សេដ្ឋកិច្ច

មន្ត្រីជាន់ខ្ពស់ក្រសួងការងារ រំពឹងថា វិស័យកាត់ដេរកម្ពុជា ក្នុងឆ្នាំ ២០២៤ នឹងមានភាពល្អប្រសើរឡើងវិញ

បានផុស

៨ ខែ មុន

នៅ

ថ្ងៃអង្គារ ១៦ មករា ២០២៤

ដោយ

លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញក្ដីរំពឹងថា វិស័យកាត់ដេររបស់កម្ពុជា ក្នុងឆ្នាំ ២០២៤ នឹងមានភាពល្អប្រសើរឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈកិច្ចសម្ភាសន៍ពិសេស ក្រោមប្រធានបទស្ដីពី «ស្ថានភាពវិស័យកាត់ដេរកម្ពុជាក្នុងឆ្នាំ ២០២៤» លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់ឲ្យ កម្ពុជាថ្មី ដឹងថា ចំពោះបរិបទ នៃកំណើនសេដ្ឋកិច្ចទូទៅទូទាំងប្រទេស បើតាមការវាយតម្លៃរបស់ធនាគារពិភពលោក,ធនាគារអភិវឌ្ឍន៍អាស៊ី ក៏ដូចជា មូលនិធិរូបិយវត្ថុអន្តរជាតិ បានវាយតម្លៃថា នៅប្រទេសកម្ពុជា ក្នុងឆ្នាំ ២០២៤ អាចមានកំណើន ៦.៦ ភាគរយ។ ក្នុងនោះ វិស័យឧស្សាហកម្ម នឹងកើនឡើង ៨.៥ ភាគរយ និង វិស័យសេវាកម្ម នឹងកើនឡើង ៦.៩ ភាគរយ។ ដូច្នេះ នៅប្រទេសកម្ពុជា វិស័យកាត់ដេរ មានការកើនឡើង ដោយសារវិស័យនេះ ជាផ្នែកមួយ នៃវិស័យឧស្សាហកម្ម។

លោក កត្តា អ៊ន បានបន្តថា ទោះយ៉ាងណាក៏ដោយ ប្រទេសកម្ពុជា អាចមានការប្រឈមខ្លះ នៅត្រីមាសទី ១ នេះ ចាប់ពីខែមករា រហូតដល់ខែមីនា។ លោក បន្ថែមថា «ចុងខែមីនា នេះ យើងមានការប្រឈមខ្លះ ឧទាហរណ៍ដូចជា ការនាំចូលវត្ថុធាតុដើម គឺយើងមានការធ្លាក់ចុះខ្លះ ពីព្រោះប្រទេសដែលផលិតវត្ថុធាតុដើម កំពុងតែដណ្ដើមគ្នាខ្លាំងណាស់ អញ្ចឹងទីផ្សារមិនមែនមានតែកម្ពុជាមួយទេ គឺប្រទេសប្រកួតប្រជែង មានដូចជា នេប៉ាល់ ស្រីលង្កា មីយ៉ាន់ម៉ា ថៃ វៀតណាម ក៏គេនាំចូលដូចយើងដែរ។ អញ្ចឹងការបន្តធ្លាក់ចុះនូវការនាំចូលនោះ គឺ ក្នុងត្រីមាសទី ១ ឆ្នាំ ២០២៤ នេះ អាចមាន ៩ ភាគរយ។ អញ្ចឹង ក្នុងរយៈពេល ១១ ខែ ឆ្នាំ ២០២៣ ៩ ភាគរយ វាអាចនឹងបន្តការធ្លាក់ចុះ រហូតដល់ដើមឆ្នាំ ២០២៤ ទៀត»។

បើតាម លោក កត្តា អ៊ន កម្ពុជា រំពឹងថា នៅឆ្នាំ ២០២៤ នេះ អ្វីៗ គឺបានងើបឡើងវិញទាំងអស់នូវវិស័យកាត់ដេរ ពីព្រោះសេដ្ឋកិច្ចប្រទេសដែលកម្ពុជានាំចេញផលិតផលកាត់ដេរ ដូចជា អឺរ៉ុប និងអាមេរិក អាចនឹងកើនឡើងក្នុងឆ្នាំ ២០២៤ នេះដែរ។ បន្ថែមពីលើនោះ នៅឆ្នាំ ២០២៣ ក្រុមប្រឹក្សាភិបាលអភិវឌ្ឍន៍កម្ពុជា (CDC) បានអនុម័តគម្រោងថ្មី ២៤៧ គម្រោង ហើយក្នុងនោះឃើញថា វិស័យឧស្សាហកម្ម ៩៧ ភាគរយ ក្នុងចំណោមគម្រោងវិនិយោគ ១៦៦,៨ លានដុល្លារ ឯណោះ។

លោក កត្តា អ៊ន បន្តទៀតថា «អញ្ចឹង ខ្ញុំ រំពឹងថា ទោះបីជាយើងមិនទាន់មានតួលេខច្បាស់ក៏ដោយ ក៏យើងរំពឹងថា កំណើនសេដ្ឋកិច្ច ៦.៦ ភាគរយ ជាទូទៅ វិស័យឧស្សាហកម្ម កើនឡើង ៩៧ ភាគរយ វិស័យកាត់ដេរយើងនឹងកើនឡើង»។

ជាមួយគ្នានោះ លោក កត្តា អ៊ន ក៏បានអំពាវនាវជាថ្មីដល់កម្មករ-និយោជិត ចុះឈ្មោះចូលរៀនក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដែល សម្ដេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅនេះ ក្នុងទិសដៅកសាងមូលធនធនធានមនុស្សឲ្យបាន ១ លាន ៥ សែននាក់។ ចំណុចនេះ គឺ រាជរដ្ឋាភិបាល បានគិតគូរច្បាស់ណាស់អំពីការព្យាករណ៍ទុក នៃកំណើនសេដ្ឋកិច្ច (២០២៣- ២០២៤) គឺ វិស័យឧស្សាហកម្មត្រូវការកម្លាំងពលកម្ម៕

អត្ថបទ ៖ ពិសី