ក្រុមហ៊ុន Moderna គ្រោងផ្តល់វ៉ាក់សាំង ១ពាន់លានដូសទៀត ដល់ប្រទេសមានប្រាក់ចំណូលទាបនៅឆ្នាំ​ ២០២២

ក្រុមហ៊ុន Moderna Inc (MRNA.O) បាននិយាយកាលពីថ្ងៃសុក្រទី០៨ខែតុលាថា ខ្លួនមានបំណងផ្តល់វ៉ាក់សាំងការពារជំងឺកូវីដ-១៩ ចំនួនមួយពាន់លានដូស ដល់ប្រទេសដែលមានប្រាក់ចំណូលទាបនៅឆ្នាំ ២០២២ បន្ថែមពីលើវ៉ាក់សាំងដែល ខ្លួនបានប្តេជ្ញាចិត្តរួចទៅហើយចំពោះកម្មវិធីចែករំលែកវ៉ាក់សាំងសកល COVAX។

វ៉ាក់សាំងទាំងនេះ នឹងជាផ្នែកមួយនៃវ៉ាក់សាំង ២ទៅ៣ ពាន់លានដូស ដែលក្រុមហ៊ុនបានព្យាករណ៍ថា នឹងផលិតនៅឆ្នាំក្រោយ។

លោក Stéphane Bancel នាយកប្រតិបត្តិក្រុមហ៊ុន បាននិយាយថា “រហូតមកដល់បច្ចុប្បន្ន មនុស្សជាង ២៥០ លាននាក់ បានចាក់វ៉ាក់សាំង Moderna ទូទាំងពិភពលោក”។

កាលពីថ្ងៃព្រហស្បតិ៍ ក្រុមហ៊ុន Moderna បានប្រកាសផែនការវិនិយោគ ក្នុងទំហំទឹកប្រាក់រហូតដល់ទៅ ៥០០ លានដុល្លារអាមេរិក ដើម្បីសាងសង់រោងចក្រនៅអាហ្វ្រិក សម្រាប់ផលិតវ៉ាក់សាំងប្រភេទ mRNA រហូតដល់ ៥០០ លានដូសជារៀងរាល់ឆ្នាំ។

ក្នុងខែឧសភា ក្រុមហ៊ុនបានប្តេជ្ញាចិត្ត ផ្គត់ផ្គង់វ៉ាក់សាំងការពារជំងឺកូវីដ -១៩ រហូតដល់ ៥០០ លានដូសដល់កម្មវិធី COVAX ចាប់ពីត្រីមាសទី ៤ ឆ្នាំ ២០២១ ដល់ឆ្នាំ ២០២២។

លោក Bancel អះអាងថា “យើងប្តេជ្ញាផលិតឲ្យបានទ្វេដង និងពង្រីកការផ្គត់ផ្គង់បន្ថែមទៀត រហូតដល់វ៉ាក់សាំងរបស់យើងលែងត្រូវការនៅក្នុងប្រទេស ដែលមានប្រាក់ចំណូលទាប”៕

ប្រែសម្រួល៖ Vann Vann

ប្រភព៖ Reuters

ចុចអាន៖ ចាក់ Sinovac ជាដូសជំរុញ មិនត្រឹមការពារកូវីដទេ ថែមទាំងអាចប្រឆាំង Delta បានយ៉ាងល្អប្រសើរផងដែរ