ឱ វណ្ណឌីន៖ “តើ​ចិន​ផលិត​​វ៉ា​ក់សាំងមក​ ដើម្បី​សម្លាប់​​ពលរដ្ឋ​ខ្លួន​ឯង ​យ៉ាង​ម៉េច​ទៅ”

ភ្នំពេញ៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានឆ្លើយតបទៅនឹងការវាយប្រហាររបស់ជនអគតិមួយចំនួន ដែលបានលើកឡើងពីរឿងការចាក់វ៉ាក់សាំងចិន ដែលរដ្ឋាភិបាលបាននឹងកំពុងចាក់ជូនដល់ប្រជាពលរដ្ឋនៅទូទាំងប្រទេស។

វ៉ាក់សាំងចិនដែលកំពុងចាក់ជួនប្រជាពលរដ្ឋនោះមានចំនួនពីរប្រភេទទី១ ប្រភេទស៊ីណូហ្វាមដែលមានចំនួន​១​លាន​៣​សែន​ដូសជាជំនួយរបស់ចិនសម្រាប់ចាក់ពីអាយុ១៨ដល់៥៩ឆ្នាំ និងទី២វ៉ាក់សាំងប្រភេទស៊ីណូវ៉ាក់ ដែលបានបញ្ជា​ទិញ​ពី​ចិន​ចំនួន១លាន៥សែនដូស សម្រាប់ចាក់ពីអាយុ១៨ឆ្នាំឡើងទៅ។

តាមរយៈសារតាមប្រព័ន្ធតេឡេក្រាម លោក ស្រី បានមានប្រសាសន៍ថា«វ៉ាក់សាំងដែលគេផលិតមកមិនមែនធ្វើលេងទេ។ វ៉ាក់សាំងដែលកំពុងចាក់នេះ គេបានឆ្លងកាត់នូវការសិក្សាគេបានឆ្លងកាត់ការពិសោធន៍ គឺគ្រប់ជ្រុងជ្រោយហើយមុននឹងដាក់ឲ្យប្រើប្រាស់នេះ សុទ្ធតែមានការសិក្សាផ្នែកវិទ្យាសាស្ត្រវាយតម្លៃត្រឹមត្រូវអំពីប្រសិទ្ធភាព និងគុណភាពរបស់វ៉ាក់សាំងដូចជាស៊ីណូហ្វាមមានប្រសិទ្ធភាពដល់៧៩,៣៤%។ អីចឹងកន្លែងនេះសូមបងប្អូនចងចាំថាការដាក់ចេញវ៉ាក់សាំងនេះជាវ៉ាកសាំងមួយ ដែលគេមានការសិក្សាត្រឹមត្រូវតាមលក្ខណៈវិទ្យានិងកំពុងតែប្រើប្រាស់នៅលើពិភពលោក»។

លោកស្រីបានបន្តទៀតថា នៅចិនគេក៏ចាក់គេចាក់ជួនប្រជាជនគេដែរ ទាំងស៊ីណូហ្វាមនិងស៊ីណូវ៉ាក់១លាន៥សែនដូសដោយចាក់ជួនប្រជាជនចិនបានជាង១១០លាននាក់ហើយ។

លោកស្រី​បានលើកជាសំណួរថា«តើចិនផលិតវ៉ាក់សាំងមកគឺដើម្បីសម្លាប់ប្រជាជនខ្លួនឯងឬយ៉ាងម៉េច?។ ឥឡូវអ្នកចាក់ជាង១១០លាននាក់ហើយក៏ចាក់រួចហើយក៏មិនមានបញ្ហាអ្វីដែរ។ ចំណែកនៅកម្ពុជាវិញពេលទទួលបានវ៉ាក់សាំងក៏បានចាក់ដែរក្នុងនោះរួមមាន ក្រុមគ្រួសារនិងកូនចៅរបស់សម្តេចតេជោព្រមទាំងថ្នាក់ដឹកនាំផ្សេងៗទៀតបានចាក់រួចហើយក៏មិនមានបញ្ហាអ្វីដែរ»។

គួរបញ្ជាក់ថាកម្ពុជាបានចាក់វ៉ាក់សាំងស៊ីណូហ្វាមរបស់ចិននៅថ្ងៃទី១០ខែកម្ភៈឆ្នាំ២០២១ទៅលើក្រុមគោលដៅមួយចំនួនដូចជា

ឥស្សរជនមន្ត្រីជាន់ខ្ពស់រាជរដ្ឋាភិបាល ក្រុមគ្រូពេទ្យ មន្ត្រីបុគ្គលិកសុខាភិបាល មន្ត្រីនគរបាលជាតិ អ្នកប្រមូលសម្រាម បុគ្គលិកស៊ីម៉ាក់ អ្នកសារព័ត៍មាននិងនាយមទាហានពលទាហាន។

ចំណែកវ៉ាក់សាំងស៊ូណូវ៉ាក់វិញ កម្ពុជាបានបើកយុទ្ធនាការចាក់ទូទាំងប្រទេសចាប់ពីថ្ងៃទី០១មេសាឆ្នា២០២១ទៅលើក្រុមគោលដៅចំនួន៨ក្រុមចំនួន៧៤៥០០០នាក់សម្រាប់ដូសទី១៕

អត្ថបទ៖ សំអឿន