កីឡាករ និងក្រុមសិល្បករ ត្រៀមទទួលទង់ស៊ីហ្គេមនៅវៀតណាម ចាក់វ៉ាក់សាំងដូសទី៣

ថ្នាក់ដឹកនាំមន្ត្រីកីឡា គ្រូបង្វឹកកីឡាករ កីឡាការិនី រួមនឹងក្រុមការងារនៃក្រសួងវប្បធម៌ និងវិចិត្រសិល្បៈចំនួន៦៧៣នាក់ ដែលត្រៀមចូលរួមសម្តែងក្នុងពិធីទទួលទង់ស៊ីហ្គេមនៅវៀតណាម នាឆ្នាំ២០២២ បានទទួលការចាក់វ៉ាក់សាំងការពារកូវីដ-១៩ដូសទី៣ ឬដូសជំរុញ ប្រភេទ AstraZeneca កាលពីថ្ងៃទី១ ខែកញ្ញានេះ នៅពហុកីឡដ្ឋានជាតិមរតកតេជោ។

កីឡាករ កីឡាការិនី ដែលបានទទួលការចាក់វ៉ាក់សាំងដូសទី៣ ឬ ដូសជំរុញនេះ មកពី ៣៧ សហព័ន្ធកីឡាជាតិ ដែលមានចំនួន ៥៤៩នាក់។ ក្រុមការងារនៃក្រសួង វប្បធម៌ និងវិចិត្រសិល្បៈ មានចំនួនចំនួន ៧២នាក់និងបុគ្គលិកប្រចាំការនៅពហុកីឡដ្ឋានជាតិមរតកតេជោចំនួន ៥២នាក់ សរុបមានចំនួន៦៧៣នាក់។

ការចាក់វ៉ាក់សាំងដូសទី៣ សម្រាប់កីឡាករកីឡាការិនី នៅមិនទាន់បញ្ចប់នៅឡើយទេ ពិសេសកីឡាករ កីឡាការិនីជម្រើសជាតិថ្នាល ដែលមានអាយុពី១២ ដល់ក្រោម១៨ឆ្នាំ ដែលទើបតែនឹងបញ្ចប់ការចាក់ដូសទី២ កាលពីថ្ងៃទី៣០ ខែសីហាកន្លងទៅនេះ។

សូមបញ្ជាក់ថា ការចាក់វ៉ាក់សាំងនេះ ធ្វើឡើងក្រោមកិច្ចសហប្រតិបត្តការរវាងគណៈកម្មាធិការជាតិរៀបចំស៊ីហ្គេម ឆ្នាំ២០២៣ (CAMSOC) ជាមួយនឹងក្រុមការងារចាក់វ៉ាក់សាំងនៃក្រសួងការពារជាតិ៕

អត្ថបទ៖ វិសិទ្ធ