ម៉ា ច័ន្ទបញ្ញា បង្ហាញតម្រុយបោះបង់សិល្ប:

តារាចម្រៀងOriginol Song លោក ម៉ា ច័ន្ទបញ្ញា ថ្មីៗនេះបានធ្វើឲ្យមហាជនមានការភ្ញាក់ផ្អើលគ្រប់គ្នា ​ខណ:នៅសុខៗស្រាប់តែលោកបានពោលពាក្យហាក់ចង់​បោះបង់អាជីពសិល្ប:ដែលខំសាងឡើងជាច្រើនឆ្នាំកន្លងមក។

ជាមួយគ្នានៃដំណឹងអំពីតម្រុយចង់លាឈប់ពីអាជីពសិល្ប:នេះ បានធ្វើឲ្យអ្នកគាំទ្ររបស់តារាប្រុសលោក ម៉ា ច័ន្ទបញ្ញា បានបញ្ចេញមតិដោយលើកទឹកចិត្តកុំឲ្យតារាប្រុសរូបនេះ​បោះបង់វិស័យមួយនេះព្រោះថា​ទម្រាំលោកសាងកេរ្តិ៍ល្បីដល់សព្វថ្ងៃ គឺប្រើរយ:ពេលយូរឆ្នាំណាស់។

លោក ម៉ា ច័ន្ទបញ្ញា បានលើកឡើងថា លោកចូលឆាកសិល្បៈម្ដងនេះប្រហែលជាពេលវេលាចុងក្រោយហើយ ព្រោះអាយុក៏ច្រើនអារម្មណ៍ខ្មាសអៀនក៏ច្រើន ហត់នឿយនឹងជីវិតក៏ច្រើន។ គ្រាន់តែនៅតែនឹក​សំឡេងគាំទ្ររបស់គ្រប់គ្នា នឹកពាក្យសន្យាក្នុងចិត្តចំពោះកុង តាទួតដែលនឹងនាំកិត្តិយសបន្ថែមចូលក្នុងគ្រួសារបើទោះបីជាអ្នកទាំងពីរលែងនៅទីនេះមើលចៅទៀតក៏ដោយនៅដើមឆ្នាំនេះ។

ម៉ា ច័ន្ទបញ្ញា បានបន្តថា លោកធ្លាប់ចង់បោះបង់ការងារនេះជាច្រើនដងហើយ ហើយក៏ធ្លាប់ខូចចិត្តនឹងខ្លួនឯងដែលកើតមកចេះច្រៀងដែរ តែលោកមិនអាចកាត់និស្ស័យនេះបានព្រោះវាជាជីវិត។ ដោយ ឡែកបើតាមប្រភពខ្លះបានបង្ហើបថា តម្រុយនៃការឈប់ពីសិល្ប:របស់លោក ម៉ា ច័ន្ទបញ្ញា អាចជាការពិតនាពេលឆាប់ៗខាងមុខនេះ ពោលគឺប្រហែលជាពេលវេលាដែលលោកបញ្ចប់ការប្រឡងចម្រៀងមួយ​ដែលកំពុងចាប់ផ្តើមឡើង៕

អត្ថបទ៖ ចាន់រ៉ា