លោក ម៉ិច សុខន គោរពជូនពរ ឯកឧត្ដម ហ៊ុន ម៉ាណែត ដែលត្រូវបានបំពាក់ឋានន្តរស័ក្ដិជា នាយឧត្ដមសេនីយ៍

លោក ម៉ិច សុខន នាយក និង​ម្ចាស់ក្រុមហ៊ុន សុខកាណ្ឌីកា ហ្គ្រីន ខូ អឹលធីឌី និង​ជា​អ្នក​បង្កើត​ពហុ​បច្ចេកវិទ្យា វិទ្យាសាស្ត្រ ត្រល់ខេម ប្រើ​បញ្ជូន​សំណាក ក្នុង​មជ្ឈមណ្ឌល​ព្យាបាល​កូវីដ-១៩ និង មន្ទីរពេទ្យ​នានា សូម​គោរព​ជូនពរ ឯកឧត្ដម នាយ​ឧត្ដមសេនីយ៍ ហ៊ុន ម៉ាណែត អគ្គ​មេបញ្ជាការ​រង នៃ​កងយោធពលខេមរភូមិន្ទ មេបញ្ជាការ​កងទ័ព​ជើងគោក ដែល​ទើបតែ​ទទួល​បាន​ការ​បំពាក់​ឋានន្តរស័ក្តិ​ជា «នាយ​ឧត្ដមសេនីយ៍»។

ពិធី​បំពាក់​ឋានន្តរស័ក្តិ ប្រព្រឹត្ត​ទៅ​ក្រោម​អធិបតីភាព​របស់ សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួង​ការពារ​ជាតិ នៅ​ទីស្ដីការ​ក្រសួង​ការពារ​ជាតិ កាលពី​ព្រឹក​ថ្ងៃ​ទី ២០ ខែ​មេសា ឆ្នាំ ២០២៣។

ការ​ដំឡើង ឋានន្តរស័ក្តិ​ថ្នាក់ «នាយ​ឧត្ដមសេនីយ៍» នេះ គឺ​ពិតជា​ស័ក្ដិសម​នឹង សមត្ថភាព ស្នាដៃ សមិទ្ធផល និង​ការ​លះបង់​ដ៏​ធំធេង​មិន​អាច​កាត់ថ្លៃ​បាន​របស់ ឯកឧត្ដម​បណ្ឌិត ក្នុង​ការ​ចូលរួម​អភិវឌ្ឍន៍ និង​ពង្រឹង​សមត្ថភាព​កងយោធពលខេមរភូមិន្ទ ក៏ដូចជា​ចូលរួម​ថែរក្សា ការពារ និង​អភិវឌ្ឍន៍​ជាតិ​កម្ពុជា ឲ្យ​កាន់តែ​ខ្លាំងក្លា និង​មាន​កេរ្តិ៍ឈ្មោះ​ល្បី​សុះសាយ​បន្តបន្ទាប់។

យើងខ្ញុំ​ទាំងអស់​គ្នា សូម​សម្ដែង​ការ​កោតសរសើរ និង​អរគុណ ចំពោះ​កិច្ច​ខិតខំ​ប្រឹងប្រែង​របស់ ឯកឧត្ដម​បណ្ឌិត ក្នុង​ការ​ការពារ​នូវ​សុខ​សន្តិភាព ស្ថិរភាព និង​ការ​អភិវឌ្ឍ​របស់​ប្រទេស​កម្ពុជា នា​ពេល​កន្លងមក បច្ចុប្បន្ន និង​សម្រាប់​ថ្ងៃ​អនាគត និង​សូម​បង្ហាញ​ជំហរ​គាំទ្រ ឯកឧត្ដម​បណ្ឌិត ជា​បេក្ខជន​នាយករដ្ឋមន្ត្រី​សម្រាប់​ថ្ងៃ​អនាគត​ផង​ដែរ។

ក្នុង​ឱកាស​ដ៏​មហា​នក្ខត្តឫក្ស​នេះ យើងខ្ញុំ​ទាំងអស់​គ្នា សូម​លើក​ហត្ថ​ប្រណម្យ​បួងសួង​ដល់​គុណ​ព្រះរតនត្រ័យ វត្ថុ​ស័ក្ដិសិទ្ធិ​ទាំងអស់​ក្នុង​លោក និង​ទេវតា​រក្សា​ព្រះរាជាណាចក្រ​កម្ពុជា សូម​ប្រសិទ្ធពរ​ជ័យ សិរី​មង្គល វិបុល​សុខ​គ្រប់ប្រការ បវរ​មហា​ប្រសើរ ជូន ឯកឧត្ដម​បណ្ឌិត ឲ្យ​ទទួល​បាន​នូវ​ជោគជ័យ​ថ្មីៗ​ថែមទៀត ក្នុង​ការ​បន្ត​ដឹកនាំ​មាតុភូមិ​កម្ពុជា ឆ្ពោះ​ទៅ​រក​សុខ​សន្តិភាព ស្ថិរភាព វិបុលភាព និង​អភិវឌ្ឍន៍​លើ​គ្រប់​វិស័យ។ សូម ឯកឧត្ដម​បណ្ឌិត និង​លោកជំទាវ ព្រមទាំង​ក្រុម​គ្រួសារ ប្រកបដោយ​ពុទ្ធពរ​ទាំង ៤ ប្រការ គឺ ៖ អាយុ វណ្ណៈ សុ​ខៈ និង​ពលៈ កុំបី​ឃ្លៀងឃ្លាត​ឡើយ។

សូម​ជម្រាប​ថា កាលពី​ថ្ងៃ​ទី ១៧ ខែ​មីនា ឆ្នាំ ២០២៣ ព្រះករុណា ព្រះបាទ​សម្ដេច ព្រះ​បរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា បាន​ចេញ​ព្រះរាជក្រឹត្យ​ត្រាស់បង្គាប់​ដំឡើង​ឋានន្តរស័ក្តិ «នាយ​ឧត្ដមសេនីយ៍» ជូន​ដល់ ឯកឧត្ដម ឧត្ដមសេនីយ៍​ឯក ហ៊ុន ម៉ាណែត នាយទាហាន​ថ្នាក់​ឧត្ដមសេនីយ៍ នៃ​កងយោធពលខេមរភូមិន្ទ៕