កម្ពុជាទទួលបានទឹកប្រាក់ជាង ៥៤៣ លានដុល្លារ ​ពីការនាំចេញគ្រាប់ស្វាយចន្ទីនៅត្រីមាសទី១ ឆ្នាំនេះ

នៅក្នុងរយៈពេល ៣ ខែ ឆ្នាំ ២០២៤ ​កម្ពុជាផលិតគ្រាប់ស្វាយចន្ទីឆៅជាង ៤០ ម៉ឺនតោន (៤៧៤ ០០០) ក្នុងនោះនាំចេញទៅវៀតណាមចំនួន ​៤២៤ ០០០ តោន គិតជាទឹកប្រាក់ ​៥៤៣ លានដុល្លារ ​កើនឡើង ១៣% បើធៀបនឹងរយៈពេលដូចគ្នានៅឆ្នាំ ២០២៣។ នេះបើតាមរបាយ​ការណ៍របស់​សមាគមស្វាយចន្ទីកម្ពុជា។

​លោក អួន ស៊ីឡុត ​​ប្រធានសមាគម​ស្វាយ​ចន្ទី​កម្ពុជាមានប្រសាសន៍នៅថ្ងៃទី ​១៩ ខែមេសា ឆ្នាំ ២០២៤នេះថា ​ការនាំចេញស្វាយចន្ទីរយៈពេល ៣ ខែដើមឆ្នាំនេះ មានការកើនឡើង ១៣% បើធៀបរយៈពេលដូចគ្នាកាលពីឆ្នាំមុន។

លោកបញ្ជាក់ថា ​ការកើនឡើងនេះ ​ដោយសារ​កាល​ពីដើមខែកុម្ភៈ ខណៈតម្លៃចន្ទីកំពុងដាំក្បាលចុះ ​សមាគមបានអំពាវ​នាវឱ្យ​សមាជិកដែល​មាន​លទ្ធភាព ហាល​គ្រាប់ចន្ទីទុក ដោយកុំលក់ប្រជែងជាមួយកសិករ ​ដើម្បីកុំឱ្យឈ្មួញបរទេស​ឆ្លៀតឱកាសទម្លាក់ថ្លៃ។

​លោក អួន ស៊ីឡុត ប្រាប់ថា ​នៅពេលដែលសមាជិកសមាគមចាប់ផ្ដើមហាលគ្រាប់ទុក ​ធ្វើឱ្យលំហូរគ្រាប់​ឆៅនាំ​ចេញទៅវៀតណាមធ្លាក់ចុះ​រហូតដល់ ៣២ ភាគរយក្នុងខែកុម្ភៈ ​លុះរហូតដល់ពាក់កណ្ដាលខែ ៣ តម្លៃចាប់រើបឡើងវិញ ​ខណៈបច្ចុប្បតម្លៃគ្រាប់សើមបានឡើងដល់ ៥ ០០០ រៀល ក្នុងមួយគីឡូក្រាម ជាតម្លៃខ្ពស់ជាងគេក្នុងរយៈពេល១៥ឆ្នាំនេះ។​ រីឯតម្លៃមធ្យមគ្រាប់ស្ងួត ១ ២០០ ដុល្លារ ក្នុង១តោន។

យោងតាមរបាយការណ៍សមាគមស្វាយចន្ទីកម្ពុជានៅឆ្នាំ ២០២៣ កម្ពុជាសម្រេចបាននូវការ​នាំចេញ​គ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹក​ប្រាក់​ចំនួន ៨៣៧ លានដុល្លារ បើប្រៀបធៀបឆ្នាំ ២០២២៕

អត្ថបទ៖ ឡេង ដេត