សម្តេច ម៉ែន សំអន សាទរការរៀបចំតំបន់រមណីយដ្ឋាន«សួនតេជោសន្តិភាព» ស្ថិតនៅតំបន់ទេសចរណ៍ទំនប់ ៩៥

សម្តេច​កិត្តិ​សង្គហ​បណ្ឌិត ម៉ែន សំអន ឧត្តម​ប្រឹក្សា​ផ្ទាល់​ព្រះមហាក្សត្រ បាន​សម្តែង​នូវ​ការ​អបអរសាទរ​ការ​រៀបចំ​តំបន់​រមណីយដ្ឋាន «សួន​តេជោ​សន្តិភាព» ស្ថិតនៅ​តំបន់​ទេសចរណ៍ ទំនប់ ៩៥ ដើម្បី​បង្កើន​ភាព​ទាក់ទាញ​កាន់តែ​អស្ចារ្យ​បន្ថែម​ទៀត។

សម្តេចកិត្តិសង្គហបណ្ឌិត ម៉ែន សំអន ចូលរួម​អបអរសាទរ​បែបនេះ​ក្នុង​ពេល​អញ្ជើញ​អុជ​ធូប ថ្វាយ​គ្រឿង​សក្ការៈ នៅ​រូបសំណាក លោកតាឌី បន្ទាប់មកបានបន្តដំណើរទស្សនា «សួនតេជោសន្តិភាព» ស្ថិតនៅតំបន់ទេសចរណ៍ ទំនប់ ៩៥ ស្ថិតនៅជើងភ្នំត្បែង ក្នុងភូមិទំនប់ សង្កាត់ប៉ាលហាល ក្រុង​ព្រះវិហារ កាលពី​រសៀលថ្ងៃអាទិត្យ ៥ រោច ខែផល្គុន ឆ្នាំម្សាញ់ សប្តស័ក ព.ស. ២៥៦៩ ត្រូវនឹង​ថ្ងៃ​ទី ៨ ខែមីនា ឆ្នាំ ២០២៦។

លោក គីម រិទ្ធី អភិបាល នៃគណៈអភិបាលខេត្តព្រះវិហារ ក៏បានគោរពជម្រាបជូន សម្តេច ផងដែរ​ថា ទំនប់ ៩៥ គឺជា​រមណីយដ្ឋាន​ទេសចរណ៍​បែប​ធម្មជាតិដ៏ពេញនិយមមួយស្ថិតនៅភូមិទំនប់ ៩៥ សង្កាត់ប៉ាលហាល ក្រុងព្រះវិហារ ខេត្តព្រះវិហារ ចម្ងាយប្រហែល ៤ គីឡូម៉ែត្រពីក្រុងព្រះវិហារ។ ទីតាំងនេះល្បីល្បាញដោយសារ​ទេសភាព​មាត់ទឹកដ៏ស្រស់ស្អាត អាច​គយគន់​សម្រស់ភ្នំត្បែង និង​ជា​កន្លែង​សម្រាកលំហែកាយចុងសប្តាហ៍ដ៏មានសក្តានុពល។ បច្ចុប្បន្នទំនប់ ៩៥ បាននិងកំពុង កែច្នៃ និងអភិវឌ្ឍន៍ជា “សួនតេជោសន្តិភាព” ដើម្បីក្លាយជាតំបន់​ទេសចរណ៍​ថ្មីប្លែក​ក្នុង​ខេត្ត​ព្រះវិហារ។

សម្តេចកិត្តិសង្គហបណ្ឌិត ក៏បានថ្លែង​កោតសរសើរ​ចំពោះ​ការ​ដឹកនាំ និងគំនិត​ច្នៃប្រឌិត​របស់ លោក គីម រិទ្ធី អភិបាល នៃគណៈអភិបាលខេត្ត ដោយ​បាន​យកចិត្តទុកដាក់​ក្នុង​ការ​លើក​សោភណភាព​ខេត្ត តាមរយៈ​ការ​ទាក់ទាញ​នូវ​ទេសចរ​ចូល​មក​ទស្សនា​តំបន់​រមណីយដ្ឋាន​ផ្សេងៗ ក៏ដូចជា តំបន់​ទំនប់ ៩៥ នេះ ដែលជាកត្តា​ជំរុញ​កំណើន​សេដ្ឋកិច្ច កាត់​បន្ថយ​ភាព​ក្រីក្រ និង​លើកកម្ពស់​ជីវភាព​រស់នៅ​របស់​ប្រជាពលរដ្ឋ​រស់នៅតំបន់នោះផងដែរ៕

អត្ថបទ ៖ វិមាន