ពីអតីតស្ត្រីបម្រើការលើយន្តហោះ ក្លាយជាប្រធានក្រុមហ៊ុន Japan Airlines

ក្រុមហ៊ុនអាកាសចរណ៍ Japan Airlines បានលើកស្ត្រីធ្វើជាប្រធានក្រុមហ៊ុនជាលើកដំបូង ហើយក៏ជាការតែងតាំងដ៏កម្រមួយសម្រាប់ក្រុមហ៊ុនជប៉ុនដ៏ធំ និងក្រុមហ៊ុនអាកាសចរណ៍ពិភពលោក ។ នេះបើយោងតាមការចេញផ្សាយរបស់សារពត៍មាន BBC កាលពីថ្ងៃទី២០ ខែមករាកន្លងទៅ ។

លោកស្រី Mitsuko Tottori នឹងជំនួសដំណែងលោក Yuji Akasaka ជាប្រធានានៅថ្ងៃទី១ ខែមេសា ឆ្នាំ២០២៤ ខាងមុខនេះ ខណៈលោក Akasaka នឹងជំនួសលោក Yoshiharu Ueki ជាប្រធានជាន់ខ្ពស់បំផុតរបស់ក្រុមហ៊ុនអាកាសចរណ៍នេះ ។

លោកស្រី Tottori បានចូលរួមជាមួយក្រុមហ៊ុនដឹកជញ្ជូនជប៉ុនក្នុងនាមជាអ្នកបម្រើការលើយន្តហោះក្នុងឆ្នាំ ១៩៨៥ ហើយលោកស្រីក្លាយជានាយកក្រុមអាកាសយានិកនៅក្នុងឆ្នាំ ២០១៥ ។ លោកស្រីសង្ឃឹមថា ការតែងតាំងរបស់លោកស្រីនឹងផ្តល់ឲ្យស្ត្រីដទៃទៀតនូវភាពក្លាហានដើម្បីបន្តជំហានទៅមុខក្នុងអាជីពរបស់ពួកគេ ។

ទោះបីជាមានការកែប្រែខ្លះក៏ដោយ ក្រុមហ៊ុនអាកាសចរណ៍ធំៗតិចតួចណាស់ដែលមានស្ត្រីនៅក្នុងមុខតំណែងជាអ្នកដឹកនាំជាន់ខ្ពស់ ហើយវាជារឿងកម្រណាស់សម្រាប់ស្ត្រីក្នុងការដឹកនាំក្រុមហ៊ុនធំៗនៅក្នុងប្រទេសជប៉ុន។

យោងតាមការស្ទង់មតិដោយគេហទំព័រឯកទេសអាកាសចរណ៍ FlightGlobal បានរកឃើញថា នៅចុងឆ្នាំ ២០២២ មានស្ត្រីចំនួន ១២ នាក់មានតំណែងដឹកនាំក្រុមហ៊ុនអាកាសចរណ៍កំពូលទាំង ១០០ ពោលកើនឡើងជាងកាលពី ៦ ឆ្នាំមុន ។

ទន្ទឹមនោះ វាក៏កំពុងជំរុញឲ្យអាជីវកម្មតែងតាំងស្ត្រីយ៉ាងហោចណាស់ម្នាក់ជានាយកប្រតិបត្តិនៅឆ្នាំ ២០២៥ ។ ស្ត្រីកាន់កាប់មុខតំណែងគ្រប់គ្រងនៅក្នុងប្រទេសជប៉ុនមានចំនួន ១៣.២ ភាគរយ ក្នុងឆ្នាំ ២០២១ ដែលជាចំនួនទាបបំផុតក្នុងចំណោមសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ៕

អត្ថបទ ៖ ប៊ុន សុភាព