Connect with us

សេដ្ឋកិច្ច

មន្ត្រីជាន់ខ្ពស់សេដ្ឋកិច្ច៖ វិស័យ​សំណង់​ និង​អចលនទ្រព្យ​អាចងើបឡើងយឺតអូសបន្លាយយូរ ក្នុងឆ្នាំ ២០២៣​

បានផុស

នៅ

​ក្នុងឆ្នាំ២០២៣ វិស័យសំណង់នឹងស្ទុះឡើងត្រឹមកម្រិតរង្វង់១,១ភាគរយ ខណៈវិស័យអចលនទ្រព្យនឹងកើន​ឡើងក្នុងរង្វង់១,២។ សន្ទុះនៃភាពយឺតយ៉ាវរបស់វិស័យទាំងពីរនេះ ដោយសារតែកម្សោយនៃលំហូរ​វិនិយោគ​ទុនពីបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានលើកឡើងថា វិស័យសំណង់ និងអចលនទ្រព្យងើបឡើងយឺត និងតឹងណាស់ក្នុងឆ្នាំ ២០២៣នេះ ហើយការ​ងើបឡើងដ៏តឹងនេះ អាចអូសបន្លាយយូរទៀត ប្រសិនបើសកម្មភាពវិនិយោគពីក្រៅប្រទេសចូលមកយឺត ពិសេសវិនិយោគពីចិន។ លោក វង្សី វិស្សុត លើកឡើងបែបនេះ ​ នៅក្នុងវេទិកា​សាធារណៈ​ស្ដីពីការ​គ្រប់គ្រង​ម៉ាក្រូសេដ្ឋកិច្ច​ និង​ច្បាប់​ថវិកា​ជាតិ​ឆ្នាំ២០២៣ ​រៀបចំ​ឡើង​ដោយ​ក្រសួង​សេដ្ឋកិច្ច​និង​ហិរញ្ញវត្ថុ​ នៅថ្ងៃទី២៥​មករានេះ។​

មន្រ្តីជាន់ខ្ពស់រូបនេះ បានបន្តទៀតថា រាជរដ្ឋាភិបាលមានគោលនយោយបាយគាំទ្រក្រោមកិច្ចសហការពី​ធនាគារ​ជាតិកម្ពុជា ក្រសួងសេដ្ឋកិច្ច ពន្ធដា និងភាគីអ្នកវិនិយោគអចលនទ្រព្យ ចូលរួមដោះស្រាយរួមគ្នាលើបញ្ហានេះ។

លោកបណ្ឌិត គី សេរីវឌ្ឍន៍ អ្នកជំនាញ​សេដ្ឋកិច្ច​នៃ​រាជបណ្ឌិត​សភា​កម្ពុជា កត់សម្គាល់ឃើញថា ការទុំជោរ និងការឡើង​ដល់កម្រិតកំពូលនៃវិស័យអចលនទ្រព្យ នឹងមិនធ្វើឱ្យវិស័យនេះ​មានកំណើនខ្ពស់ប៉ុន្មានទៀតនោះទេ នៅឆ្នាំ ២០២៣នេះ។ ដោយលោកលើកឡើងថា«យើងកុំរំពឹងវិស័យនេះតទៅទៀត ដោយចាត់ទុកថា វាជាធាតុមួយថេរ »។ លោកមើលឃើញថា វិស័យនេះ មិនសូវមានឥទ្ធិពលខ្លាំងដូចកាល​ពីប៉ុន្មានឆ្នាំ​មុន ក្នុងការជួយជំរុញកំណើន​សេដ្ឋកិច្ចជាតិទៀតឡើយ។

ជាមួយគ្នានេះ លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ បានលើកឡើងថា វិស័យ​អចលនទ្រព្យ អាចនឹងត្រូវការពេលរហូត​ដល់ត្រីមាសទី៤ ឬចុងឆ្នាំនេះ ទើបអាចមានស្ថានភាពល្អប្រសើរខ្លះ។

