ព័ត៌មានជាតិ

ខេត្តទេសចរណ៍ឡាវ «ហ្លួងព្រះបាង» ខ្វះខាតថវិកាថែទាំងផ្លូវ ទទូចឲ្យពលរដ្ឋចូលរួមជួយ

បានផុស

២ ខែ មុន

នៅ

ថ្ងៃព្រហស្បតិ៍ ២២ ឧសភា ២០២៥

ដោយ

សារព័ត៌មានថៃ MGR Online បានរាយការណ៍ថា មន្ទីរសាធារណការនិងដឹកជញ្ជូនខេត្តហ្លួងព្រះបាង (Luang Prabang) របស់ប្រទេសឡាវ បានចេញលិខិតជូនដំណឹងមួយទៅកាន់គ្រប់អភិបាលស្រុកទាំងអស់ទូទាំងខេត្តហ្លួងព្រះបាង និងបានស្នើឱ្យប្រជាជនចូលរួមថែទាំផ្លូវជាតិទាំងអស់គ្នាដោយខ្លួនឯង ដោយសារតែរដ្ឋាភិបាលបានផ្ទេរការទទួលខុសត្រូវការថែទាំផ្លូវជាតិដែលស្ថិតក្នុងខេត្តមួយនេះដល់រដ្ឋបាលខេត្តរួចហើយ ប៉ុន្តែមិនបានបែងចែកកញ្ចប់ថវិកាសម្រាប់ការថែទាំនោះទេ។

ភ្ញៀវទេសចរចូលរួមទស្សនាសកម្មភាពរបស់ប្រជាជនឡាវនៅខេត្តហ្លួងព្រះបាង។ Southeast Asia Globe and Mekong Eye

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍ បានលើកឡើងដោយដកស្រង់បន្តពីការចុះផ្សាយរបស់សារព័ត៌មានក្នុងស្រុករបស់ប្រទេសឡាវ ដែលបានរាយការណ៍នៅថ្ងៃទី២១ខែឧសភា ថា ទំព័រហ្វេសប៊ុករបស់រដ្ឋបាលខេត្តហ្លួងព្រះបាង (Luang Prabang) បានបង្ហោះលិខិតជូនដំណឹងមួយរបស់មន្ទីរសាធារណការនិងដឹកជញ្ជូនខេត្តហ្លួងព្រះបាងផ្ញើទៅកាន់អភិបាលក្រុងនិងគ្រប់អភិបាលស្រុកទាំងអស់ទូទាំងខេត្តហ្លួងព្រះបាង ដោយស្នើឱ្យប្រជាជនដែលរស់នៅតាមបណ្តោយដងផ្លូវជាតិទាំងអស់ដែលស្ថិតក្នុងភូមិសាស្ត្រខេត្តហ្លួងព្រះបាងឱ្យជួយចូលរួមទទួលខុសត្រូវក្នុងការថែទាំផ្លូវជាតិក្នុងខេត្តទាំងអស់គ្នាដោយខ្លួនឯង។

ការចេញផ្សាយដោយយោងខ្លឹមសារក្នុងលិខិតជូនដំណឹងនោះ បានឲ្យថា ចាប់ពីដើមឆ្នាំ២០២៥មក ក្រសួងសាធារណការនិងដឹកជញ្ជូនឡាវ បានផ្ទេរភារកិច្ចការងារទទួលខុសត្រូវថែទាំផ្លូវជាតិទាំងអស់ដែលស្ថិតក្នុងភូមិសាស្ត្រខេត្តហ្លួងព្រះបាងទៅឱ្យមន្ទីរសាធារណការនិងដឹកជញ្ជូនខេត្តដើម្បីទទួលខុសត្រូវដោយខ្លួនឯង។

ទោះបីជាបែបនេះក្តី ក្នុងលិខិតនោះ បានអះអាងថា សារមន្ទីរសាធារណការនិងដឹកជញ្ជូនខេត្តមិនមានកញ្ចប់ថវិកាសម្រាប់ការងារថែទាំផ្លូវទាំងនោះទេ ទើបមានការអំពាវនាវឱ្យប្រជាជនដែលរស់នៅក្នុងខេត្តមួយនេះចូលរួមថែទាំផ្លូវទាំងអស់គ្នា។

ក្នុងលិខិតដដែលបានបញ្ជាក់ថា កន្លងមកបន្ទុកទទួលខុសត្រូវថែទាំផ្លូវជាតិទាំងអស់ជាភារកិច្ចរបស់ក្រសួងសាធារណការនិងដឹកជញ្ជូន ពោលគឺរដ្ឋាភិបាលបានបែងចែកកញ្ចប់ថវិកាសម្រាប់ការជួសជុលនិងថែទាំរយៈពេល៣ឆ្នាំ ដោយថវិកាចុងក្រោយចន្លោះឆ្នាំ២០២២ ដល់ឆ្នាំ២០២៤ ប៉ុន្តែបន្ទាប់ពីកញ្ចប់ថវិកាទាំងនោះអស់ ក្រសួងបានផ្ទេរការទទួលខុសត្រូវថែទាំទៅឱ្យមន្ទីរសាធារណការខេត្តវិញ ប៉ុន្តែក្រសួងមិនបានប្រគល់កញ្ចប់ថវិកាសម្រាប់ការថែទាំនោះទេ ទើបរដ្ឋបាលខេត្តអំពាវនាវឱ្យរដ្ឋបាលស្រុក ប្រជាពលរដ្ឋទាំងអស់ចូលរួមថែទាំផ្លូវជាតិទាំងអស់ដោយខ្លួនឯងបែបនេះ។

គួររំលឹកថា ខេត្តហ្លួងព្រះបាង (Luang Prabang) គឺជាខេត្តដែលស្ថិតនៅក្នុងតំបន់ទេសចរណ៍ដ៏ពេញនិយមជាងគេមួយរបស់ប្រទេសឡាវ និងជាសម្បត្តិបេតិកភណ្ឌពិភព៕

ដោយ ភ្នាក់ងារ