មតិចង់ឱ្យបញ្ចូលកសិកម្ម អភិវឌ្ឍន៍ជនបទ ធនធានទឹក ជាក្រសួងតែមួយ សម្ដេចធិបតី ថា មិនចាំបាច់

បញ្ជាក់ទៅកាន់មតិយោបល់ដែលចង់ឱ្យបញ្ចូលក្រសួងកសិកម្ម ក្រសួងអភិវឌ្ឍន៍ជនបទ និងក្រសួងធនធានទឹក ទៅជាក្រសួងតែមួយ សម្ដេចធិបតី ហ៊ុន ម៉ាណែត ថា មិនចាំបាច់។ តែភាពចាំបាច់ គឺកិច្ចសហការល្អរវាងក្រសួងទាំង៣។

សម្ដេចធិបតី លើកឡើងដូច្នេះថា៖«ខ្ញុំចុះទៅខេត្តកំពង់ធំ នាំរដ្ឋមន្ត្រី៣ កសិកម្ម អភិវឌ្ឍន៍ជនបទ និងធនធានទឹក មានអ្នកលើកយោបល់ឱ្យខ្ញុំ សម្ដេចបង្រួម៣ហ្នឹងជាមួយគ្នាទៅ»។ តែជាការឆ្លើយតបនឹងយោបល់នេះ សម្ដេចធិបតីនាយករដ្ឋមន្ត្រី ថា របៀបរបបកម្ពុជាផ្សេង ពោលគឺក្រសួងទាំង៣នេះនៅរក្សាដដែល គ្រាន់តែទាមទារនូវការពង្រឹងបន្ថែម តាមរយៈការសម្រួលតួនាទីភារកិច្ច ផ្ដល់កិច្ចសហការល្អរវាងក្រសួងទាំង៣ ឱ្យកាន់តែរឹងមាំ និងប្រសិទ្ធភាព។

ថ្លែងក្នុងឱកាសអញ្ជើញបិទសន្និបាតការងាររបស់ក្រសួងមុខងារសាធារណៈ នាព្រឹកថ្ងៃទី២០ ខែមីនា ឆ្នាំ២០២៥ សម្ដេចធិបតី គូសបញ្ជាក់ថា រាជរដ្ឋាភិបាលនីតិកាលទី៧ ដែលមានក្រសួងមុខងារសាធារណៈ ជាសេនាធិការ បានធ្វើការងារកែទម្រង់ជាច្រើន ដើម្បីប្រសិទ្ធភាព និងនិរន្តរភាពការងារ ដោយផ្អែកលើគោលការណ៍ពង្រឹង ជាជាងពង្រីក ក៏ប៉ុន្តែមិនបង្រួមក្រសួងស្ថាប័នដូចការលើកឡើងរបស់មជ្ឈដ្ឋានមួយចំនួននោះឡើយ។

សម្ដេចធិបតី បន្ថែមថា ការងារកំណែទម្រង់មិនងាយស្រួលពេកនោះទេ ប៉ុន្តែប្រសិទ្ធភាពនៃការកំណែទម្រង់តាមប្រទេសនីមួយៗមានភាពខុសគ្នា ស្របតាមស្ថានភាពជាក់ស្តែងនៃប្រទេសរៀងៗខ្លួន។ តួយ៉ាង សម្រាប់កម្ពុជា ការបង្រួម ឬកាត់បន្ថយក្រសួងស្ថាប័ន មិនមែនជាការចាំបាច់ឡើយ។

ផ្ទុយទៅវិញ កម្ពុជាអនុវត្តវិធីសាស្រ្ដផ្សេង ដើម្បីដឹកនាំវិស័យមុខងារនេះឱ្យមានប្រសិទ្ធភាព គឺគោលការណ៍ពង្រឹងជាជាងពង្រីក ដែលសំដៅធានាមិនឱ្យមានការពង្រីកចំនួនមន្រ្ដីរាជការដែលមិនចាំបាច់។ នេះជាការបញ្ជាក់របស់សម្ដេចនាយករដ្ឋមន្ត្រី ដដែល៕

ដោយ៖ ធឿន វ៉ាន់សុង