បើកម៉ូតូវ៉ាជែងទាក់ដៃចង្កូតដួលចូលក្រោមរថយន្ដស្លាប់២នាក់ភ្លាមៗនៅកន្លែងកើតហេតុ

បុរស២នាក់បានស្លាប់ភ្លាមៗនៅកន្លែង ខណ:ដែលពួកគេជិះម៉ូតូឌុបក្នុងល្បឿនលឿន ដោយបានវ៉ាជែងបណ្តាលអោយដួលអូសចូលទៅក្រោមរថយន្ត ខណៈកំពុងធ្វើដំណើរបញ្ជ្រាស់ទិសគ្នា។

ហេតុការណ៍ដ៏រន្ធត់នេះ បានកើតឡើងនៅថ្ងៃទី៤ ខែឧសភា ឆ្នាំ២០២២ វេលាម៉ោង៨យប់ នៅលើកំណាត់ផ្លូវជាតិលេខ៥៩ ស្ថិតក្នុងក្រុមទី៣ ភូមិថ្នល់បំបែក ឃុំសំពៅលូន ស្រុកសំពៅលូន ខេត្តបាត់ដំបង។

របាយការណ៍សមត្ថកិច្ចបានបញ្ជាក់ថា នៅមុនពេលកើតហេតុ មានម៉ូតូឌ្រីមពណ៌ខ្មៅមួយគ្រឿង ពាក់ស្លាកលេខ 1L 7588 (បាត់ដំបង) បើកបរដោយឈ្មោះ ឡយ ឃ្លោក ភេទប្រុស អាយុ២៩ឆ្នាំ រស់នៅភូមិអូរ ឃុំសន្តិភាព ស្រុកសំពៅលូន និងអ្នករួមដំណើរឈ្មោះ អិត តេន ភេទប្រុស អាយុ៣០ ឆ្នាំរស់នៅភូមិ ប្រឡាយប្រាក់ ឃុំអង្គរបាន ស្រុកសំពៅលូន បានបើកបរម៉ូតូយ៉ាងលឿន ទំនងជាស្រវឹង លុះដល់ត្រង់ចំណុចកើតហេតុ ក៏បានឡើងជែងនិងម៉ូតូម៉ាកឌ្រីមពណ៌ខ្មៅពាក់ស្លាកលេខ 1 AP 4193 (បាត់ដំបង) ដែលបើកបរដោយឈ្មោះ ឃៀង សុខជា ភេទប្រុស អាយុ១៦ឆ្នាំរស់នៅភូមិ ក្បាលល្ហុង ឃុំអង្គរបាន ស្រុកសំពៅលូនខេត្ត បណ្តាលអោយប៉ះដៃចង្កូតក៏បានដួលតែម្តង។ ពេលនោះដែរក៏មានរថយន្តម៉ាក ត្រាយតុន ពណ៌ទឹកប្រាក់ ពាក់ស្លាកលេខ 2AA 0411(ភ្នំពេញ)​បើកបរដោយឈ្មោះ ណាំ សុពៅ ភេទប្រុស អាយុ២៤ឆ្នាំរស់នៅ ភូមិប៉ាហ៊ីជើង សង្កាត់ប៉ៃលិន ក្រុងប៉ៃលិនខេត្ត ដែលកំពុងបើកបរមកពីមុខ ក៏បានបុកតែម្តង បណ្តាលអោយស្លាប់មនុស្ស២នាក់ ។

តាមការពិនិត្យកន្លែងកើតហេតុ ជនរងគ្រោះបានបើកបរវ៉ាជែងជាមួយម៉ូតូដែលមានដំណើរស្របទិសគ្នាធ្វើឱ្យទាក់ដៃចង្កូតបណ្ដាលឲ្យដួលទៅមុខរថយន្តដែលធ្វើដំណើរបញ្ច្រាសទិសគ្នា ដោយម៉ូតូដែលដួលនេះអូសចម្ងាយជិត៣០ម៉ែត្រ ទើបចូលរថយន្ត ដោយសារល្បឿនលឿន។

ករណីនេះសមត្ថកិច្ចស្រុក បានប្រគល់ឲ្យជំនាញការិយាល័យនគរបាលចរាចរណ៍ផ្លូវគោកខេត្តបាត់ដំបង ដើម្បីធ្វើការតាមនីតិវិធី ដោយឡែកអ្នកបើកបររថយន្តក៏បានបញ្ជូនទៅការិយាល័យដែរ ដោយសារគេមិនបានរត់គេចទៅណាទេ ៕

អត្ថបទ៖ សោ និយមរ័ត្ន