អ្នកនាំពាក្យ បដិសេធការផ្សាយរបស់វិទ្យុអាស៊ីសេរី ដែលផ្សាយខុសពីការពិតជុំវិញការអនុវត្តច្បាប់អន្តោប្រវេសន៍នៅកម្ពុជា

អ្នកនាំពាក្យអគ្គនាយកដ្ឋានអន្តោប្រវេសន៍ ប្រតិកម្មចំពោះការចុះផ្សាយរបស់វិទ្យុអាស៊ីសេរី ដែលបានចោទប្រកាន់ខុសពីការពិតជុំវិញការគ្រប់គ្រងច្រកទ្វារព្រំដែនអន្តរជាតិ និងការអនុវត្តច្បាប់អន្តោប្រវេសន៍នៅកម្ពុជា។ អ្នកនាំពាក្យ អះអាងថា អគ្គនាយកដ្ឋានអន្តោប្រវេសន៍ បានបន្តរឹតបន្តឹងការអនុវត្តច្បាប់អន្តោប្រវេសន៍ជាប់ជាប្រចាំយ៉ាងម៉ឺងម៉ាត់បំផុត ជាពិសេសលើការគ្រប់គ្រងតាមច្រកទ្វារអន្តរជាតិ។

ការប្រតិកម្មតបរបស់អគ្គនាយកដ្ឋានអន្តោប្រវេសន៍បែបនេះ គឺបន្ទាប់ពីពិនិត្យឃើញថា កាលពេលថ្មីៗនេះ ទំព័រហ្វេសប៊ុករបស់វិទ្យុអាស៊ីសេរី បានផ្សព្វផ្សាយព័ត៌មាន ដែលមានខ្លឹមសារចោទប្រកាន់លើការគ្រប់គ្រងច្រកទ្វារព្រំដែនអន្តរជាតិ និងការអនុវត្តច្បាប់អន្តោប្រវេសន៍មានភាពធូររលុង​ បង្កលក្ខណៈដល់ជនល្មើសធ្វើសកម្មភាពជួញដូរមនុស្ស និងចាប់ជំរិតនៅប្រទេសកម្ពុជា ជាដើម។

ពាក់ព័ន្ធនឹងការចុះផ្សាយខាងលើ អ្នកនាំពាក្យអគ្គនាយកដ្ឋានអន្តោប្រវេសន៍ តាមរយៈសេចក្ដីបំភ្លឺ នៅថ្ងៃទី១៤ ខែកញ្ញា ឆ្នាំ២០២៣ បានឆ្លើយតបថា អគ្គនាយកដ្ឋានអន្តោប្រវេសន៍បានខិតខំជំរុញការអនុវត្តច្បាប់អន្តោប្រវេសន៍យ៉ាងម៉ឺងម៉ាត់បំផុត ជាពិសេសការគ្រប់គ្រងការធ្វើដំណើរចូលចេញតាមច្រកទ្វារអន្តរជាតិ ដែលស្ថិតក្រោមសមត្ថកិច្ចរបស់អគ្គនាយកដ្ឋានអន្តោប្រវេសន៍ឱ្យមានប្រសិទ្ធភាពខ្ពស់។ ក្នុងនោះ អ្នកនាំពាក្យបញ្ជាក់ថា អគ្គនាយកដ្ឋានអន្តោប្រវេសន៍បានដាក់ឱ្យប្រើប្រាស់ប្រព័ន្ធគ្រប់គ្រងព្រំដែនកម្ពុជា តាមគ្រប់បណ្តាប៉ុស្តិ៍ទាំង២៧ប៉ុស្តិ៍ សំដៅគ្រប់គ្រងឱ្យបានហ្មត់ចត់ និងទប់ស្កាត់រាល់មុខសញ្ញាឧក្រិដ្ឋជនឆ្លងដែនចូលមកកម្ពុជា ដើម្បីរួមចំណែករក្សាការពារសន្តិសុខ និងសណ្ដាប់ធ្នាប់សាធារណៈនៅកម្ពុជា។

