កីឡា

ជើងឯកស្វាយរៀងខាប់ U18 រកឃើញ១១ក្រុមឡើងវគ្គបន្ត

បានផុស

៥ ម៉ោង មុន

នៅ

ថ្ងៃចន្ទ ១៨ កញ្ញា ២០២៣

ដោយ

ការប្រកួតបាល់ទាត់ជើងឯកយុវជនស្វាយរៀងខាប់អាយុក្រោម១៨ឆ្នាំ លើកទី១ ឆ្នាំ២០២៣ រកឃើញក្រុមចំនួន១១ឡើងទៅវគ្គបន្តហើយ បន្ទាប់ពីចប់ការប្រកួតវគ្គសន្សំពិន្ទុក្នុងពូល សប្តាហ៍ទី៥ កាលពីចុងសប្តាហ៍កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសប្តាហ៍ទី៥ នៅថ្ងៃសៅរ៍ ទី១៦ ខែកញ្ញា ឆ្នាំ២០២៣ វេលាម៉ោង៨ព្រឹក ក្រុមយុវជនព្រះខ័នរាជស្វាយរៀងអាយុក្រោម១៨ឆ្នាំទទួលបានជ័យជម្នះយ៉ាងធំធេងលើក្រុម យុវជនឆន្ទៈកីឡា ដោយលទ្ធផល ០-១០ ដើម្បីឈរលើកំពូលតារាងពូល ខ។

វេលាម៉ោង២រសៀល ក្រុម ពូប្រុស លីងគួយ បានយកឈ្នះលើក្រុម United Sez ដោយលទ្ធផល ១-០ ដើម្បីមាន៧ពិន្ទុស្មើ ព្រះខ័នរាជស្វាយរៀង U18 ដែរ ប៉ុន្តែឈរលេខ២ពូល ដោយសារចាញ់គ្រាប់បាល់។

ម៉ោង៤រសៀល ក្រុមយុវជន Blue Dragon លត់ក្រុម Red Bull យ៉ាងចាស់ដៃក្នុងលទ្ធផល ១១-១ ដើម្បីមាន៩ពិន្ទុ ឈរលេខ១ពូល គ ប៉ុន្តែក្រុម Red Bull ក៏បានឡើងទៅកាន់វគ្គបន្តដែរដោយមាន៦ពិន្ទុ ឈរលេខ២ក្នុងពូល។

ចំពោះការប្រកួតម៉ោង៨ព្រឹកនៅថ្ងៃអាទិត្យ ទី១៧ ខែកញ្ញា ឆ្នាំ២០២៣ ក្រុមយុវជនគគីរសោម បានឈ្នះ ក្រុមសាលាចំរើនសូនីតា ៣-១ ដើម្បីឈរលេខ២ក្នុងពូល ង ខណៈលេខ១ក្រុមយុវជនរមាសហែក។

នៅពូល ឃ ក្រុម ត្នោតអេហ្វស៊ី បានយកឈ្នះក្រុម យុវជនតាពៅ ក្នុងលទ្ធផល ៣-៦ វេលាម៉ោង២រសៀល ដើម្បីបានឈរលេខ២ក្នុងពូលឡើងទៅកាន់វគ្គបន្ត ខណៈលេខ១កាន់កាប់ដោយក្រុមយុវជន M.S.T FC ដែលបានយកឈ្នះលើក្រុម ដារ៉ូពិទូ Sports FC ដោយលទ្ធផល ១-២ វេលាម៉ោង៤រសៀល។

ឆ្លងកាត់ការប្រកួតសន្សំពិន្ទុក្នុងរយៈពេល៥សប្តាហ៍កន្លងទៅ ក្រុមចំណាត់ថ្នាក់លេខ១ និងលេខ២ ក្នុងពូល “ក” “ខ” “គ” “ឃ” និង “ង” រកឃើញហើញដោយពួកគេទទួលបានកៅអីឡើងទៅវគ្គបន្ត ខណៈពូលចុងក្រោយគឺ “ច” ក៏រកឃើញ១ក្រុមឡើងទៅកាន់វគ្គបន្តដែរ ប៉ុន្តែនៅសល់១ក្រុមទៀតនៅក្នុងពូល ច។

ទន្ទឹមជាមួយគ្នានេះក៏ត្រូវយកក្រុមលេខ៣ល្អបំផុតក្នុងពូលចំនួន៤ទៀត ដើម្បីបង្ក្រប់ចំនួន១៦ក្រុមចុងក្រោយ៕