វៀតណាម បើកឲ្យសិស្សសាលាជិត ១ លាននាក់ចូលអង្គុយប្រលងថ្នាក់ជាតិ ចំពេលកំពុងផ្ទុះឆ្លងកូវីដខ្លាំង

ប្រទេសវៀតណាមកាលពីថ្ងៃពុធ បានអនុញ្ញាតឲ្យសិស្សសាលាជិត ១ លាននាក់ អង្គុយប្រលងថ្នាក់ជាតិចូលវិទ្យាល័យរយៈពេល ២ ថ្ងៃ ចំពេលមានករណីកើនឡើងនៃករណីឆ្លងជំងឺកូវីដ ១៩ ។

ទីភ្នាក់ងារសារព័ត៌មានវៀតណាម (VNA) បានរាយការណ៍ថា ទោះយ៉ាងណា រដ្ឋាភិបាលបានដាក់ចេញនូវវិធានការប្រឆាំងនឹងកូវីដយ៉ាងតឹងរ៉ឹង ដើម្បីទប់ស្កាត់ការរីករាលដាលនៃករណីឆ្លងណាមួយ ។

ទន្ទឹមនោះ លោកនាយករដ្ឋមន្រ្តី Pham Minh Chinh បានស្នើឲ្យមន្ត្រី និងមន្ទីរសុខាភិបាលក្នុងតំបន់ទាំងអស់ អនុវត្តនូវដំណោះស្រាយយ៉ាងម៉ឺងម៉ាត់ ដើម្បីការពារការរកឃើញករណីឆ្លង ហើយត្រូវដាក់ការធ្វើចត្តាឡីស័ក ដើម្បីទប់ស្កាត់ការផ្ទុះឡើង និងផ្តល់ការព្យាបាលយ៉ាងសកម្ម ជាដើម ។

យោងតាមក្រសួងសុខាភិបាលវៀតណាមបានរាយការណ៍ថា ចាប់តាំងពីការផ្ទុះឡើងនៃរោគរាតត្បាតកូវីដ ១៩ ប្រទេសនេះបានកត់ត្រាករណីឆ្លងក្នុងសហគមន៍ចំនួន ២០,១៨៣ ករណី និងករណីនាំចូលចំនួន ១,៨៨១ ករណី ខណៈមានអ្នកស្លាប់ ៩៤ នាក់ ។

ខណៈករណីឆ្លងកំពុងកើនឡើង វៀតណាមក៏បានបញ្ជាទិញវ៉ាក់សាំងការពារជំងឺកូវីដ ១៩ បន្ថែមផងដែរ ហើយកាលពីថ្ងៃពុធប្រទេសនេះ បានទទួលការដឹកជញ្ជូនវ៉ាក់សាំង Pfizer-BioNTech ចំនួន ៩៧,១១០ ដូស ។

ទន្ទឹមនោះ អាជ្ញាធរបាននិយាយថា ប្រទេសវៀតណាមនឹងទទួលបានវ៉ាក់សាំងរហូតដល់ ៣១ លានដូសក្នុងឆ្នាំនេះ ក្រោយបានអនុម័តប្រើប្រាស់វ៉ាក់សាំងចំនួន ៥ រួមមានវ៉ាក់សាំង Pfizer-BioNTech និងវ៉ាក់សាំង Moderna របស់អាមេរិក វ៉ាក់សាំងរុស្ស៊ី Sputnik វ៉ាក់សាំង Astrazeneca របស់អង់គ្លេស និងវ៉ាក់សាំងចិន Sinopharm ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ឥឡូវ​កូវីដ​ ១៩ ​វាយ​លុក​ចូល​ពន្ធនាគារ​ក្នុង​ទី​ក្រុង​ហូជីមិញឆ្លងជាច្រើន