បើតាមសេចក្ដីបំភ្លឺដដែលនេះ រយៈពេល៥ឆ្នាំ ពោលគឺចាប់ពីឆ្នាំ២០១៨ ដល់ឆ្នាំ២០២២ អគ្គនាយកដ្ឋានអន្តោប្រវេសន៍បានរកឃើញអ្នកកាន់ឯកសារធ្វើដំណើរមិនប្រក្រតី អ្នកដំណើរពាក់ព័ន្ធក្នុងបញ្ជីមុខសញ្ញា ក៏ដូចជាអ្នកដំណើរមិនមានលក្ខណៈសម្បត្តិគ្រប់គ្រាន់តាមលក្ខខណ្ឌកំណត់ចំនួន២៩៧៣នាក់ ដោយត្រូវបានបដិសេធមិនអនុញ្ញាតឱ្យចូលកម្ពុជា។ ជាមួយនេះ អគ្គនាយកដ្ឋានអន្តោប្រវេសន៍ ក៏បានឃាត់ខ្លួនមុខសញ្ញាចំនួន២៥៣នាក់ ដើម្បីអនុវត្តតាមច្បាប់ស្តីពីអន្តោប្រវេសន៍ដែរ។

បន្ថែមពីលើនេះ អគ្គនាយកដ្ឋានអន្តោប្រវេសន៍ ក៏បានរឹតបន្តឹងការគ្រប់គ្រងវត្តមានជនបរទេសនៅក្នុងប្រទេសកម្ពុជា តាម រយៈការជំរុញស្នងការដ្ឋាននគរបាលរាជធានី-ខេត្ត ចុះស្រង់ស្ថិតិជនបរទេសក្នុងមូលដ្ឋាន ត្រួតពិនិត្យរដ្ឋបាលជនបរទេស និងការស៊ើបអង្កេតស្រាវជ្រាវរកជនបរទេសល្មើសច្បាប់អន្តោប្រវេសន៍ ដើម្បីអនុវត្តតាមនីតិវិធីច្បាប់ថែមទៀតផង។ ជាក់ស្ដែង រយៈពេល៨ខែ ឆ្នាំ២០២៣នេះ អគ្គនាយកដ្ឋានអន្តោប្រវេសន៍ បានអនុវត្តច្បាប់ស្តីពីអន្តោប្រវេសន៍ ដោយបានបណ្ដេញជនបរទេសល្មើសច្បាប់ចំនួន១,៣៦៦នាក់ មាន៣២សញ្ជាតិ ចេញពីកម្ពុជាឱ្យត្រឡប់ទៅប្រទេសដើមវិញ។

តាមរយៈការបកស្រាយខាងលើនេះ ត្រូវបានអ្នកនាំពាក្យបញ្ជាក់ថា នេះបានបង្ហាញឱ្យឃើញច្បាស់អំពីការខិតខំប្រឹងប្រែងរបស់អគ្គនាយកដ្ឋានអន្តោប្រវេសន៍លើការអនុវត្តច្បាប់អន្តោប្រវេសន៍យ៉ាងតឹងរឹង និងហ្មត់ចត់ប្រកបដោយប្រសិទ្ធភាព ដែលផ្ទុយទាំងស្រុងនឹងខ្លឹមសារចុះផ្សាយរបស់វិទ្យុអាស៊ីសេរី។

តែយ៉ាងណាមិញ តាមរយៈសេចក្ដីបំភ្លឺរបស់ខ្លួន អ្នកនាំពាក្យ អះអាងថា អគ្គនាយកដ្ឋានអន្តោប្រវេសន៍ ក៏នឹងបន្តរឹតបន្តឹងការអនុវត្តច្បាប់អន្តោប្រវេសន៍ជាប់ជាប្រចាំ ដើម្បីរួមចំណែកធានាការពារសន្តិសុខ សណ្តាប់ធ្នាប់ និងសុវត្ថិភាពសង្គម។ ជាមួយនឹងការទប់ស្កាត់បទល្មើសឆ្លងដែនគ្រប់ប្រភេទ អគ្គនាយកដ្ឋាន ក៏បានខិតខំសម្រួលបែបបទអន្តោប្រវេសន៍ឱ្យបានឆាប់រហ័ស ដើម្បីរួមចំណែកអនុវត្តគោលនយោបាយទេសចរណ៍របស់រាជរដ្ឋាភិបាលផងដែរ៕