ជើងហោះហើរនៅព្រលានយន្តហោះភ្នំពេញ ត្រៀមផ្ទេរទៅអាកាសយានដ្ឋានថ្មីនៅខែកក្កដា ឆ្នាំ ២០២៥

រដ្ឋលេខាធិការដ្ឋានអាកាសចរណ៍​ស៊ីវិល បានកំណត់​ពេលវេលាបើកដំណើរការ​អាកាសយានដ្ឋាន​អន្តរជាតិ​តេជោ (TIA) នៅក្នុងខែកក្កដា ឆ្នាំ ២០២៥ ដែលជាការបើកដំណើការដំណាក់កាលទី១ ក្នុងការបើកផ្លូវស្វាគមន៍ភ្ញៀវទេចរអន្តរជាតិមកពីគ្រប់ទិសទីទាំងក្នុងតំបន់ និងសកលលោក។

លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិល នៅព្រឹក​ថ្ងៃ​ទី ១៨ ខែធ្នូ ឆ្នាំ ២០២៤​ បានចុះពិនិត្យការដ្ឋានសាងសង់​អាកាសយានដ្ឋាន​អន្តរជាតិ​តេជោ ព្រម​ទាំ​ងបើកកិច្ចប្រជុំអំពីវឌ្ឍនភាព និងការបញ្ចប់គម្រោងផ្សេងៗ នៅក្នុងអាកាស​យាន​ដ្ឋាន​​អន្តរ​ជាតិ​តេជោ។

លោកឧកញ៉ា ឆារស៍ វ៉ាន់ អភិបាលក្រុមហ៊ុន CAIC បានថ្លែងឱ្យដឹងថា ដំណើរការសាងសង់អាកាសយានដ្ឋានអន្តរជាតិតេជោ សម្រេចតាមផែនការ ខណៈលោករដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍​ស៊ីវិល បានកំណត់​ពេលវេលាបើកដំណើរការព្រ​លានយន្តហោះថ្មីនេះ នៅក្នុងខែកក្កដា ឆ្នាំ ២០២៥។

លោកឧកញ៉ា ឆារស៍ វ៉ាន់ បានថ្លែងឱ្យដឹងថា នៅពេលដែលអាកាសយានដ្ឋានអន្តរជាតិតេជោ បើកដំណើរការនៅឆ្នាំ ២០២៥ ក្រុមហ៊ុនអាកាសចរណ៍នៅអាកាសអន្តរជាតិភ្នំពេញ (ពោធិ៍ចិតុង) នឹងត្រូវផ្ទេរទៅព្រលានថ្មីទាំងអស់ដែលមានប្រមាណជាង ៣០ ក្រុមហ៊ុន ហើយអាកាសចរណ៍ស៊ីវិល និងព្រលានយន្តហោះអន្តរជាតិតេជោ ក៏កំពុងសហការ​ទាក់​ទាញ​បង្កើន​ជើងហោះហើរបន្ថែមទៀត។

គិតត្រឹមថ្ងៃទី ខែធ្នូ ​ឆ្នាំ ២០២៤ ​គម្រោងសាងសង់អាកាសយានដ្ឋានអន្តរជាតិតេជោ (TIA) សម្រេចបានការងារ​សាង​សង់​ជាង ​៩២% និងចំណាយថវិកាអស់ជាង ១​ ៣៣៦​លានដុល្លារ​អាមេរិក ដែលនឹងសម្រេចទៅតាម​ផែនការនៃការដាក់ឱ្យដំណើរការហោះ​ហើរ​​នៅក្នុងខែកក្កដា ឆ្នាំ ២០២៥។

អាកាសយានដ្ឋានអន្តរជាតិតេជោ បានចាប់ផ្តើមដំណើរការសាងសង់នៅឆ្នាំ២០១៩ ​នៅលើ​ទំហំដី ២ ៦០០​ហិកតា ​ដោយ​​ប្រើទឹកប្រាក់វិនិយោគចំនួន ១ ៥០០ លានដុល្លារ សាងសង់ដោយក្រុមហ៊ុន OCIC ដែលមាន​​ភូមិសាស្ត្រ​នៅ​ក្នុង​ខេត្តកណ្តាល​ជាប់​ខេត្តតាកែវ និង​មានចម្ងាយ​ប្រមាណ ២០ គីឡូពីរាជធានីភ្នំពេញ។

គម្រោងសាងសង់អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ ២០២៥ អាចទទួលអ្នកដំណើរ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ អាចទទួលបានអ្នកដំណើរ ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕

អត្ថបទ៖ ឡេង ដេត