កម្ពុជាលើកទឹកចិត្តសាជីវកម្មហិរញ្ញវត្ថុអន្តរជាតិ សម្លឹងមើលឱកាសពង្រីកការវិនិយោគបន្ថែមនៅកម្ពុជា

បន្ថែមពីប្រតិបត្តិការលើវិស័យធនាគារ និងហិរញ្ញវត្ថុ កម្ពុជាបានលើកទឹកចិត្តដល់សាជីវកម្មហិរញ្ញវត្ថុអន្តរជាតិ (IFC) សម្លឹងមើលឱកាសពង្រីកការវិនិយោគរបស់ខ្លួនទៅលើវិស័យសក្តានុពលផ្សេងទៀតរបស់កម្ពុជា ដែលជាការចូលរួមចំណែកអភិវឌ្ឍសេដ្ឋកិច្ចកម្ពុជា។

ការលើកទឹកចិត្តដល់ស្ថាប័ន IFC ពេលនេះ បានធ្វើឡើងតាមរយៈលោកឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅក្នុងពេលដែលលោកទទួលជួបជាមួយលោកស្រី Towfiqua Hoque តំណាងសាជីវកម្មហិរញ្ញវត្ថុអន្តរជាតិ (IFC) ប្រចាំកម្ពុជា កាលពីព្រឹកថ្ងៃទី២៤ ខែមីនា ឆ្នាំ២០២៥ ដើម្បីស្វែងយល់ឱ្យកាន់តែស៊ីជម្រៅអំពីឱកាសពង្រីកការវិនិយោគនៅកម្ពុជា។

ឧបនាយករដ្ឋមន្ត្រីប្រចាំការ វង្សី វិស្សុត បានចែករំលែកពីសាវតា និងដំណើរការវិវត្តនៃវិស័យធនាគារ និងមីក្រូហិរញ្ញវត្ថុនៅកម្ពុជា ដោយបានភ្ជាប់នឹងការកោតសរសើរចំពោះកិច្ចខិតខំប្រឹងប្រែងរបស់សាជីវកម្មហិរញ្ញវត្ថុអន្តរជាតិ IFC ដែលបានចូលរួមចំណែកអភិវឌ្ឍសេដ្ឋកិច្ច ជាពិសេសក្នុងការវិនិយោគ និងវិស័យឯកជន។ ក្នុងន័យនេះ លោកឧបនាយករដ្ឋមន្ត្រីប្រចាំការ បានស្នើ និងជំរុញឱ្យ IFC សិក្សាពង្រីកប្រតិបត្តិការនៅកម្ពុជា ទាំងទំហំ និងវិសាលភាពវិនិយោគទៅលើវិស័យផ្សេងទៀតក្រៅពីវិស័យធនាគារ និងហិរញ្ញវត្ថុ។

តបនឹងការសំណើរខាងលើ លោកស្រី Towfiqua Hoque បានទទួលយក និងសន្យានាំសំណើរាយការណ៍ជូនថ្នាក់ដឹកនាំ IFC ដើម្បីពិនិត្យលទ្ធភាពពង្រីកប្រតិបត្តិការបន្ថែមទៀតនៅកម្ពុជា ដោយផ្ដោតលើវិស័យពាណិជ្ជកម្ម វិនិយោគ ហិរញ្ញវត្ថុ កសិកម្ម កសិ-ពាណិជ្ជកម្ម ឧស្សាហកម្ម ថាមពល ហេដ្ឋារចនាសម្ព័ន្ធ ឡូជីស្ទីក និងការដឹកជញ្ជូន។

លោកស្រី តំណាងសាជីវកម្មហិរញ្ញវត្ថុអន្តរជាតិ ក៏បានបង្ហាញការកត់សម្គាល់ឃើញរបស់លោកស្រីចំពោះវិស័យឯកជននៅកម្ពុជា គឺមានដំណើរការល្អ និងដោយរលូន ទាំងក្នុងវិស័យសហគ្រាសធុនតូច និងធម្យម (SMEs) និងក្នុងវិស័យកម្រិត Micro ពិសេសភាពរស់រវើកនៃប្រជាជនកម្ពុជា ក្នុងនាមជាសេដ្ឋកិច្ចកំពុងរីកចម្រើន។

ជាការចាប់អារម្មណ៍ ភាគីទាំងពីរក៏បានពិភាក្សាអំពីស្ថានភាពនៃវិស័យឥណទាន និងការធានាស្ថិរភាពហិរញ្ញវត្ថុ ក៏ដូចជាភាពមិនប្រាកដប្រជានៃស្ថានភាពភូមិសាស្ត្រនយោបាយនៅលើសាកលលោក។ ការណ៍នេះ គឺទាមទារនូវការបន្តពង្រឹងភាពជាដៃគូ និងកិច្ចសហប្រតិបត្តិការរវាង IFC និងកម្ពុជា ពិសេសលើការធ្វើពាណិជ្ជកម្ម។ នេះជាការបន្ថែមរបស់លោកឧបនាយករដ្ឋមន្ត្រីប្រចាំការ វង្សី វិស្សុត៕