ក្រុមហ៊ុនចំនួន ៥៦ មកពីខេត្តក្វាងស៊ីប្រទេសចិន​កំពុងវិនិយោគនៅកម្ពុជា

គិតត្រឹមខែធ្នូ ឆ្នាំ២០២២ ក្រុមហ៊ុនមកពីខេត្តក្វាងស៊ីប្រទេសចិន ចូលមកវិនិយោគនៅកម្ពុជា មានប្រមាណ ៥៦ក្រុមហ៊ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក ទំហំពាណិជ្ជកម្មទ្វេភាគីកម្ពុជា និងខេត្តក្វាងស៊ី នៅក្នុងឆ្នាំ២០២២ កន្លងទៅមានទឹកប្រាក់ចំនួន ១.៩៧០ លានយន់ កើនឡើង ៨៨.២% ធៀបនឹងឆ្នាំ២០២១ ក្នុងនោះ ខេត្តក្វាងស៊ី នាំចេញមកកម្ពុជា មានចំនួន ១.៨៦០ លានយន់ កើនឡើង ៨៨.៥% រីឯ កម្ពុជានាំចេញទៅខេត្តក្វាងស៊ី មានចំនួន ១១០ លានយន់ កើនឡើង ៨៥.៣%។

ទំនិញសំខាន់ៗដែលខេត្តក្វាងស៊ី នាំចូលមកកម្ពុជាមាន រួមមាន៖ គ្រឿងបន្លាស់ម៉ាស៊ីនត្រង់ស្វូរ ម៉ាស៊ីន បិទស្រា ម៉ាស៊ីនរុំខ្សែ ជីកសិកម្ម ទុយោចរន្តអគ្គិសនី ឧបករណ៍បញ្ជូនអុបទិកជាដើម ។ ចំណែកកម្ពុជានាំចេញទៅខេត្តក្វាងស៊ីវិញ រួមមាន៖ អង្ករ ដំឡូងមីស្ងួត ម្សៅដំឡូងមី ផលិតផលកសិកម្ម ឧបករណ៍ទប់ចរន្តអគ្គីសនី និងម៉ាស៊ីនត្រង់ស្វូរ។ នេះបើតាមការលើកឡើងរបស់លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅក្នុងជំនួបពិភាក្សាការងារ​ជាមួយ​លោក ឡាន ធានលី អភិបាលខេត្តក្វាងស៊ី នៃសាធារណរដ្ឋប្រជាមានិតចិន កាលពីរសៀលថ្ងៃទី ២១ មេសា ឆ្នាំ ២០២៣។

លោក ឡាន ធានលី បានមកបំពេញទស្សនកិច្ចផ្លូវការនៅកម្ពុជាចាប់ពីថ្ងៃទី២០-២២ ខែមេសា ឆ្នាំ២០២៣នេះ ដើម្បីបន្តពង្រឹងកិច្ចសហប្រតិបត្តការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ ប្រជាជន និងប្រជាជន រវាងកម្ពុជា និងខេត្តក្វាងស៊ីផង និងដើម្បីអញ្ជើញមន្រ្តីជាន់ខ្ពស់នៃរាជរដ្ឋាភិបាលកម្ពុជា ទៅចូលរួមពិព័រណ៍ចិន អាស៊ាន លើកទី២០ ដោយផ្ទាល់ ដែលនឹងប្រព្រឹត្តទៅចាប់ពីថ្ងៃទី១៦-២០ ខែកញ្ញា ឆ្នាំ២០២៣ នៅក្នុងទីក្រុងណាននីង នៃតំបន់ស្វយ័តក្វាងស៊ី នៃសាធារណរដ្ឋប្រជាមានិតចិនផង។

រដ្ឋមន្រ្តីក្រសួងពាណិជ្ជកម្មកម្ពុជា បានត្រៀមលក្ខណៈរួចរាល់ក្នុងការកៀរគរក្រុមហ៊ុនឯកជនឱ្យបានច្រើន​ទៅចូលរួម​ពិព័រណ៍ចិន-អាស៊ានលើកទី២០ ឆ្នាំ២០២៣ ខាងមុខនៅទីក្រុងណាននីង ហើយក្នុងអំឡុងពេលពិព័រណ៍ ក្រសួងក៏នឹងមានរៀបចំ វេទិកាធុរកិច្ច វិនិយោគ និងទេសចរណ៍កម្ពុជា-ចិន ផងដែរ។ លោករដ្ឋមន្រ្តី បានស្នើសុំដល់ភាគីមិត្តចិនផ្តល់ការគាំទ្រ និងជួយជំរុញឱ្យពាណិជ្ជករ សមាគមអាជីវកម្មចិន នៅខេត្តក្វាងស៊ី ចូលរួមក្នុងវេទិកាខាងលើឱ្យបានច្រើន ដើម្បីទទួលបានព័ត៌មានថ្មីៗ​ស្តីពីកាលានុវត្តភាពនៃការធ្វើ​ជំនួញនៅកម្ពុជា។

នៅក្នុងជំនួបនេះដែរ លោករដ្ឋមន្រ្តី ប៉ាន សូរស័ក្តិ បានលើកឡើងថា កម្ពុជា-ចិន បានក្លាយជាដៃគូយុទ្ធសាស្រ្ត និងកិច្ចសហប្រតិបត្តិការគ្រប់ជ្រុងជ្រោយចាប់តាំងពីឆ្នាំ២០១០ កន្លងមក ហើយ កម្ពុជាបានគាំទ្រចំពោះ​គំនិតផ្តួចផ្តើមបង្កើតផ្លូវសូត្រខ្សែក្រវាត់សេដ្ឋកិច្ច និងផ្លូវសូត្រសមុទ្រសតវត្សរ៍ទី២១ (The Silk Road Economic Belt and The 21st Century Maritime Silk Road) របស់រដ្ឋាភិបាលចិន តាំងពីឆ្នាំ២០១៦ កន្លងមក។ តាមរយៈគោលនយោបាយនេះ រដ្ឋាភិបាលនៃប្រទេសទាំងពីរ បានធ្វើកិច្ចសហប្រតិបត្តិការ និងអភិវឌ្ឍន៍រួមគ្នា​លើវិស័យសំខាន់ៗជាច្រើន ដូចជា៖ វិស័យហេដ្ឋារចនាសម្ព័ន្ធ កសិកម្ម ពាណិជ្ជកម្ម ការកសាងធនធានមនុស្ស ការអភិវឌ្ឍន៍តំបន់សេដ្ឋកិច្ចពិសេស ការផ្លាស់ប្តូរវប្បធម៌ ទេសចរណ៍ និងការការពារបរិស្ថាន ហើយកាលពីថ្ងៃទី១ ខែមករា ឆ្នាំ ២០២១ កន្លងទៅ រដ្ឋាភិបាលនៃប្រទេសទាំង២ បានចុះហត្ថលេខាលើកិច្ចព្រមព្រៀង​ពាណិជ្ជកម្មសេរី​ទ្វេភាគីកម្ពុជា-ចិន ដែលតាមការរំពឹងទុកកិច្ចព្រមព្រៀងពាណិជ្ជកម្មសេរីទ្វេភាគីនេះ នឹងជួយជំរុញទំហំ​ពាណិជ្ជកម្មរវាងប្រទេសយើងទាំងពីរ ឱ្យកាន់តែរីកចម្រើនមួយកម្រិតថែមទៀត៕