ក្រុមហ៊ុន Panasonic គ្រោងបើករោងចក្រនៅកម្ពុជាដើម្បីចាប់យកកំណើនតម្រូវការ

ក្រុមហ៊ុនអេឡិកត្រូនិកលំដាប់ពិភពលោក Panasonic ដាក់ផែនការក្នុងការបង្កើតរោងចក្រនៅ​កម្ពុជាដែលជាផែនការយុទ្ធសាស្រ្តពង្រីកខ្លួននៅក្នុងតំបន់អាស៊ីអាគ្នេយ៍ បន្ទាប់ពីវត្តមាននៅ​ក្នុងប្រទេស​ថៃ និងវៀតណាម។

ការលើកឡើងអំពីផែនការវិនិយោគនេះធ្វើឡើងកាលពីចុងសប្តាហ៍មុនក្នុងជំនួបរវាងលោក ​Hisakazu Maeda នាយកប្រចាំប្រទេសនៃក្រុមហ៊ុន Panasonic Cambodia និង លោក ហែម វណ្ណឌី​រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅទីស្តីការក្រសួង។

​លោក Hisakazu Maeda បានលើកឡើងអំពីគំនិតផ្តួចផ្តើមនានារបស់ក្រុមហ៊ុននៅក្នុងប្រទេសកម្ពុជា ចាប់តាំងពីឆ្នាំ ២០១០ មក ដោយមានបេសកកម្មបម្រើតម្រូវការឧបករណ៍អេឡិចត្រូនិកនៅទូទាំងប្រទេស។ លោកបានបញ្ជាក់ការប្តេជ្ញាចិត្តរបស់ក្រុមហ៊ុន ចំពោះទំនួលខុសត្រូវសង្គមរបស់សាជីវកម្ម ពិសេសក្នុងការលើកកម្ពស់ការអប់រំ STEM ។

លោក Maeda ក៏បានពិភាក្សាអំពីឱកាសដើម្បីលើកកម្ពស់យុត្តិធម៌ពាណិជ្ជកម្ម និងថាក្រុមហ៊ុនបានអនុវត្តការចុះបញ្ជីផលិតផលរបស់ខ្លួនជាមួយវិទ្យាស្ថានស្តង់ដារកម្ពុជា (ISC) ព្រមទាំងបំណងប្រាថ្នារបស់លោកក្នុងការបង្កើតរោងចក្រ Panasonic នៅក្នុងប្រទេសកម្ពុជា។ បច្ចុប្បន្ន ក្រុមហ៊ុន Panasonic មាន រោងចក្រចំនួន ១៥ នៅក្នុងប្រទេសថៃ និង ៤ នៅវៀតណាម។

លោក ហែម វណ្ណឌី បានទទួលស្គាល់អំពីភាពជោគជ័យរបស់ក្រុមហ៊ុនដែលទទួលបានចំណែកទីផ្សារកម្ពុជាប្រមាណ ៦០% សម្រាប់ផលិតផលភ្ជាប់នឹងជញ្ជាំង និងបានលើកទឹកចិត្តឱ្យក្រុមហ៊ុនសិក្សាតំបន់សេដ្ឋកិច្ចពិសេស សម្រាប់បោះទីតាំងរោងចក្រនាពេលអនាគត។

លោកបានលើកឡើងថា៖« ពីពេលនេះ ដល់ឆ្នាំ ២០២៩ ដែលកម្ពុជានឹងចាកចេញពីក្រុមប្រទេសដែលមានការអភិវឌ្ឍតិចតួច តម្រូវការឧបករណ៍អេឡិចត្រូនិកនឹងកើនឡើង»។

លោកហែម វណ្ណឌីក៏បានលើកទឹកចិត្តឱ្យក្រុមហ៊ុនចូលរួមលើគម្រោងស្រាវជ្រាវ និងនវានុវត្តន៍ និងផ្សារភ្ជាប់សហគ្រាសធុនតូច និងមធ្យមក្នុងស្រុក ទៅក្នុងខ្សែច្រវាក់ផលិតកម្មរបស់ខ្លួន ដោយលើកឡើងថា ក្រសួង ត្រៀមខ្លួនគាំទ្រផែនការទាក់ទាញការវិនិយោគជប៉ុនមកកម្ពុជាបន្ថែមទៀត៕