កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង នឹងចុះហត្ថលេខាមិនហួសខែតុលានេះ

កម្ពុជា និងសាធារណរដ្ឋកូរ៉េខាងត្បួងនឹងចុះហត្ថលេខាលើកិច្ចព្រមព្រៀងពាណិជ្ជកម្មសេរី (CKFTA) ជាផ្លូវការ មិនឲ្យហួសពីក្នុងខែតុលាខាងមុខនេះឡើយ បន្ទាប់ពីប្រទេសទាំងពីរបានធ្វើការចរចាអស់រយៈពេលជាង១ឆ្នាំមកនេះ។ ការយឺតយ៉ាវត្រូវបានអ្នកនាំពាក្យក្រសួងពាណិជ្ជកម្មពន្យល់ថា ភាគីទាំងពីរត្រូវការពេលវេលាដើម្បីផ្ទៀងផ្ទាត់ដោយយកចិត្តទុកដាក់ និងម្យ៉ាងទៀតដោយសារតែបញ្ហាកូវីដ-១៩។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានថ្លែងឲ្យដឹងថា បើមិនមានការប្រែប្រួលទេ កិច្ចព្រមព្រៀងពាណិជ្ជកម្មសេរី (CKFTA) រវាង កម្ពុជា និងសាធារណរដ្ឋកូរ៉េខាងត្បូងនឹងចុះហត្ថលេខាផ្លូវការ មិនឱ្យហួសពីក្នុងខែតុលានេះឡើយ។

ប្រទេសកម្ពុជា និងកូរ៉េខាងត្បូងបានចាប់ផ្តើមចរចា កិច្ចព្រមព្រៀងពាណិជ្ជកម្មសេរី ជាមួយគ្នាកាលពីខែកក្កដា ឆ្នាំ ២០២០ បន្ទាប់ពីភាគីទាំងពីរបានធ្វើការសិក្សាពីលទ្ធភាពជាដៃគូពាណិជ្ជកម្មមួយគ្នាអស់ជាច្រើនខែ គឺចាប់តាំងពីឆ្នាំខែវិច្ឆិកា ឆ្នាំ២០១៩ មកម៉្លេះ។

លោក ប៉ែន សុវិជាតិ បានលើកឡើងថា មុននឹងឈានដល់មានកិច្ចព្រមព្រៀងជាមួយគ្នា គឺអ្នកជំនាញបានសិក្សាយ៉ាងល្អិតល្អន់លើកិច្ចព្រមព្រៀងពាណិជ្ជកម្មសេរីនេះ គឺមានតែផលចំណេញគ្មានការខាតបង់ឡើយសម្រាប់កម្ពុជា។ បើតាមក្រសួងពាណិជ្ជកម្ម កិច្ចព្រមព្រៀងពាណិជ្ជកម្មសេរីរវាងកូរ៉េខាងត្បួង និងកម្ពុជានឹងជំរុញឱ្យកម្ពុជាអាចនាំចេញនូវផលិតផលជាច្រើនទៀតទៅកាន់សាធារណរដ្ឋកូរ៉េមានដូចជា សម្លៀកបំពាក់ កាបូប ស្បែកជើង គ្រឿងបន្លាស់រថយន្ត គ្រឿងអេឡិចត្រូនិច កៅស៊ូ និងផលិតផលកសិកម្មជាដើម រីឯការនាំចូលពីកូរ៉េមកវិញមាន យានយន្ត គ្រឿងអេឡិចត្រូនិក ឱសថ និងគ្រឿងសំអាងជាដើម។

កិច្ចព្រមព្រៀងពាណិជ្ជកម្មសេរីរវាងកម្ពុជា និងប្រទេសកូរ៉េខាងត្បូង (CKFTA) នឹងចូលជាធរមាននៅក្នុងអំឡុងខែតុលា ឆ្នាំ២០២១ បន្ទាប់​ពី​រដ្ឋមន្ត្រី​ពាណិជ្ជកម្ម​ប្រទេស​ទាំង​ពីរ​បាន​ប្រកាស​បញ្ចប់​ការ​ចរចា​ជា​ផ្លូវការ កាលពី​ព្រឹក​ថ្ងៃ​ទី​៣ ខែ​​កុម្ភៈ​ ឆ្នាំ២០២១។ គម្រោងនៃការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េនេះ ត្រូវបានលើកក្នុង ដំណើរទស្សនកិច្ចជាផ្លូវការរបស់លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ​នៅសាធារណរដ្ឋកូរ៉េ ពីថ្ងៃទី៦-៨កញ្ញា។

