ក្រុមហ៊ុននាំចេញអង្ករ ចុះកិច្ចសន្យាទិញស្រូវផ្ការំដួល និងសែនក្រអូប០១ ពីកសិករជាង ៨០០ តោន

ក្រុមហ៊ុនអេមរុរ៉ាយស៍ និងក្រុមហ៊ុនសាជីវកម្មសហគមន៍កសិកម្មកម្ពុជា(CACC) នៅថ្ងៃទី ១៨ ខែកញ្ញា ឆ្នាំ ២០២៤ បានចុះកិច្ចសន្យាលើការផលិត និងផ្គត់ផ្គង់ស្រូវសរីរាង្គប្រភេទផ្ការំដួល និងសែនក្រអូប០១ ប្រមាណ ៨១៦តោន ជាមួយសហគមន៍កសិកម្មចំនួន៤ និងពូជគ្រឹះ ១៥​ តោន ជាមួយសហគមន៍កសិកម្មចំនួន១ នៃខេត្តកំពង់ឆ្នាំង ដែលសរុបទាំង៥សហគមន៍ ស្មើនឹងចំនួនអ្នកផលិតប្រមាណ២៧៣ គ្រួសារ មានផ្ទៃដីសរុប ៥៥៥ហិកតា។

ពិធីចុះកិច្ចសន្យាផលិតកម្មកសិកម្មនេះ ត្រូវបានរៀបចំឡើងក្រោមវត្តមាន លោក ប្រាក់ លាងហួរ អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង តំណាង ងិន ហ៊ុន ប្រធានមន្ទីរ, និងមានការចូលរួមពីលោកស្រី យឹម សុខា ប្រធានការិយាល័យកសិឧស្សាហកម្ម នៃមន្ទីរកសិកម្ម​ខេត្តកំពង់ឆ្នាំង, លោក ឆុង សុផល ប្រធានគម្រោង FNN, លោក កង ឃឿង ប្រធានគម្រោង​អេមរុរ៉ាយស៍ និងCACC រួមជាមួយនឹងវត្តមានរបស់ប្រធាន​ និងតំណាងសហគមន៍កសិកម្ម និងដៃគូពាក់ព័ន្ធនានាសរុបប្រមាណ២០រូប។

ពិធីចុះហត្ថលេខានេះ ត្រូវបានរៀបចំឡើងក្នុងគោលបំណងផ្សារភ្ជាប់ខ្សែច្រវ៉ាក់ផ្គត់ផ្គង់ស្រូវសរីរាង្គ និងការផលិតពូជគ្រឹះ ប្រភេទនាងអុក នាងអំ ម្លិះក្រហម និងស្រង៉ែ ក្នុងខេត្តកំពង់ឆ្នាំង រវាងស​ហគមន៍កសិកម្ម និងក្រុមហ៊ុនអេមរុរ៉ាយស៍ និង CACC និងដើម្បីធានាបាននូវទីផ្សារ​ដែល​មានស្ថិរភាព តម្លៃប្រកួតប្រជែង និងតម្លៃបុព្វលាភជូនដល់កសិករដែលផលិត​អនុលោមតាមស្តង់​ដារ​បទដ្ឋានសរីរាង្គ ដើម្បីលើកកម្ពស់ជីវភាពរបស់ប្រជាកសិករក្នុងតំបន់៕