ឥណ្ឌា​នឹងបង្កើតបណ្ណាល័យវិទ្យាសាស្ត្រ នៅខេត្តបាត់ដំបង

កម្ពុជា និងឥណ្ឌាសហការគ្នាអនុវត្តគម្រោង Quick Impact Project (QIP) ដោយបង្កើតបណ្ណាល័យវិទ្យាសាស្ត្រ នៅស្រុករតនៈមណ្ឌល ខេត្តបាត់ដំបងក្នុងគោលដៅបណ្តុះវប្បធម៌នៃការសិក្សាស្វែងយល់ផ្នែកវិទ្យាសាស្ត្រ និងនវានុវត្តន៍ និងពង្រីកលទ្ធភាពទទួលបានឯកសារ សម្ភារសិក្សា និងធនធានទាក់ទងនឹងវិទ្យាសាស្ត្រ។

ការសហការនៃគម្រោង QIP ធ្វើឡើង បន្ទាប់ពីលោក ហែម វណ្ណឌី  រដ្ឋមន្ត្រីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និង លោក Vanlalvawna Bawitlung ឯកអគ្គរដ្ឋទូតឥណ្ឌា ប្រចាំនៅកម្ពុជា តំណាងឱ្យ​ក្រសួងការបរទេសនៃសាធារណរដ្ឋឥណ្ឌា បានចុះអនុស្សរណៈនៃការយោគយល់ (MoU) កាលពីថ្ងៃទី១៧ ខែកុម្ភៈ ឆ្នាំ២០២៥។

សម្រាប់គម្រោង QIP ជាគម្រោងរយៈពេលខ្លីដែលអនុវត្តដោយរដ្ឋាភិបាលនៃសាធារណរដ្ឋឥណ្ឌា ក្នុងគោលដៅផ្តល់អត្ថប្រយោជន៍ដល់សហគមន៍មូលដ្ឋាន និងលើកកម្ពស់សកម្មភាពដែលផ្អែកលើវិទ្យាសាស្ត្រ ដើម្បីជួយឱ្យកុមារ និងយុវជនទទួលបានការយល់ដឹងពីភាពអស្ចារ្យនៃវិទ្យាសាស្ត្រ។

ក្រោមអនុស្សរណៈនៃការយោគយល់នេះ រដ្ឋាភិបាលឥណ្ឌានឹងផ្តល់ជំនួយឥតសំណង ក្នុងការផ្គត់ផ្គង់សៀវភៅ ឧបករណ៍វិទ្យាសាស្ត្រ សម្ភារអប់រំ និងឧបករណ៍ពិសោធន៍ផ្សេងៗ ដែលចាំបាច់សម្រាប់ការបង្កើតបណ្ណាល័យវិទ្យាសាស្រ្ត។ ធនធានទាំងនេះនឹងអនុញ្ញាតិឱ្យសិស្ស និស្សិត អ្នកស្រាវជ្រាវ និងសហគមន៍ទូទៅ ស្វែងយល់ពីគោលការណ៍វិទ្យាសាស្ត្រ និងភាពជឿនលឿននៃបច្ចេកវិទ្យា។

​លោកហែម វណ្ណឌី  បានលើកឡើងថា​គំនិតផ្តួចផ្តើមនេះបង្ហាញពីការប្តេជ្ញាចិត្តរួមរបស់ប្រទេសទាំងពីរ ក្នុងការពង្រឹងចំណេះដឹងផ្នែកវិទ្យាសាស្ត្រ និងបច្ចេកវិទ្យានៅក្នុងតំបន់ជនបទ។

លោកបានបន្ថែមទៀតថា៖«ខណៈដែលយើងចាប់ផ្តើមកិច្ចសហប្រតិបត្តិការថ្មីនេះ ក្រសួងនឹងបន្តប្រើប្រាស់មូលដ្ឋានដែលមានស្រាប់ ដើម្បីស្វែងរកឱកាសពង្រីកកិច្ចសហការបន្ថែមទៀតក្រោមក្របខណ្ឌនៃគម្រោង QIP»។

លោកឯកអគ្គរដ្ឋទូត Vanlalvawna បានបញ្ជាក់ការប្តេជ្ញាចិត្តរបស់រដ្ឋាភិបាលឥណ្ឌា ក្នុងការគាំទ្រការអភិវឌ្ឍវិស័យវិទ្យាសាស្ត្រ និងបច្ចេក​វិទ្យានៅកម្ពុជា។ លោកថាគម្រោងនេះនឹងបណ្តុះចំណាប់អារម្មណ៍ផ្នែកវិទ្យាសាស្ត្រ នវានុវត្តន៍ និងជំរុញការចូលរួមដោយផ្ទាល់របស់យុវជនជាមួយគំនិតវិទ្យាសាស្រ្ត។

​លោកឯកអគ្គរដ្ឋទូតបញ្ជាក់ទៀតថា៖« យើងដឹងថាមានតម្រូវការកាន់តែខ្ពស់ក្នុងការអប់រំវិស័យវិទ្យាសាស្រ្ត បច្ចេកវិទ្យា វិស្វកម្ម និងគណិត វិទ្យា (STEM)។ ដូច្នេះ បណ្ណាល័យនេះនឹងជួយកាត់បន្ថយគម្លាតចំណេះដឹងផ្នែក STEM ដោយផ្តល់ឱ្យសិស្សានុសិស្សនូវឱកាសស្វែងយល់ សាកល្បង និងអភិវឌ្ឍចំណង់ចំណូលចិត្តរបស់ពួកគេចំពោះវិទ្យាសាស្រ្ត»។

 ជាមួយគ្នានេះដែរ ភាគីទាំងពីរបានផ្លាស់ប្តូរទស្សនៈលើកិច្ចសហប្រតិ​បត្តិ​ការថ្មីៗបន្ថែមទៀតនាពេលអនាគត ជាពិសេសក្នុងការផ្សារភ្ជាប់ និងផ្គូរផ្គងសហគ្រាសធុនតូចនិងមធ្យម និងធុរកិច្ចថ្មីនៃប្រទេសទាំងពីរ៕