Update៖ ករណីបាញ់ប្រហារនៅក្រុងសៀមរាប ផ្ដើមចេញពីគំនុំរវាងប្ដី និងអតីតប្រពន្ធ

ជនសង្ស័យជាអតីតជាប្តីបានបាញ់ទៅលើប្រពន្ធ បងថ្លៃនិងប្អូនថ្លៃ ហើយបាញ់ខ្លួនឯងតាមក្រោយបណ្តាលឲ្យសម្លាប់២នាក់របួស២នាក់។

ហេតុការណ៍នេះបានកើតឡើងនៅព្រឹកថ្ងៃទី៧ ខែមេសា ឆ្នាំ២០២៣ លើគោលដៅចំនួន២ទីតាំង ទី១នៅផ្ទះរបស់អតីតប្រពន្ធ ក្នុងភូមិតាវៀន សង្កាត់សាលាកំរើក ក្រុងសៀមរាប​ និងនៅក្នុងផ្សារលើធំថ្មីចំនួន២ទីតាំង។

សមត្ថកិច្ចក្នុងហេតុការណ៍នេះបានផ្តល់ព័ត៌មានបឋមថា គិតត្រឹមម៉ោង៩និង៣០នាទីព្រឹកថ្ងៃដដែលមានអ្នកស្លាប់២នាក់ និងរបួស២នាក់។ អ្នកស្លាប់ទី១ជាអតីតប្រពន្ធ ទី២ត្រូវជាប្អូនថ្លៃប្រុស ចំណែកអ្នករបួស ទី១ជាបងថ្លៃស្រី និងទី២ជាជនដៃដល់។

សមត្ថកិច្ចបានឲ្យដឹងថា តាមការស្រាវជ្រាវបឋម ពីដំបូងឡើយជនដៃដល់ចូលមកក្នុងផ្ទះបាញ់សម្លាប់ប្អូនថ្លៃប្រុស ដោយកាំភ្លើងខ្លីមិនទាន់ស្គាល់ម៉ាក និងចាក់សោរបង្ខាំងក្មេងស្រីម្នាក់ទុកក្នុងផ្ទះហើយចេញបាត់។ បន្ទាប់មកជនដៃដល់ទៅបាញ់បងថ្លៃស្រីកំពុងលក់ដូរក្នុងផ្សារលើ ហើយបន្តទៅបាញ់អតីតប្រពន្ធដែលកំពុងលក់ដូរនៅផ្ទះក្នុងផ្សារលើដូចគ្នា រួចក៏បាញ់ខ្លួនឯងតែម្តង។

សមត្ថកិច្ចបន្ថែមថា បន្ទាប់ពីកើតហេតុជនរងគ្រោះទាំងបងថ្លៃ ប្រពន្ធ និងជនដៃដល់ត្រូវបញ្ជូនទៅមន្ទីរពេទ្យ តែអកុសល ប្រពន្ធបានដាច់ខ្យល់ស្លាប់។ សរុបត្រឹមម៉ោងជាង៩ព្រឹកថ្ងៃដដែល ស្លាប់២ និងរបួស២ ដែលករណីឃាតកម្មនេះសន្និដ្ឋានជំហ៊ានដំបូងថា អាចជារឿងគំនុំ។

បច្ចុប្បន្នក្រុមសមត្ថកិច្ចកំពុងស្រាវជ្រាវបន្ត និងប្រគល់សកសពជូនក្រុមគ្រួសារ៕

អត្ថបទ៖ កុសល