ព័ត៌មានជាតិ

ក្នុងរាជ្យព្រះបាទជ័យវរ្ម័នទី ៧ សំណង់មន្ទីរពេទ្យចំនួន ៤ សាងសង់តាមច្រកទិសធំៗទាំង ៤ ចេញចូលក្រុងអង្គរធំ

បានផុស

១ ខែ មុន

នៅ

ថ្ងៃសៅរ៍ ៣០ ឧសភា ២០២៦

ដោយ

យោងតាមសិលាចារឹកនៅប្រាសាទតាព្រហ្ម នៅក្នុងរាជ្យព្រះបាទជ័យវរ្ម័នទី ៧ អារោគ្យសាលាឬមន្ទីរពេទ្យ មានរហូតដល់ទៅ ១០២ កន្លែង ត្រូវបានសាងសង់នៅក្នុងតំបន់អង្គរ និងរាយប៉ាយតាមផ្លូវនានាចេញពីក្រុងអង្គរទៅកាន់ប្រជុំជនផ្សេងៗទៀត។

ក្នុងនោះនៅច្រកចេញចូលក្រុងអង្គរធំ អារោគ្យសាលាចំនួន ៤ កន្លែង ត្រូវបានសាងសង់នៅតាមទិសធំៗទាំង ៤ ដែលក្នុងនោះនៅទិសខាងជើងមានប្រាសាទទន្លេស្ងួត នៅទិសខាងត្បូងមានប្រាសាទព្រហ្មកិល នៅទិសខាងកើតមានប្រាសាទលាក់នាង និងនៅទិសខាងលិចមានប្រាសាទទ្រមូង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា សារិទ្ធ បុរាណវិទូនិងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សារាបានឲ្យដឹងថា ស្ថានភាពសំណង់អារោគ្យសាលាទាំងនោះសព្វថ្ងៃនៅសេសសល់តែហោបន់ស្រន់ (ប្រាសាទថ្ម) ប៉ុណ្ណោះ ព្រោះដោយសារសាងសង់ឡើងពីថ្មដែលអាចធន់នឹងអាកាសធាតុបានយូរអង្វែង។ ចំណែកឯអគារផ្សេងៗទៀតដូចជា ផ្ទះពេទ្យ ឃ្លាំង និងកន្លែងស្នាក់នៅរបស់អ្នកជំងឺ គឺបាត់បង់អស់ទៅហើយ ដោយសារតែសំណង់ទាំងនោះសាងសង់ពី ឈើ ឫស្សី ឬស្លឹក ដែលមិនអាចធន់នឹងអាកាសធាតុបាន។

លោក ជា សារិទ្ធ ក៏លើកឡើងពាក់ព័ន្ធប្រាសាទនាគព័ន្ធក៏ជាកន្លែងលាងជម្រះបាប និងជាមន្ទីរព្យាបាលរោគ ដោយយោងតាមសិលាចារឹកនិងចម្លាក់នៅលើហោជាងនៅប្រាសាទព្រះខ័ន។

បើតាមបុរាណវិទូនៃអាជ្ញាធរជាតិអប្សរា បច្ចុប្បន្នអ្នកអភិរក្សនិងអ្នកស្រាវជ្រាវ កំពុងតែបន្តការសិក្សាស្វែងយល់បន្ថែមអំពីស្លាកស្នាមរចនាសម្ព័ន្ធពិតប្រាកដរូបរាងនៃអារោគ្យសាលាឬមន្ទីរពេទ្យ ដែលអ្នកស្រាវជ្រាវយល់ថាប្រហែលជាត្រូវបានសាងសង់នៅជុំវិញហោបន់ស្រន់នៃមន្ទីរពេទ្យទាំងនោះ៕