ពលរដ្ឋនៅខេត្តរតនគិរី ១៧នាក់ ពុលផ្សិតជាបន្តបន្ទាប់

ប្រជាពលរដ្ឋ១៧នាក់ ត្រូវបានដឹកបញ្ជូនមកសង្រ្គោះបន្ទាន់នៅមន្ទីរពេទ្យបង្អែកស្រុកបរកែវ បន្ទាប់ពីពួកគាត់ដកផ្សិតម៉្យាងមកធ្វើម្ហូបទទួលទាន។

បើតាមការឲ្យដឹងពីលោកវេជ្ជៈបណ្ឌិត អេង គុណវុឌ្ឍ ប្រធានការិយាល័យជំងឺឆ្លង និងចាក់ថ្នាំបង្ការនៃមន្ទីរសុខាភិបាលខេត្តរតនគិរី បានឲ្យដឹងនៅព្រឹកថ្ងៃទី២១កក្កដានេះថា ប្រជាពលរដ្ឋនៅភូមិប៉ក់ប៉ូ ឃុំប៉ក់ញ៉ៃ ស្រុកអូរយ៉ដាវ ខេត្តរតនគិរី ចំនួន១៧នាក់ ត្រូវបានដឹកមកសង្រ្គោះបន្ទាន់នៅមន្ទីរបង្អែកពេទ្យស្រុកបរកែវ បន្ទាប់ពីពួកគាត់ដកផ្សិតម៉្យាងមកធ្វើ
ម្ហូបទទួលទាន។

លោកវេជ្ជៈបណ្ឌិតបន្តថា ក្នុងចំណោមអ្នកជំងឺសរុប១៧នាក់ មានស្រី៤នាក់ ក្មេង១នាក់ បានចូលមកមន្ទីរពេទ្យជាបន្តបន្ទាប់ចាប់ពីម៉ោង១ទាបភ្លឺ ថ្ងៃទី២១ ខែកក្កដា ឆ្នាំ២០២៤ ដោយមាន រាគ ក្អួត ចុកពោះខ្លាំង។ ហើយក្នុងចំណោមអ្នកទាំង១៧នាក់នេះ មានក្មេងម្នាក់ ដែលសន្លប់ និងរាគក្អួតខ្លាំង ខាងមន្ទីរពេទ្យបង្អែកស្រុកបរកែវ បានបញ្ជូនបន្តទៅព្យាបាលនៅមន្ទីរពេទ្យបង្អែកខេត្ត។ ចំណែកអ្នកទាំង១៦នាក់ ដែលនៅសល់ ក្រោយបានទទួលការព្យាបាលពួកគាត់បានធូស្រាល ហើយកំពុងពិនិត្យព្យាបាលបន្តនៅមន្ទីរពេទ្យបង្អែកស្រុកបរកែវ។

ខណៈពិនិត្យឃើញស្ថានការណ៍ដូច្នេះ លោក ញ៉ែម សំអឿន អភិបាលខេត្តរតនគិរី បានធ្វើការអំពាវនាវដល់
ប្រជាពលរដ្ឋនៅក្នុងខេត្តរតនគិរី សូមប្រុងប្រយ័ត្នកុំបរិភោគផ្សិត ដែលស្គាល់មិនច្បាស់ពីព្រោះអាចបណ្តាលឲ្យពុល ជាពិសេសផ្សិតដូចក្នុងរូបភាពបង្ហាញជូននេះ៕

អត្ថបទ៖ វុទ្ធឦសាន