បុគ្គលិកគ្រឹះស្ថានមីក្រូហិរញ្ញវត្ថុម្នាក់ពាក់ព័ន្ធគ្រូពេទ្យ អុឹម សុភីកម្តៅឡើងដល់ជាង ៣៨ អង្សា

រដ្ឋបាលស្រុកពាមជរបានប្រកាសថា បុគ្គលិកគ្រឹះស្ថានមីក្រូហិរញ្ញវត្ថុម្នាក់ មានជាប់ពាក់ព័ន្ធជាមួយ គ្រូពេទ្យអ៉ឹម សុភី។ បុរសសែម សីហា អាយុ ៣២ ឆ្នាំជាបុគ្គលិកបម្រើការងារនៅគ្រឹះស្ថានមីក្រូហិរញ្ញវត្ថុប្រាសាក់បម្រើការងារនៅសាខាអ្នកលឿង មានទីលំនៅភូមិបង្អែក ឃុំស្វាយភ្លោះ ស្រុកពាមជរ ខេត្តព្រៃវែង ស្ថានភាពបច្ចុប្បន្នបុរសរូបនេះ ស្ថានភាពឡើងកម្តៅរហូតដល់ ជាង ៣៨ អង្សា។

រដ្ឋបាលស្រុកពាមជរ បញ្ជាក់ថា ស្ថានភាពប្រជាពលរដ្ឋ ២រូប មានជាប់ពាក់ព័ន្ធទី១ ឈ្មោះ យី សុភាព អាយុ ៥៤ ឆ្នាំ ជាកសិករ និងបុរម្នាក់ទៀត គឺ ឈ្មោះ សែម សីហា ដែលជាបុគ្គលិកគ្រឹះស្ថានមីក្រូហិរញ្ញវត្ថុប្រាសាក់នៅសាខាអ្នកលឿង។

ស្ត្រីឈ្មោះ យី សុភាព បានទៅពិនិត្យព្យាបាលនៅមន្ទីរពេទ្យអ៉ឹម សុភី កាលពីថ្ងៃទី ២០ ខែកុម្ភៈ ប៉ុន្តែគាត់មិនបានផ្តល់ព័ត៌មានប្រាប់អាជ្ញាធរដើម្បីយកសំណាកទៅពិនិត្យ។

មកដល់ថ្ងៃទី ១០ ខែមីនា ឈ្មោះ យី សុភាព និងសែម សីហា មានអាការៈក្តៅខ្លួន ដល់ថ្ងៃទី ១២ អ្នកទាំងពីរបានមកមន្ទីរពេទ្យបង្អែកពាមជរដើម្បីពិនិត្យជំងឺ គ្រូពេទ្យពិនិត្យឃើញពួកគាត់មានកម្តៅឡើងដល់ ៣៨.៣ អង្សា៕

អត្ថបទ៖ ឡេង ដេត