រមាណជាង ៣០ម៉ឺនតោន ដោយក្នុងមួយគីឡូក្រាមទទួលបានជិត ៦បាតស្មើជិត៨០០រៀលខណៈឆ្នាំមុនមានតម្លៃត្រឹមតែ៦៥០ទៅ៦៧០រៀលប៉ុណ្ណោះ។

លោកសង្ឃឹមថា តម្លៃនេះនឹងកើនឡើងថែមទៀត ខណៈដែលបរិមាណដំឡូងមីឆ្នាំនេះ ទទួលបានផលតិចជាងឆ្នាំមុនៗ និងកំពុងស្ថិតនៅចុងដៃនៃការប្រមូលផល ស្របពេលដែលរាជរដ្ឋាភិបាលបានខិតខំប្រឹងប្រែងស្វែងរកទីផ្សារថ្មីៗបន្ថែមដូចជាការចុះកិច្ចព្រមព្រៀងពាណិជ្ជកម្មសេរីជាមួយចិន និងកូរ៉េជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ សម្ព័ន្ធសមាគមដំឡូងមី បានរៀបចំឯកសារដាក់បញ្ចូលទៅក្នុងក្របខណ្ឌពាណិជ្ជកម្មសេរីជាមួយចិន-កម្ពុជា ដើម្បីនាំចេញទៅកាន់ខេត្តក្វាងទុង និងខេត្តសាន់ស៊ី ក្រោមការសម្របសម្រួលដោយក្រសួងពាណិជ្ជកម្មផងដែរ។

លោក នីកានបានបន្ថែមថា កាលពីចុងឆ្នាំ២០២០ ប្រជាកសិករបានជួបបញ្ហាដោយសារទឹកជំនន់ធ្វើឲ្យផលដំណាំជាពិសេសដំឡូងមី ខូចខាតក្នុងរង្វង់ប្រមាណ ៣០ទៅ៤០ភាគរយ។

កាលពីដើមខែមករា ក្រសួងពាណិជ្ជកម្ម បានដាក់ដំណើរការជាផ្លូវការនូវ «គោលនយោបាយជាតិស្តីពីដំឡូងមី ២០២០-២០២៥» ដើម្បីបង្កើនផលិតកម្ម និងធ្វើឱ្យវាកាន់តែមានលក្ខណៈពាណិជ្ជកម្មសម្រាប់ការនាំចេញទៅទីផ្សារអន្តរជាតិ។

យោងតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល២ខែដើមឆ្នាំនេះ ការនាំចេញផលិតផលកសិកម្មរបស់កម្ពុជាទៅកាន់ទីផ្សារអន្តរជាតិមានចំនួនជិត១លាន៥សែនតោន កើនឡើងជាង៥៥% ក្នុងនោះផលិតផលដំឡូងមីមានការបញ្ជាទិញច្រើនជាងគេ គឺដំឡូងមីក្រៀមចំនួនប្រមាណជាង ៨០ម៉ឺនតោន និងដំឡូងមីស្រស់ជាង ១៥ម៉ឺនតោន៕

ដោយ ៖ សំអឿន