នៅក្នុង​ដំណើរទស្សនកិច្ចនោះលោក ប្រាក់ សុខុន បានជួបពិភាក្សាការងារជាមួយលោក ឆុង អើយយ៉ុង ដែលជារដ្ឋមន្ត្រីការបរទេសនៃសាធារណរដ្ឋកូរ៉េ។ ក្នុងជំនួបនោះ រដ្ឋមន្ត្រីការបរទេសទាំងពីរមានសុទិដ្ឋិនិយមថា កិច្ចព្រមព្រៀងពាណិជ្ជកម្ម​សេរីកម្ពុជា-សាធារណរដ្ឋកូរ៉េនឹងត្រូវចុះហត្ថលេខានៅដើមខែតុលាឆ្នាំ២០២១។ ភាគីទាំងពីរសង្ឃឹមថា កិច្ចព្រមព្រៀងពាណិជ្ជកម្មសេរីនេះនឹងជួយជំរុញពាណិជ្ជកម្ម និងការវិនិយោគទ្វេភាគីបន្ថែមទៀត ព្រមទាំងជួយពន្លឿនការស្តារសេដ្ឋកិច្ចនៃប្រទេសទាំងពីរឡើងវិញក្រោយវិបត្តិ កូវីដ-១៩។

កិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ CKFTA ​នឹង​ក្លាយ​ជា​កិច្ច​ព្រមព្រៀង​ពាណិជ្ជកម្ម​សេរី​ទី​២​ បន្ទាប់​ពី​ CCFTA ​រវាង​កម្ពុជា​និង​ចិន​។

កម្ពុជាគឺជាគោលដៅនាំចេញទី៦០ របស់សាធារណរដ្ឋកូរ៉េដែលមានទំនិញសំខាន់ៗ ដូចជា ភេសជ្ជៈ គ្រឿងអេឡិចត្រូនិក ឱសថ និងរថយន្តដឹកទំនិញ។ ចំណែកឯកម្ពុជា វិញបាននាំទំនិញទៅកូរ៉េខាងត្បូងភាគច្រើនគឺជា សម្លៀកបំពាក់ និងផលិតផលស្បែកជើង កាបូបជាដើម។

នៅក្រោមកិច្ចព្រមព្រៀង CKFTA និងកិច្ចព្រមព្រៀង RCEP កម្ពុជានឹងលើកលែងពន្ធប្រមាណ ៩៣,៨ភាគរយនៃផលិតផលនាំចូលពីកូរ៉េខាងត្បូង ហើយកូរ៉េខាងត្បូងនឹងលើកលែងពន្ធប្រមាណ ៩៥,៦ភាគរយលើផលិផលរបស់កម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្មកន្លងមក។

របាយការណ៍ពីក្រសួងពាណិជ្ជកម្មបានបង្ហាញថា ទំហំ​ពាណិជ្ជកម្ម​កម្ពុជា​-​កូរ៉េ ក្នុង​ឆ្នាំ​២០១៩ មាន​ប្រមាណ ១ ០៣២ លាន​ដុល្លា​រ។ ទំហំ​ពាណិជ្ជ​កម្មនេះបាន​កើនឡើង​ជិត ​២០​ភាគរយបើ​ធៀប​នឹង​ឆ្នាំ​២០១៨ និង​កើនឡើង ២៥៤​ភាគរយ បើ​ធៀប​នឹង​ឆ្នាំ​២០០៩ ដែលមាន​ប្រមាណ ២៩១ លាន​ដុល្លា​​។ ដោយឡែកនៅក្នុងឆ្នាំ២០២០ ទំហំពាណិជ្ជ កម្ម​ទ្វេភាគី​រវាង​ប្រទេសទាំងពីរ គឺសម្រេចបានជាង ៨៨៥លានដុល្លារប៉ុណ្ណោះ ពោលគឺមានការថយចុះប្រមាណ ១៨ភាគរយ ​ធៀប​នឹង​​ឆ្នាំ​២០១៩។

គួរបញ្ជាក់ថា ​ក្រៅពី​ប្រទេស​ចិន និង​សាធារណរដ្ឋកូរ៉េ រាជរដ្ឋាភិបាល​កម្ពុជាក៏បាន​បង្កើត​ក្រុមការងារ​ជំនាញ​ដើម្បី​សិក្សានិង​រៀបចំ​គោលនយោបាយយុទ្ធសាស្ត្រ​ចរចាក្នុងការ​បង្កើត​កិច្ចព្រមព្រៀង​ពាណិជ្ជកម្ម​សេរី ជាមួយ​ប្រទេស​ធំៗ​គោលដៅ​ចំនួន​៦​ទៀត​ ដែលក្នុងនោះមានសហភាព​សេដ្ឋកិច្ច​អឺ​រ៉ាស៊ី (EAEU) ជា​អង្គការ​សមាហរណកម្ម​ថ្នាក់​តំបន់​នៅ​អាស៊ី​ខាងលិច អាស៊ី​ខាងកើត និង​អាស៊ី​កណ្តាល​ ប្រទេស​អង់គ្លេស អាម៉េរិក ជប៉ុន ម៉ុង​ហ្គោ​លី និងឥណ្ឌា​៕

អត្ថបទ៖ ណារី