លោកបន្តថា «បើទោះបីជាមានវិនិយោគចិនចូលមក ក៏មិនអាចជួយស្រោចស្រង់ស្ថានភាពដែលបានធ្លាក់ចុះ នៃបណ្តាឆ្នាំកន្លងមកបានលឿនដែរ ដូច្នេះត្រូវការពេលវេលា »។

ធនាគារជាតិនៃកម្ពុជា បានព្យាករថា ក្នុងឆ្នាំ ២០២៣នេះ វិស័យសំណង់ និងអចលនទ្រព្យ នឹងបន្តងើបឡើងសន្សឹមៗ ក្នុងអត្រា ១,៧% និង ១,៤% រៀងគ្នា ដែលគាំទ្រដោយកំណើនតម្រូវការក្នុងស្រុក ផ្តោតលើទីផ្សារអចលនទ្រព្យ លំនៅដ្ឋាន​ដែលមានតម្លៃសមរម្យ ខណៈដែលសំណង់ប្រភេទប្រណីតដែលបម្រើដល់តម្រូវការ អនិវេសជន ត្រូវការពេល​វេលា ដើម្បីអាចវិលត្រឡប់ទៅរកស្ថានភាពមុនពេលមានវិបត្តិ។

បើទោះជាវិស័យទាំងពីរ បន្តងើបឡើងយឺត តែវិស័យផ្សេងៗទៀត មានសញ្ញាល្អប្រសើរ ដូចជា វិស័ទេសចរណ៍ វិស័យកម្មន្តសាល និងវិស័យកសិកម្មជាដើម។ លោក វង្សី វិស្សុត បានសង្កត់ធ្ងន់ថា រាជរដ្ឋាភិបាល គ្រោងចំណាយថវិកាប្រមាណជិត ១០ពាន់លានដុល្លារ ដើម្បីទ្រ​ទ្រង់សេដ្ឋកិច្ចឆ្នាំ ២០២៣នេះ។ ក្នុងនោះចំណូលពីគយ និងពន្ធដារ មានចំនួនជាង ៧ពាន់២រយលានដុល្លារ ស្មើនឹង ៨០ភាគរយ។​​ កម្ចីពីបរទេសប្រមាណ ១ពាន់ ៦រយលានដុល្លារ, កម្ចីក្នុងស្រុក ២០០លានដុល្លារ និងប្រើប្រាស់ប្រាក់​សន្សំរបស់ជាតិចំនួន ៦០០លានដុល្លារ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

សេដ្ឋកិច្ច២ នាទី មុន

មន្ត្រីជាន់ខ្ពស់សេដ្ឋកិច្ច៖ វិស័យ​សំណង់​ និង​អចលនទ្រព្យ​អាចងើបឡើងយឺតអូសបន្លាយយូរ ក្នុងឆ្នាំ ២០២៣​

ព័ត៌មានជាតិ១០ នាទី មុន

រដ្ឋបាលខេត្តស្ទឹងត្រែង រៀបចំពីធីចូលកាន់មុខតំណែងថ្មីប្រធានមន្ទីររៀបចំដែនដី

ព័ត៌មានជាតិ១៤ នាទី មុន

ការពារ​ថ្ម​ប្រាសាទ អាជ្ញាធរជាតិអប្សរាធ្វើកម្រាលផ្លូវ​ថ្មើរ​ជើងថ្មី ជុំវិញ​បរិវេណ​ប្រាសាទអង្គរវត្ត

សេចក្ដីជូនដំណឹង១៤ នាទី មុន

សេចក្ដីជូនដំណឹងស្ដីពីការដេញថ្លៃជូនមន្ទីរធនធានទឹក និងឧតុនិយមខេត្តរតនគិរី សម្រាប់ឆ្នាំ ២០២៣

ព័ត៌មានអន្ដរជាតិ២៥ នាទី មុន

ឆ្នាំ ២០២២ ថៃ ទាញភ្ញៀវទេសចរបរទេសបានជាង ១១ លាននាក់ 

Sokha Hotels

ព័ត៌មានពេញនិយម