ផ្លូវក្រវ៉ាត់បឹងតាកែវជាង១២គីឡូម៉ែត្រនឹងត្រូវ​ជួសជុលកែលម្អ 

រដ្ឋបាលខេត្តតាកែវ គ្រោងពង្រីក និងកែលម្អផ្លូវក្រវ៉ាត់បឹងតាកែវ ដើម្បីត្រៀមរៀបចំពិធីបុណ្យទន្លេនៅឆ្នាំ២០២៥។ មានប្រសាសន៍ក្នុងវេទិកាស្តីពីការអនុវត្តកំណែទម្រង់វិមជ្ឈការ និងវិសហមជ្ឈការរយៈពេល៣ឆ្នាំ (២០២១ ដល់ ២០២៣) នៅខេត្តតាកែវ​ ព្រឹកថ្ងៃទី១៩​ ខែវិច្ឆិកា​ ឆ្នាំ២០២៤ លោក​ វ៉ី សំណាង អភិបាលនៃគណៈអភិបាលខេត្តតាកវ​ បានថ្លែងថា ប្រមុខរាជរដ្ឋាភិបាលកម្ពុជា សម្រេចជ្រើសរើស ខេត្តតាកែវ សម្រាប់រៀបចំពិធីបុណ្យទន្លេ នៅបឹងតាកែវ ក្រុងដូនកែវ ចាប់ថ្ងៃទី១៤ ដល់ថ្ងៃទី ១៦ ខែមីនា ឆ្នាំ២០២៥។

ដូចនេះ​ អាជ្ញាធរខត្តក៏គ្រោងពង្រីកផ្លូវក្រវ៉ាត់បឹង ដែលមានប្រវែងជាង១២គីឡូម៉ែត្រ និងដាំកូនឈើសងខាងផ្លូវ ការពារការហូរច្រោះដី ក៏ដូចជា បង្កើនភាពស្រស់បំព្រង និងសោភ័ណ្ឌភាព ត្រៀមរៀបចំអបអរសាទរពិធីបុណ្យទន្លេ ក៏ដូចជា បានថែរក្សាការពារ​កុំ​ឱ្យមានអ្នក​​ទន្ទ្រាន​​ ដែលនាំបាត់បង់​ទំហំ​ផ្ទៃ​បឹងតាកែវ ដែលជាប្រភពទឹកដ៏មានសក្ដានុពលសំខាន់សម្រាប់ប្រជាជន៕

អត្ថបទ៖ វីរៈ