ព័ត៌មានអន្ដរជាតិ

ចិនជំរុញអាមេរិកឱ្យបញ្ចប់សង្រ្គាមពាណិជ្ជកម្ម ប៉ុន្តែថា ខ្លួនត្រៀមរួចរាល់ដើម្បីតតាំង

បានផុស

២ ថ្ងៃ មុន

នៅ

ថ្ងៃអាទិត្យ ២០ មេសា ២០២៥

ដោយ

ឯកអគ្គរដ្ឋទូតចិនប្រចាំសហរដ្ឋអាមេរិក លោក Xie Feng បានជំរុញអាមេរិកស្វែងរកដំណោះស្រាយរួមជាមួយចិន និងបន្តការរួមរស់ដោយសន្តិភាព ប៉ុន្តែព្រមានថា ចិនបានត្រៀមខ្លួនរួចជាស្រេច ដើម្បីតតាំងក្នុងសង្គ្រាមពាណិជ្ជកម្ម ដែលកំពុងតែឡើងកម្ដៅ។ នេះបើតាមការចុះផ្សាយរបស់សារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងព្រឹត្តិការណ៍សាធារណៈមួយនាទីក្រុងវ៉ាស៊ីនតោនកាលពីថ្ងៃសៅរ៍ លោក Xie បាននិយាយថា ពន្ធគយនឹងបំផ្លិចបំផ្លាញសេដ្ឋកិច្ចពិភពលោក និងទាក់ទាញរូបភាពដូចគ្នាទៅវិបត្តិសេដ្ឋកិច្ចធ្ងន់ធ្ងរ និងអូសបន្លាយ (Great Depression) និងពន្ធសហរដ្ឋអាមេរិកដាក់ក្នុងឆ្នាំ ១៩៣០។ នេះបើតាមព័ត៌មានលម្អិតបង្ហោះនៅលើគេហទំព័ររបស់ស្ថានទូតចិន។

លោក Xie បាននិយាយថា ភាពសុខដុមរមនាគួរតែដឹកនាំទំនាក់ទំនងរវាងមហាអំណាចសេដ្ឋកិច្ចទាំង ២ ដោយ «យើងគួរបន្តការរួមរស់ដោយសន្តិវិធី ជាជាងការប៉ះទង្គិចគ្នា ហើយជួយគ្នាទៅវិញទៅមកឱ្យជោគជ័យ ជាជាងជាប់ក្នុងសេណារីយ៉ូចាញ់ឈ្នះ»។

គួរគូសបញ្ជាក់ថា សង្រ្គាមពាណិញ្ជកម្មចិន និងអាមេរិកបានផ្ទុះឡើងជាថ្មីខ្លាំង ក្រោមគោលនយោបាយពន្ធគយរបស់លោក ដូណាល់ ត្រាំ។ អាមេរិកបានដាក់ពន្ធលើទំនិញចិនរហូតដល់ ១៤៥ ភាគរយ ដែលធ្វើឱ្យពន្ធលើមុខទំនិញមួយចំនួនឡើងរហូតដល់ ២៤៥ ភាគរយ។ ជាការសងសឹក ចិនដំឡើងត្រឹម ១២៥ ភាគរយ ហើយប្ដេជ្ញាថាឈប់ខ្វល់លើការដំឡើងពន្ធរបស់អាមេរិក ប៉ុន្តែថា ខ្លួននឹងចាត់វិធានការការពារផលប្រយោជន៍ផ្សេងៗ។ បច្ចុប្បន្ននេះ គេមិនទាន់ឃើញមានគំរោងចរចាដោះស្រាយកម្រិតខ្ពស់រវាងប្រទេសទាំង២ នៅឡើយទេ៕