ព័ត៌មានអន្ដរជាតិ

អាមេរិក ព្រមានចិន កុំមករញ៉េរញ៉ៃនៅព្រែកជីកប៉ាណាម៉ា

បានផុស

២ ខែ មុន

នៅ

ថ្ងៃពុធ ៩ មេសា ២០២៥

ដោយ

ក្នុងដំណើរទស្សនកិច្ចប្រទេសប៉ាណាម៉ាកាលពីថ្ងៃអង្គារទី៨ខែមេសាឆ្នាំ២០២៥ រដ្ឋមន្ត្រីការបរទេសអាមេរិក Pete Hegseth បានព្រមានខ្លាំងៗថា ទីក្រុងវ៉ាស៊ីនតោន នឹងមិនអនុញ្ញាតឲ្យចិន មករញ៉េរញ៉ៃនៅព្រែកជីកប៉ាណាម៉ា បានឡើយ ខណៈលោកប្រកាសថា ព្រែកជីកនេះ ប្រឈមការគំរាមកំហែងមិនដាច់។ ខ្លួនមិនព្រមឲ្យចិន ឬប្រទេសផ្សេងទៀត គំរាមកំហែងដល់ប្រតិបត្តិការ ឬសុចរិតភាពរបស់ព្រែកជីកនេះបានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការប្តេជ្ញាចិត្តរបស់សហរដ្ឋអាមេរិក ដើម្បីទប់ស្កាត់ការជ្រៀតជ្រែកពីបរទេស ជាពិសេសពីប្រទេសចិនតែម្តង មិនឲ្យធ្វើប្រតិបត្តិការនៅព្រែកជីកប៉ាណាម៉ា។ ជំហរនេះ ក៏គូសបញ្ជាក់ពីសារៈសំខាន់ជាយុទ្ធសាស្ត្ររបស់ព្រែកជីក និងឆ្លុះបញ្ចាំងពីក្តីព្រួយបារម្ភអំពីការពង្រីកឥទ្ធិពលរបស់ចិននៅក្នុងតំបន់ផងដែរ។

ដោយសារមានក្រុមហ៊ុនហុងកុងឈ្មោះ Panama Ports កំពុងដំណើរការកំពង់ផែចំនួនពីរនៅចុងព្រែកដែលតភ្ជាប់មហាសមុទ្រអាត្លង់ទិកនិងប៉ាស៊ីហ្វិកនោះ លោក Hegseth បញ្ជាក់យ៉ាងច្បាស់ថា ចិនមិនមែនសាងសង់ព្រែកជីកនេះទេ អ៊ីចឹងចិនមិនអាចធ្វើប្រតិបត្តិការនៅទីនេះបានឡើយ ហើយក៏មិនអាចយកព្រែកជីកនេះ ធ្វើជាអាវុធបានដែរ។

សូមជម្រាបថា តាំងពីចូលកាន់តំណែងប្រធានាធិបតីអាមេរិកអាណត្តិថ្មីមក លោក ដូណាល់ ត្រាំ តែងតែចិញ្ចឹមចិត្តដណ្តើមយកព្រែកជីកប៉ាណាម៉ា ដែលជាច្រករបៀងពាណិជ្ជកម្មដ៏សំខាន់មកកាន់កាប់ឡើងវិញ ហើយទាមទារឲ្យប៉ាណាម៉ាត្រូវធ្វើការផ្លាស់ប្តូរភ្លាមៗចំពោះអ្វីដែលលោកហៅថាជា «ឥទ្ធិពលនិងការគ្រប់គ្រង» របស់ប្រទេសចិននៅលើព្រែកជីកនេះ បើមិនដូច្នេះទេអាមេរិកនឹងចាត់វិធានការចាំបាច់ ដើម្បីការពារសិទ្ធិរបស់ខ្លួនក្រោមសន្ធិសញ្ញារវាងប្រទេសទាំងពីរ ឈានដល់ការគំរាមប្រើយោធាទៀតផង។

មិនត្រឹមប៉ុណ្ណឹង លោក ត្រាំ ថែមចោទប្រកាន់ប្រទេសប៉ាណាម៉ាពីរឿងគិតប្រាក់លើសកម្រិត ដើម្បីប្រើប្រាស់ផ្លូវទឹកពាណិជ្ជកម្មរបស់ខ្លួន ផងដែរ។

ព្រែកជីកប៉ាណាម៉ាត្រូវបានសហរដ្ឋអាមេរិកសាងសង់ភាគច្រើននិងគ្រប់គ្រងទឹកដីជុំវិញនោះ អស់រយៈពេលជាច្រើនទសវត្សរ៍មកហើយ។ វាមានប្រវែង៨២គីឡូម៉ែត្រ គឺជាផ្លូវទឹកដ៏សំខាន់ដែលតភ្ជាប់មហាសមុទ្រប៉ាស៊ីហ្វិកជាមួយមហាសមុទ្រអាត្លង់ទិក។

វាមានលក្ខណៈសម្បត្តិ កាត់បន្ថយពេលវេលាធ្វើដំណើររវាងតំបន់ទាំងពីរ និងជួយសម្រួលឲ្យកប៉ាល់ មិនបាច់ធ្វើដំណើរវាងទៅចុងភាគខាងត្បូងនៃតំបន់អាមេរិកខាងត្បូងឡើយ។ ប្រហែល ៥% នៃចរាចរណ៍ផ្លូវសមុទ្រពិភពលោក គឺឆ្លងកាត់ព្រែកជីកនេះជារៀងរាល់ឆ្នាំ៕

អត្ថបទ៖ សុខ សុវណ្ណ

ចុចអាន៖ ធ្លាយព័ត៌មានថា ត្រាំ ចង់ប្រើមធ្យោបាយយោធា ដើម្បីយក ព្រែកជីកប៉ាណាម៉ា មកគ្រប់គ្រង