លោក ឌិត ទីណា ជំរុញកសិករ​នៅជុំវិញកសិដ្ឋានគិរីសួគ៌​ដាំស្មៅបង្កើនចំណូល​អភិវឌ្ឍរួមគ្នា

រដ្ឋមន្រ្តីក្រសួងកសិកម្ម មានបំណងផ្សារភ្ជាប់ទំនាក់ទំនងរវាងកសិដ្ឋានគិរីសួគ៌ ជាមួយកសិករនៅជុំវិញកសិដ្ឋាន ដើម្បីទទួលបានប្រយោជន៍ ពីការវិនិយោគទាំងអស់គ្នា។

លោក ឌិត ទីណា រដ្ឋមន្ត្រីក្រសួងកសិកម្ម បានលើកឡើងថា ដើម្បីឱ្យការធ្វើវិនិយោគនៅក្នុងកសិដ្ឋាននេះ មិនត្រឹម​តែទទួលបានផលប្រយោជន៍សម្រាប់តែម្ចាស់កសិដ្ឋានខ្លួនឯងទេ ក្រៅពីការផ្តល់អាហារូបត្ថម្ភសម្រាប់ពលរដ្ឋ គឺអាច​ឱ្យកសិករនៅជុំវិញនេះ ទទួលបានផលប្រយោជន៍ពីការវិនិយោគនេះ ដូចគ្នា។ ប៉ុន្តែចំណុចសំខាន់​គឺការកសាង​ទំនុកចិត្តជាមុន ខ្ញុំនឹងធ្វើកិច្ចការងារនេះ ក្នុងនាមក្រសួងកសិកម្មដើម្បីសម្របសម្រួលសហការជាមួយគ្នា ដោយធានា​មិនបាត់ដី និងគ្មានការកេងផលប្រយោជន៍គ្នា។ នេះជាការបន្ថែមរបស់លោក ឌិត ទីណា។

លោករដ្ឋមន្រ្តីលើកឡើងបែបនះ នៅក្នុងដំណើរចុះត្រួតពិនិត្យផ្ទាល់អំពីវឌ្ឍនភាពកសិដ្ឋានគិរីសួគ៌ ស្ថិតនៅក្នុងស្រុកបាទី ខេត្តតាកែវ នាថ្ងៃទី ២៤ ខែកុម្ភៈ ឆ្នាំ ២០២៣។

លើសពីនេះទៀត លោក ឌិត ទីណា ជំរុញដល់កសិករឱ្យមានការធ្វើពិពិធកម្ម ដោយផ្លាស់ប្តូរពីការធ្វើស្រែមកដាំ​ស្មៅជំនួស​វិញ តាមបច្ចេកទំនើបរបស់កសិដ្ឋានគិរីសួគ៌។ លោកលើកឡើងដូច្នេះថា« ពេលខ្លះដាំស្មៅបាន​ផលជាងធ្វើស្រែ យើងអាចមិនជឿទេ ប៉ុន្តែដោយសារថា ដាំស្មៅមានបច្ចេកទេស មានប្រភេទពូជស្មៅដែល​មិនវិនិយោគអស់ច្រើន ស្មៅមួយចំនួនដាំម្តងទទួលផលបាន៥ឆ្នាំ ហើយមួយឆ្នាំច្រូត ៦ដង បើទោះជាតម្លៃស្មៅថោក​ជាងស្រូវពិតមែន តែស្រូវធ្វើបានតែពីរដងក្នុងមួយឆ្នាំប៉ុណ្ណោះ។

ទោះយ៉ាងណា លោក ឌិត ទីណា មើលឃើញថា ពលរដ្ឋមិនទុកចិត្តទៅលើការវិនិយោគដាំស្មៅជំនួសស្រូវនោះទេ។ ប៉ុន្តែលោកអះអាងថា នឹងព្យាយាមធ្វើការជាមួយកសិករ ចងក្រងផ្តល់ទំនុកចិត្ត ដើម្បីការអភិវឌ្ឍកាន់តែខ្លាំង។ លោកសង្កត់ធ្ងន់ថា អ្នកដែលចាប់យកឱកាសមុនគេ នឹងទទួលបានផ្តល់ប្រយោជន៍មុនគេដែរ។

លោក ជី សិលា សហស្ថាបនិកកសិដ្ឋានគិរីសួគ៌ គាំទ្រចំពោះការលើកឡើងរបស់លោករដ្ឋមន្រ្តីក្រសួងកសិកម្ម ដែលចង់ឱ្យមានការវិនិយោគរួមគ្នា ដើម្បីផលប្រយោជន៍ទាំងកសិករ និងក្រុមហ៊ុន។ លោកបន្តថា ក្រុមហ៊ុនបាន​ធ្វើកិច្ចការមួយចំនួនជាមួយសហគមន៍កសិករព្រៃកប្បាស ដែលមានចម្ងាយប្រមាណ ២០គីឡូម៉ែត្រពីកសិដ្ឋានគិរីសួគ៌ ដើម្បីសិក្សាលើការដាំស្មៅ ដោយសារសហគមន៍នេះ មានភូមិសាស្រ្តល្អ ទាំងប្រភពទឹក និងដី។

លោក បញ្ជាក់ថា ប្រសិនបើតំបន់ណា ដែលធ្វើស្រែមិនបានផលល្អ អាចងាកមកដាំស្មៅវិញ ទទួលបានចំណូលខ្ពស់។ លោក ជី សិលា លើកឡើងដូច្នេះថា« ស្មៅស្រួលដាំ ហើយដាំម្តងច្រូតបាន៦ដងក្នុងមួយឆ្នាំ ដោយដាំរយៈពេល ៦០ថ្ងៃ អាចច្រូតបាន ហើយអាចប្រមូលផលបាន៥ឆ្នាំ​។ បើតាមលោក ជី សិលា ក្នុង១ឆ្នាំ កសិករអាចប្រមូលផលបាន ៤០០ទៅ ៥០០តោន ពីការដាំដុះស្មៅ ក្នុងនោះ ក្នុងមួយតោន អាចរកចំណូលបានចន្លោះពី ៣០ទៅ ៤០ដុល្លារ។

ពាក់ព័ន្ធនឹងកិច្ចការនេះ លោក ជី សិលា បានអះអាងថា លោកនឹងព្យាយាមចំណាយពេលឱយបានច្រើនជាមួយកសិករ ជាពិសេសអ្នករស់នៅជុំវិញកសិដ្ឋានគិរីសួគ៌ ដែលធ្វើស្រែ ឬមានដីទំនេរ អាចសហការដាំដុះស្មៅ ដើម្បីទទួលបានប្រាក់​ចំណេញជាជាងទុកដីទំនេរចោល៕