ក្រុមហ៊ុនចិន បង្ហាញឆន្ទៈបង្កើតរោងចក្រអគ្គិសនីនៅកម្ពុជា

ក្រុមហ៊ុន Guangdong Shaoneng Group Co.,Ltd ចង់ធ្វើទស្សនកិច្ចនៅកម្ពុជា ដើម្បីប្រមូល​ព័ត៌មាន​ពាក់ព័ន្ធ ក្នុងការឈានទៅបង្កើតរោងចក្រ អគ្គិសនី Biomass។

តាមការអញ្ជើញរបស់ក្រុមហ៊ុន Guangdong Shaoneng Group Co.,Ltd លោក ឡៅ ងួន អេង អនុព័ន្ធពាណិជ្ជកម្មអមស្ថាន​អគ្គកុងស៊ុលកម្ពុជាប្រចាំទីក្រុងក្វាងចូវ នៃខេត្តក្វាងទុង សាធារណ​រដ្ឋប្រជាមានិតចិន នៅថ្ងៃទី ១០ ខែវិច្ឆិកា បានចុះជួបពិភាក្សាការងារ និងធ្វើទស្សន​កិច្ចរោង​ផលិតអគ្គិសនី Shaoneng នៅទីក្រុងសាវក្វាន នៃខេត្តក្វាងទុង សាធារណរដ្ឋ​ប្រជា​មានិតចិន ដែលមានរោងចក្រផលិតថាមពលអគ្គិសនីដ៏ធំមួយរបស់រដ្ឋ សម្រាប់​ផ្គត់ផ្គង់​ជូនរោងចក្រ សហគ្រាស និងផលិតកម្មនានានៅក្នុងខេត្តក្វាងទុង។

ភាគីក្រុមហ៊ុនបានបង្ហាញពីឆន្ទៈក្នុងការទៅបង្កើតរោងចក្រអគ្គិសនី Biomass នៅកម្ពុជា និងមានបំណងទៅទស្សនកិច្ចការងារនៅកម្ពុជា និងជួបពិភាក្សាជាមួយក្រសួង​ពាណិជ្ជកម្ម និងក្រសួងរ៉ែនិងថាមពលកម្ពុជា ដើម្បីប្រមូលព័ត៌មាន និងទិន្នន័យពាក់ព័ន្ធការ​ផលិតអគ្គិសនី​ដោយប្រើធាតុចូល Biomass៕