មន្ត្រីជំនាញខេត្តកំពង់ចាម កំពុងស្វះស្វែងជួយ សង្គ្រោះស្រូវប្រាំងរបស់កសិករជាង ៣ពាន់ហិកតា

មន្ត្រីជំនាញខេត្តកំពង់ចាម កំពុងស្វះស្វែងជួយសង្គ្រោះស្រូវប្រាំងរបស់កសិករក្នុងភូមិសាស្ត្រ ខេត្តកំពង់ចាម លើផ្ទៃដីជាង ៣ពាន់ហិកតា ក្នុងស្រុកចំនួន៤ ដែលកំពុងប្រឈមការខ្វះខាតទឹកស្រោចស្រព នារដូវនេះ។

លោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម បានឱ្យដឹងថា មានស្រុកចំនួន៤ រួមមាន ស្រុកបាធាយ ស្រុកជើងព្រៃ ស្រុកកងមាស និងស្រុកកោះសូទិន ដែលកំពុងប្រឈមខ្វះខាតទឹកស្រោចស្រពស្រូវប្រាំងរបស់កសិករ ខណៈមន្ត្រីជំនាញ បានរួមសហការជាមួយអាជ្ញាធរមូលដ្ឋាន ខិតខំស្វះស្វែងរិះរកវិធីសាស្ត្រដោះស្រាយឱ្យទាន់ពេលវេលា ដើម្បីទាញយកប្រភពទឹកមកស្រោចស្រពនៅតាមតំបន់ដែលប្រឈម។ លោកប្រធានមន្ទីរ បញ្ជាក់ទៀតថា បច្ចុប្បន្នមន្ត្រីជំនាញ បានធ្វើការផ្សព្វផ្សាយបន្ថែមពីការប្រើប្រាស់ ដើម្បីផ្គត់ផ្គង់ទឹកស្រោចស្រពដល់ដីស្រែប្រាំងរបស់ប្រជាកសិករ។

បច្ចុប្បន្ន ដោយមានភក់ច្រើន និងរាក់ជាងមុន ប្រជាកសិករនៅខេត្តព្រៃវែង និងអាជ្ញាធរស្រុកកោះសូទិន បានស្ម័គ្រចិត្តរួមគ្នាមកកាយដីចេញពីមុខប្រព័ន្ធទ្វារទឹកទន្លេវៃកូ ផងដែរ។ សម្រាប់ដំណើរការបូមទឹក គឺចាប់ផ្ដើមតាំងពីថ្ងៃទី១ ខែកុម្ភៈ មកម្ល៉េះ ហើយរហូតមកដល់ពេលនេះ ការបញ្ជូនទឹកទៅជួយសង្គ្រោះស្រូវរបស់កសិករនៅខេត្តព្រៃវែង បានសម្រេចជាង ៧០ភាគរយ។ ដោយឡែក ចំពោះការចំណាយលើការបូមទឹកនេះ ជាបន្ទុករបស់រដ្ឋបាលខេត្តកំពង់ចាម៕

 អត្ថបទ និង រូបភាព ៖ ឡេក ចាន់ពេជ្រ